Isaïas
34 Mëtsë nacionpita nunakuna ninqäkunata alkäbu wiyakuyë.
Patsa y tsëchö llapan kawaqkuna ninqäkunata wiyakuyë.
2 Teyta Jehoväqa mëtsë nacionpita nunakunawan,
y tsë nacionkunapita soldädukunawanmi+ alläpa cölerashqa këkan.+
Tsëmi pëkunata ushakätsinqa.
Awmi, llapankunatam wanutsinqa.+
3 Pëkunapa ayankunataqa manam pampayanqatsu,
y ayankuna jitaräyanqan sitiuqa alläpam asyanqa+
y yawarninkunapis jirkakunapam yakunöraq ëwanqa.+
4 Ciëluchö soldädukunapis ismurmi ushakäyanqa,
y ciëlunö kaqkunapis röllunömi pitukäyanqa.
Üvas plantapa tsaki rapran patsaman jeqanqannö,
y hïgus plantapa tsaki hïgusnin patsaman jeqanqannömi
llapan soldädunkunapis patsaman ishkiyanqa.
5 “Ciëluchö kaqkunata wanutsiptïmi espädäpis yawarllana këkanqa,+
tsë espädäwanmi Edom kinrëpita nunakunatapis castigar ushakätsishaq.+
Pëkunataqa pasëpa* ushakätsinäpaqmi decidirqö.
6 Noqa Jehoväpa espädäqa yawarllanam këkanqa.
Mallwa carnërukunapa y cabrakunapa
yawarninwanmi yawarllana këkanqa,
y carnërukunapa riñonninchö wiranwanmi wirallana këkanqa.+
Noqa Jehoväqa Bozrä markachömi qarëkunata alistashaq
y Edom kinrëchömi mëtsika nunakunata wanutsishaq.+
7 Chukaru törukunapis tsë animalkunawan juntum ushakäyanqa,
y mallwa törukunapis puëdeq nunakunawan juntum ushakäyanqa.
Markankunapis yawarllanam këkanqa,
y allpapis wirallanam këkanqa”.
8 Teyta Jehoväqa chikeqninkunata castiganampaqmi juk junaqta akrashqa.+
Awmi, Sionpita nunakunata mana alli tratayanqampita castiganampaqmi juk watata akrashqa.+
9 Mayunkunapis* breamanmi tikranqa
y allpapis azufrimanmi tikranqa
y markankunapis ninawan rawrëkaq o lunyëkaq breanömi rupanqa.
10 Paqasta y junaqtapis manam upinqatsu,
qoyëqa o qoshniqa imëpis yarquykanqallam.
Imëpis tsunyaq sitiullanam kanqa,
y manam ni pï tsëpa pasanqanatsu.+
11 Tsëchöqa pelïcanukuna y puercoespin* animalkunallanam pärayanqa,
y taksha tukukuna y chiwillu pishqukunallanam* kawayanqa.
Tsë marka tsunyaq kanqanta y imapaqpis mana sirwinqanta rikätsikunampaqmi
Teyta Diosqa cordelwan y plomädawan medinqa.
12 Manam mëqan reqishqa nunakunapis gobernaqtsu kanqa,
y dirigeqninkunapis mana kaqpaq churashqam kayanqa.
13 Fuerti törrinkunachöpis kashakunallanam kanqa,
y murällankuna jananchöpis kashayoq plantakuna
y shinwallana o ishankallanam kanqa.
Tsëchöqa chacalkunallanam*+ pärayanqa, y avestruzkunallanam kawayanqa.
14 Tsëmanmi tsunyaq sitiuchö päraq chukaru animalkuna
y awllaq animalkunapis ëwayanqa, y chukaru cabrakunapis qayanakurmi tsëman juntakäyanqa.
Tsëchömi paqaspa pureq pishqukunapis* tranquïlu kawayanqa.
15 Tsëchömi ras o sas pureq culebrapis qeshun ruranqa y runtunkunata wachanqa.
Y runtunkunata pashtaratsirmi shumaq cuidanqa.
Tsëchömi rukuskunapis chinan orqu* juntu pärayanqa.
16 Teyta Jehovä qellqatsinqan libruchö ashiyë y fuertipa leyiyë:
manam ni mëqan faltanqatsu
y llapankunam majayoq kayanqa.
Tsënöqa kanqa, kikin Teyta Jehovä mandakushqa kaptin
y poderninwan juntashqa kaptinmi.
17 Kikin Teyta Diosmi mëchö pärayänampaq decidishqa,
y kikin Teyta Diosmi cada ünuta tocanqan sitiutapis midishqa,
y tsë churanqan sitiuchömi imëyaqpis kawayanqa.