Jeremïas
26 Josïaspa tsurin Jehoiaquim+ Judächö gobernar qallanqan witsanmi, Teyta Jehoväqa Jeremïasta parlapar kënö nirqan: 2 “Teyta Jehovämi këta nin: ‘Noqa Jehoväpa wayï patiüman churakëkur, noqa Jehoväta adoramaq* wayïman shamoq Judäpita llapan nunakunata, llapan ninqaqkunata willë. Awmi, llapan ninqaqkunata mana qonqashpa willë. 3 Capaz ninqëkikunata cäsukur mana alli rurëkunata dejayanman. Tsëqa pëkunata ruranäpaq pensanqäta cambiarmi, mana allikunata rurayanqampita, imëka mana allikunata pëkunaman chätsimushaqnatsu.+ 4 Pëkunatam kënö ninëki: “Teyta Jehovämi këta nin: ‘Ninqäkunata mana wiyakuyaptiki, y qamkunata mandanqäkunata* mana cäsukuyaptikiqa, 5 y mana cäsukuykäyaptikipis, qamkunaman kutin kutin mandamunqä willakoqnïkuna niyäshunqëkita mana cäsukuyaptikiqa,+ 6 Silö+ markata dejanqänömi kë wayitapis dejashaq. Y mëtsë nacionpita nunakunam, pitapis maldicir kë markanölla ushanampaq kaqta niyanqa’”’”.+
7 Teyta Jehoväpa wayinchö Jeremïas tsënö willakunqantaqa, sacerdötikuna, willakoqkuna y markachö llapan nunakunam wiyayarqan.+ 8 Teyta Jehovä ninqanta llapan nunakunata Jeremïas willar ushaskiptinnam, sacerdötikuna, willakoqkuna y markachö llapan nunakunaqa, Jeremïasta tsarïkur* kënö niyarqan: “Kananmi wanutsiyashqëki. 9 ¿Imanirtan, ‘kë wayitaqa Silö markatanömi dejarishaq, y kë markapis tsunyaq sitium tikranqa y manam ni pï tsëchö kawanqanatsu’ nir Teyta Jehoväpa jutinchö willakurqunki?”. Tsënö nirmi Teyta Jehoväpa templunchö llapan nunakunaqa, Jeremïaspa lädunman churanakuyarqan.
10 Tsëkunata musyëkurmi Judächö gobernaqkunaqa, gobernaqpa wayimpita* Teyta Jehoväpa wayinman ëwayarqan. Y Teyta Jehoväpa wayinchö Mushoq Punku niyanqampa yëkunanchömi täkuriyarqan.+ 11 Tsënam sacerdötikuna y willakoqkunaqa, dirigeqkunata y markachö nunakunata kënö niyarqan: “Qamkuna wiyayanqëkinöpis, kë nunaqa kë marka ushakänampaq kaqtam willakushqa,+ tsëmi wanunan o wañunan”.+
12 Tsënam Jeremïasqa dirigeqkunata y tsë markachö nunakunata nirqan: “Kikin Teyta Jehovämi, kë wayita y kë markata ima pasanampaq kaqta, qamkuna wiyayanqëkinölla willakunäpaq mandamashqa.+ 13 Tsëmi imanö portakuyanqëkita cambiayänëki, mana alli rurëkunata dejayänëki y Jehovä Diosnikikuna niyäshunqëkita cäsukuyänëki. Tsëta rurayaptikiqa, decidinqanta cambiarmi, Teyta Jehoväqa qamkunaman imëka mana allikunata chätsimunqanatsu.+ 14 Noqaqa qamkunapa makikikunachömi këkä, y qamkunapaq mas alli kanqannö noqawan rurayë. 15 Peru këtam alli musyayänëkita munä. Qamkunata llapan willayanqaqkunaqa,* Teyta Jehovä nimanqanllam kashqa. Tsëmi noqata wanutsimarqa qamkuna, kë marka y kë markachö nunakunapis, culpannaq nunata wanutsiyanqëkipita culpayoq kayanki”.
16 Tsënam dirigeqkuna y nunakunaqa, sacerdötikunata y willakoqkunata niyarqan: “Kë nunaqa Jehovä Diosnintsikpa jutinchömi parlapämarquntsik, tsëmi pëtaqa wanutsiyänantsu”.
17 Tsënöllam tsë nacionpita wakin dirigeqkunapis, sharkur* tsëchö këkaqkunata kënö niyarqan: 18 “Judächö Ezequïas+ gobernanqan witsanmi, Morëset markapita Miquëas,+ Judä kinrëchö nunakunata kënö nirqan: ‘Angelkunata mandaq Teyta Jehovämi këta nin:
“Siontaqa chakratanömi yapyayanqa.*
Jerusalenpis qoturëkaq rumillanam quedanqa.+
Teyta Diospa wayin* kanqan jirkachöpis montikunallanam kanqa”’.*+
19 ¿Tsërëkurku Judächö gobernaq Ezequïas, y Judächö nunakuna wanutsita o wañutsita munayarqan? Ezequïasqa llapan shonqunwanmi Jehoväta respetarqan, y Jehovä Diosmanmi rogakurqan. Tsëmi Teyta Jehoväqa decidinqanta cambiar, pensanqannötsu pëkunaman imëka mana allikunata chätsimurqan.+ Peru pensëkanqantsikta rurashqaqa, imëka mana allikunam noqantsikman chämunqa.
20 Tsënöllam Quiryat-Jearimpita+ Semäyapa tsurin Urïyapis, Teyta Jehoväpa jutinchö willakurqan. Pëpis Jeremïasnöllam kë markata y kë nacionchö nunakunata, ima pasanampaq kaqta willakurqan. 21 Y gobernaq Jehoiaquim,+ pelyëta yachaq puëdeq soldädunkuna y dirigeqninkunam, Urïya willakuykanqanta musyariyarqan. Tsëmi gobernaq Jehoiaquimqa wanutsita munarqan.+ Tsëta musyëkurmi Urïyaqa, alläpa mantsakar Egiptuman qeshpir ëwakurqan. 22 Tsënam gobernaq Jehoiaquimqa, Acborpa tsurin Elnatanta+ y mas nunakunata, Egiptuman mandarqan. 23 Pëkunaqa Urïyata Egiptupita kutiskatsimurmi gobernaq Jehoiaquimman apayarqan, y pëqa espädawan wanuskatsirmi,+ waktsakunata pampayänan panteonman jitëkurqan”.
24 Safanpa+ tsurin Ahicammi+ Jeremïasta yanaparqan y wanutsita munaq nunakunapa makimpitam salvarqan.+