Ezequiel

36 “Nunapa tsurin, kananqa Israel jirkakunaman rikëkur kënö willakuy: ‘Israel jirkakuna, Jehovä ninqanta wiyayë. 2 Llapanta Gobernaq Teyta Jehovämi kënö nin: “Qamkunapaqmi chikiyäshoqnikikunaqa kënö niyashqa: ‘Alläpa kushikuypaqmi, unë altu jirkankunapis kananqa noqantsikpanam’”’.+

3 Tsëmi kënö willakunëki: ‘Llapanta Gobernaq Teyta Jehovämi kënö nin: “Pëkunaqa, nacionkunachö quedaq wakin nunakunapa poderninchö kayänëkita munarmi, entëru lädupa atacayäshurqunki y imannaqta dejayäshurqunki. Y nunakunaqa imëkatam rimayäshunki y tumpayäshunki.*+ 4 Tsëmi, Israel jirkakuna Llapanta Gobernaq Teyta Jehovä ninqanta wiyayänëki. Jatusaq jirkakunata, taksha jirkakunata, mayukunata,* pampakunata, ushakashqa markakunata y nacionkunachö quedaq nunakuna imëkankunata apakuyanqan+ y burlakuyanqan markakunatam Llapanta Gobernaq Teyta Jehovä+ kënö nin. 5 Pëkunatam Llapanta Gobernaq Teyta Jehovä kënö nin: ‘Nacionkunachö quedaq nunakunata y edomïta nunakunatam alläpa cölerashqa parlapäshaq.+ Pëkunaqa alläpa despreciarmi y kushishqam markäkunapaq y qewayoq chakräkunapaq pëkunapa kanqanta niyan,+ y munayanqantam apakuyan’”’.+

6 “Tsëmi Israelchö markakunapaq willakunëki. Altu jirkakunata, taksha jirkakunata, mayukunata* y pampakunatam kënö ninëki: ‘Llapanta Gobernaq Teyta Jehovämi kënö niyäshunki: “Rikäyë, alläpa penqakuyman churayäshunqëkipitam nacionkunata alläpa cölerashqa parlapäshaq”’.+

7 Tsëmi Llapanta Gobernaq Teyta Jehovä kënö nin: ‘Noqam makïta pallarkur* jurä, vecïnuyki nacionkunaqa kikinkunam penqakushqa quedayanqa.+ 8 Peru Israel jirkakuna, qamkunachöqa mëtsika rämayoq plantakunam kanqa, y mëtsika frütatam sirwimaqnï israelïtakunapaq wayunqa.+ Pëkunaqa prontunam kutiyämunqa. 9 Peru noqaqa qamkunawanmi këkäshaq, y manam dejayashqëkitsu. Qamkunachömi imëkata murupakuyanqa. 10 Israel nunakunaqa, mëtsikam mirayanqa y markakunachömi kawayanqa.+ Hasta juchushqa* markakunatapis yapëmi shäritsiyanqa.+ 11 Awmi, sirwimaqnïkunataqa miratsishaqmi, tsënöllam animalninkunatapis miratsishaq.+ Mirarmi mëtsikaq kayanqa, puntatanömi mëtsikaq kayanqa.+ Punta kawayanqampitapis mas allim kawakuyanqa,+ y qamkunaqa musyariyankim noqa Jehovä kanqäta.+ 12 Y qamkunachömi nunakuna, sirwimaqnï israelïtakuna puriyanqa y qamkunaqa pëkunapam kayanki.+ Pëkunapa herenciankunam kayanki y mananam masqa wamrankunata wanutsinkinatsu’”.+

13 “Këtam Llapanta Gobernaq Teyta Jehovä niyäshunki: ‘Pëkunaqa kënömi niyäshunki: “Qamqa, qamchö kawaq nunakunata wanutseq marka y nacionnikichö kawaq wamrëkikunata wanutseq markam kanki”’. 14 ‘Tsëmi Llapanta Gobernaq Teyta Jehovä kënö nishunki: “Mananam qamchö këkaq nunakunata ushakätsinkinatsu, ni nacionnikichö këkaq wamrëkikunata wanutsinkinatsu. 15 Mananam permitishaqnatsu, nacionkuna insultayäshunëkita, qamchö këkaq nunakunapita burlakuyänanta+ y mananam nacionnikikunata desgraciakunapa pasatsinkinatsu’ ninmi Llapanta Gobernaq Teyta Jehovä”.

16 Teyta Jehoväqa yapëmi parlapämarqan y kënömi nimarqan: 17 “Nunapa tsurin, israelïtakuna markankunachö kawarqa, imëka mana allikunata rurarmi markankunata rakchatäyarqan o qanratäyarqan.+ Tsënö portakuyanqanqa killanwan këkaq warmi rakcha o qanra këkanqannömi karqan.+ 18 Tsëmi nuna mayinkunapa yawarninkunata jichayanqampita+ y melanëpaq santukunata adorar markankunata rakchatäyanqampita o qanratäyanqampita alläpa cölerashqa castigarqä.+ 19 Mëtsë markakunaman y mëtsë nacionkunamanmi qarqurqä.+ Y mana alli portakuyanqampita y melanëpaq kawakuyanqampitam juzgarqä. 20 Peru chäyanqan nacionkunachöqa, nunakunaqa sagrädu jutïpaqmi mana allita parlayarqan.+ Kënömi niyarqan: ‘Pëkunaqa Jehoväpa sirweqninmi kayan, peru markankunatapis dejaskirmi ëwakayämushqa’. 21 Tsënömi israelïtakunaqa mëtsë nacionkunaman ëwarnin sagrädu jutïta respetayarqantsu ni respetatsiyarqantsu. Tsëmi kananqa sagrädu jutïta respetatsishaq”.+

22 “Tsëmi Israel nunakunata kënö ninëki: ‘Këtam nin Llapanta Gobernaq Teyta Jehovä: “Israel nunakuna, këtaqa manam qamkunarëkurtsu rurëkä, sinöqa sagrädu jutïrëkurmi. Qamkunam mëtsë nacionkunaman ëwayanqëkichö sagrädu jutïta respetayarqunkitsu ni respetatsiyarqunkitsu”’.+ 23 ‘Tsëmi kananqa, nacionkunachö täkoq* nunakuna jutïpaq mana allita parlëkäyaptimpis y qamkuna mana allichö quedatsishqa këkäyaptikipis sagrädu jutïtaqa respetatsishaq.+ Y jutïta respetatsinärëkur qamkunapaq imëkakunata ruranqäta rikarmi, nacionkunaqa musyariyanqa noqa Jehovä kanqäta’+ ninmi Llapanta Gobernaq Teyta Jehovä. 24 ‘Mëtsë nacionkunachö këkaqta y mëtsë markakunachö këkaqtam, llapëkita juntayashqëki y markëkikunamanmi kutitsiyämushqëki.+ 25 Limpiu yakuwanmi tsaqtsuyashqëki, tsëmi limpiu quedariyanki.+ Imëka jutsata* rurashqa karpis y melanëpaq santukunata adorashqa karpis+ limpium quedariyanki.+ 26 Mushoq shonquyoqtam tikratsiyashqëki+ y ninqäkunata cäsukuyänëkipaqmi yanapayashqëki.+ Rumi shonqu këkäyaptikipis, cäsukoq kayänëkipaqmi yanapayashqëki.+ 27 Podernïwanmi yanapayashqëki jukläyana pensayänëkipaq.+ Tsëmi mandakunqäkunata y ninqäkunata cäsukuyanki y cumpliyanki. 28 Y unë kastëkikunata entreganqä markakunachömi kawakuyanki. Qamkunam sirwimaqnïkuna kayanki y noqam Diosnikikuna kashaq’.+

29 ‘Imëka mana allikunata mana rurayänëkipaqmi librayashqëki. Tsaki mikuykunatapis, mëtsikata wayunampaqmi nishaq, y mananam mallaqäyankinatsu.+ 30 Noqa bendiciptïmi plantakunapis mëtsikata wayunqa y chakrakunachöpis mëtsika mikuy kanqa. Tsëmi juk nacionkunachöqa mikuyta mañapakur penqakuypaq puriyankinatsu.+ 31 Y yarpäriyankim portakuyanqëki y imëka rurayanqëkikunapis mana alli kashqa kanqanta. Imëka melanëpaqkunata rurayanqëkita yarparmi pasëpa* penqakuyanki.+ 32 Peru Israel nunakuna, kë llapantaqa manam qamkunarëkurtsu rurëkä.+ Këtaqa rurëkä, imëka mana allikunata rurayanqëkita yarpar penqakuyänëkita y llakikuyänëkita munarmi’ ninmi Llapanta Gobernaq Teyta Jehovä.

33 Llapanta Gobernaq Teyta Jehovämi kënö nin: ‘Llapan jutsëkikunapita* librita tikratsinqä junaqpitaqa, nunakuna mana täkuyanqan* markakunachömi, nunakuna kayanqana.+ Ishkishqa markakunatapis shäritsiyanqanam.+ 34 Llapan pasaqkuna rikäyänampaqmi, imapis mana kanqan sitiukunachö murupakuyanqa. 35 Tsëta rikarmi nunakunaqa kënö niyanqa: “Imapis mana kanqan sitiukunam kananqa, Eden huertanöraq tikrashqa+ y juchutsir* ushayanqan markakunapis kananqa murällayoqmi alli següruna këkan, kananqa tsëchömi mëtsika nunakuna kawayan”.+ 36 Amänuyki nacionkunachö kawëkar quedashqa nunakunam, musyayanqa pasëpa* juchushqa* markakunata noqa Jehovä yapë shäritsinqäta y imapis mana kanqan sitiukunachö plantapakunqäta. Noqa Jehovämi parlanqänölla rurarqö’.+

37 Llapanta Gobernaq Teyta Jehovämi kënö nin: ‘Israelïtakuna mañakayämanqantapis wiyashaqmi. Pëkunaqa mañakayämanqa mëtsika üshatanöraq miratsinäpaqmi. 38 Tsëmi pëkunataqa, limpiu shonquyoq nunakunapa üshankunatanöraq mëtsikata miratsishaq, Jerusalenchö fiesta kaptin+ apayanqan mëtsika üshatanöraq.* Ushakashqa kanqan markamanmi nunakunaqa, mëtsika üshanöraq ëwayanqa,+ y musyariyanqam noqa Jehovä kanqäta’”.