Zacarïas

Noqa Jehovämi yana pukutëta yuritsimü,

y nunakunaman mëtsikata tamyatsimurmi+

llapankunapa mikuyninkuna kananta permitï.

 2 Wayinkunachö adorayanqan santunkunaqa* manam imapaqpis välintsu,

brüjukunapis manam rasumpa kaq revelaciontatsu chaskiyan.

Suëñuyanqampita parlayanqampis, manam imachö yanapakuntsu,

y ardëllam* pitapis yanapëta munayan.

Tsëmi nunakunaqa üshakunanö wakpa këpa puriyan,

y mitseqninkuna mana kaptinmi alläpa sufriyan.

 3 Tsënö kaptinmi tsë mitseqkunawan cölerashqa këkä,

y sufritseqnin pushakoqkunatam cuentata mañashaq.

Noqa angelkunata mandaq Jehoväqa alkäbum këkä üshä cuenta Judä nunakunapita,+

y guërrapaq fuerti y alläpa shumaq cawallukunatanömi tikratsishaq.

 4 Judäpitam dirigeq nuna* kanqa,

tsëpitam yanapaqnin gobernaqpis kanqa,

tsëpitam pelyëta yachaq nunapa flechakunan kanqa,

y tsëpitam llapan mandakoqkunapis* kayanqa. Awmi, llapankunam tsëpita kayanqa.

 5 Llapankunam pelyëta yachaq nunakuna kayanqa

y guërrachö këkarmi cällikunachö mituta jaruyanqa.

Noqa Jehovä yanapaptïmi guërrata rurayanqa,+

y cawallun montashqa këkaqkunaqa penqakuychömi ushayanqa.+

 6 Judäpita nunakunataqa chikeqninkunapita mas puëdeqtam tikratsishaq,

y Josëpa kastankunatam salvashaq.+

Llakipar* pëkunata kutitsimuptïmi+

mana imëpis dejashqanö kayanqa.+

Noqa Jehovämi Diosninkuna kä,

y mañakayämunqantam contestashaq.

 7 Efrainpita nunakunaqa, pelyëta yachaq puëdeq soldädunömi kayanqa,

y vïnuta upushqanömi shonqunkunachö alläpa kushikuyanqa.+

Tsëta rikarmi tsurinkunapis alläpa kushikuyanqa,

y noqa Jehovä pëkunata llakipar* ruranqäpitam kushikuyanqa.+

 8 ‘Pëkunatam salvashaq y mëtsikaqmi kayanqa,+

imëpis tsënö mëtsikaqmi kayanqa.

 9 Muruta maqtseqnö mëtsë markakunaman apashqa kayänanta permitiptïpis,

tsë karu markakunachömi noqata yarpäyämanqa,

y tsurinkunawan juntu yapë kallpayoq tikrarmi markankunaman kutiyämunqa.

10 Egiptuchö markakunapitam yapë kutitsimushaq,

Asiriaman+ apashqa kayanqampitam juntamushaq,

Galaadchö+ markakunaman y Lïbanumanmi apashaq,

y mëtsikaq kayaptinmi llapampaqqa sitiupis tinkunqatsu.+

11 Imëka pasakuykaptinmi lamarta tsimpayanqa,

lamar yakupis laqcheqyanqam,+

y Nïlu mayupis* tsakirinqam.

Asiriapita orgullösu nunakunapis penqakuychömi ushayanqa,

y Egiptupita nunakunapis manam puëdeqnatsu kayanqa.+

12 Pëkunaqa imanö kawayanqanwanmi jutïta alabayanqa,+

y noqa Jehovä yanapaptïmi wakinkunapita mas puëdeq kayanqa’+ ninmi Teyta Jehovä”.