Zacarïas
12 Teyta Diosmi nin:
“Këchömi qellqarëkan Israel nunakunapaq noqa Jehovä willakunqä” ninmi Teyta Jehovä.
2 “Amänun markakunachö nunakunata ishkitsir ushayänampaqmi, Jerusalenpita nunakunata vïnuyoq cöpatanö* tikratsishaq, y Judäpita y Jerusalenpita nunakunatam cercashqata katsiyanqa.+ 3 Tsë junaqqa Jerusalenpita nunakunatam llapan marka nunakunapaq lasaq rumitanö tikratsishaq. Llapan pallarita* munaqkunam feyupa dañakuyanqa,+ y llapan nacionchö nunakunam pëkunaman pelyaq ëwayänampaq juntakäyanqa.+ 4 Noqa Jehovämi nï, tsë junaqqa, llapan cawallukunatam mantsakätsishaq, y cawallun montashqa soldädukunatam locuyätsishaq. Judäpita nunakunataqa alkäbu alkäbullam rikëkäshaq, peru juk markapita nunakunapa cawallunkunataqa wiskuyätsishaqmi o qaprayätsishaqmi. 5 Y Judächö dirigentikunaqa* shonqunkunachömi kënö pensayanqa: ‘Angelkunata mandaq Teyta Jehovä Diosninkuna kaptinmi, Jerusalenpita nunakunaqa pëpita shamoq kallpantsik kayan’.+ 6 Tsë junaqqa, yanta chowpinchö* ninanö y segashqa manöjukunata rupëkaq ninanömi,+ Judäpita dirigentikunaqa derëcha lädunchö y izquierda lädunchö+ markakunata pasëpa* ushakätsiyanqa, y Jerusalenpita nunakunaqa yapëmi Jerusalenchö kawayanqa.+
7 Davidpa kastankuna y Jerusalenpita nunakuna, carpakunachö* kawaq Judä nunakunapita mas reqishqa mana kayänampaqmi, noqa Jehoväqa Judä nunakunata puntata salvashaq. 8 Tsë junaqqa noqa Jehovämi, Jerusalenpita nunakunata escüdu cuenta tsapäshaq,+ y kallpannaq këkaqkunam Davidnö kayanqa, y Davidpa kastankunanam noqa Diosnö y puntankunata ëwëkaq noqa Jehoväpa angelnïnö kayanqa.+ 9 Tsë junaqqa Jerusalenpita nunakunata ushakätsita munaq nacionkunatam llapanta ushakätsishaq.+
10 Rikënïchö alli kayänampaq y noqaman rogakayämunampaqmi, Davidpa kastankunata y Jerusalenpita nunakunata podernïwan yanapashaq, y tuksiyanqan nunatam rikäyanqa,+ y jukllëlla wamrankuna wanuptin o wañuptin llakikur waqayanqannömi waqayanqa, y mayor wamrankuna wanuptin waqaqnömi alläpa waqayanqa. 11 Tsë junaqqa, Meguidö pampachö këkaq Hadadrimon sitiuchö llakikur waqayanqannömi, Jerusalenchö nunakuna alläpa waqayanqa.+ 12 Tsë nacionchöqa cada familiam aparti aparti llakikur waqayanqa. Davidpa kastankuna llakikur waqayanqannöllam warminkunapis llakikur aparti waqayanqa, y Natanpa+ kastankuna llakikur waqayanqannöllam warminkunapis llakikur aparti waqayanqa. 13 Levïpa+ kastankuna llakikur waqayanqannöllam warminkunapis llakikur aparti waqayanqa y Simeïpa+ kastankuna llakikur waqayanqannöllam warminkunapis llakikur aparti waqayanqa. 14 Tsënöllam wakin quedaq familiakunachöpis, kastankuna llakikur waqayanqannölla warminkunapis llakikur aparti waqayanqa.