Ezequiel
5 Qam, nunapa tsurin, aqtsa rutoqkuna rurayanqannö afilashqa espädawan aqtsëkita rutuy y shaprëkita* afeitakuy. Tsëpitana rutunqëki aqtsata balanzachö pesaskir kimaman raki. 2 Y markata ushakätsinëkipaq täparanqëki junaqkuna cumpliriptin+ tsë rakinqëki aqtsata, juk kaqta marka rurinchö ninawan rupatsinki. Juk kaq rakinqëkitana, marka waqtankunachö espädëkiwan wallur ushanki.+ Y juk kaqtana vientu apakunampaq maqtsinki. Noqanam espädata sutarir ushakätsinäpaq qepanta ëwashaq.+
3 Tsënölla juk ishkë aqtsata aptarkur röpëki* kuchunman watarkunki. 4 Y juk ishkë aqtsatana, rupanampaq ninaman jitëkunki. Tsë ninaqa entëru Israel nunakunamanmi chanqa.+
5 Llapanta Gobernaq Teyta Jehovämi kënö nin: ‘Këmi tsë Jerusalen marka. Entëru nacionkunapa chowpinmanmi* churarqö. Mëtsë nacionkunam entëru lädumpa këkäyan. 6 Jerusalen markachö nunakunaqa, mana cäsukoqmi kayan. Ninqäkunata ni leynïkunatapis manam cäsukuyashqatsu. Amänun nacionkunachö nunakunapitapis mas peortam rurayashqa.+ Ninqäkunata y leynïkunatapis mana kaqpaqmi churayashqa y manam mandakunqänötsu kawayashqa’.
7 Tsënö kayanqëkipitam Llapanta Gobernaq Teyta Jehoväqa kënö nin: ‘Qamkunaqa wakin nacionkunachö nunakunapitapis mas mana allim kayanki. Manam mandakunqäkunata ni ninqäkunata cumpliyashqankitsu. Tsëpa rantinqa, juk nacion nunakuna niyanqantam rurayarqunki.+ 8 Tsënö kayanqëkipitam Llapanta Gobernaq Jehovä kënö niyäshunki: “Jerusalen marka, kananqa contrëkim churakarqö.+ Llapan nacionkuna rikëkäyäshuptikim, kananqa ushakätsishqëki.+ 9 Imëka jutsata* ruranqëkipitam, kananqa imëpis mana ruranqänö castigashqëki. Y yapëqa manam tsënö rurashaqnatsu.+
10 Tsëmi, papä kaqkuna y mama kaqkunaqa wamrankunata mikuyanqa,+ y wamrankunanam papäninkunata y mamäninkunata mikuyanqa. Tsënömi castigashqëki. Y quedaq kaqkunatanam mëtsë markakunapa qarqushaq”’.+
11 ‘Tsëmi, melanëpaq santukunata sagrädu sitiüman yëkatsiyanqëkipita y imëka mana allikunata rurayanqëkipita qamkunata alläpa despreciä.*+ Manam llakipäyashqëkitsu* ni manam ichikllapis qamkunapaq yarpachakushaqtsu. Tsëtam jurar nï, noqa kawëkaq Dios y Llapanta Gobernaq Jehovä.+ 12 Qamchö këkaq nunakunam, wakinqa raslla o saslla wanutsikoq qeshyawan* o mallaqëwan wanuyanqa. Wakinkunatanam entëru läduykikunachö espädawan wanutsiyanqa+ y wakinkunatanam espädata sutarir qatikachar mëtsëpa qarqushaq.+ 13 Tsëta ruraptïran cöleräqa pasanqa y kushishqam quedashaq.+ Y castigar ushaptïmi, llapankuna musyayanqa noqa Jehovä parlashqa kanqäta y noqallata adorayämänanta munanqäta.+
14 Pasëpa* juchur* ushashqatam dejashqëki. Tsëmi tsëpa pasaqkuna y juk nacion nunakunapis rikëkuyäshurniki burlakuyanqa.+ 15 Tsënö cölerar fuertipa castigapteqmi, qampita burlakuyanqa y despreciayäshunki.+ Tsënö castiganqaqta rikarmi, läduykichö wakin nacionkunapis noqapita mantsapakuyanqa. Tsëtam noqa Jehovä parlarqö.
16 Mëtsika flëchawannöran, llapankunata mallaqëpita wanutsishaq. Flëchawan wanoqnömi llapankuna ushakäyanqa.+ Noqa munaptïmi, mikuyänampaqqa ni imapis kanqatsu.*+ 17 Noqa castigapteqmi wamrëkikunaqa mallaqëpita wanuyanqa. Chukaru animalkunatapis wamrëkikunata wanutsiyänampaqmi mandamushaq.+ Qamkunaqa raslla o saslla wanutsikoq qeshyawanmi wanuyanki. Wanutsinakurllam kayanki y espädawanmi wanutsiyäshunki.+ Tsëtam noqa Teyta Jehovä parlarqö’”.