Isaïas

39 Tsë witsanmi Babiloniachö gobernaq Baladanpa tsurin Merodac-Baladanqa, Ezequïas qeshyanqampita alliyärinqanta+ musyëkur, Ezequïaspaq cartakunata y qarëkunata apatsirqan.+ 2 Ezequïasqa tsë nunakunata kushishqa chaskirmi, väleq cösaskuna churaränan wayita rikätsirqan.+ Awmi, tsë wayiman churayanqan plätata, öruta, shumaq pukutaq o mushkoq aceitita, mas väleq aceitikunata, imëka armakunata y tsëchö llapan kaqkunatam rikätsirqan. Ezequïasqa kikimpa wayinchö* y gobernanqan nacionchö llapan kanqantam rikätsirqan.

3 Tsë llapan pasakunqanchönam Diospa willakoqnin Isaïasqa, Ezequïasman ëwar kënö tapurqan: “¿Tsë nunakunaqa mëpitataq shayämushqa? ¿Imatataq niyäshurqunki?”. Ezequïasnam, “pëkunaqa karuchö këkaq Babiloniapitam shayämushqa” nirqan.+ 4 Tsënam Isaïasqa tapurqan: “¿Imakunatataq wayikichö rikäyashqa?”. Ezequïasnam, “wayïchö llapan väleq cösasnïkunatam rikätsirqö” nirqan.

5 Tsënam Isaïasqa Ezequïasta nirqan: “Angelkunata mandaq Teyta Jehovä ninqanta wiyë: 6 ‘¡Rikë! Ichikllachönam wayikichö llapan kaqkunata, y unë kastëkikuna llapan juntayanqanta Babiloniaman apakuyanqa, y manam imapis quedanqatsu.+ Tsënö kanampaq kaqtam noqa Jehovä nï.+ 7 Tsënöllam wakin tsurikikunatapis apakuyanqa, y Babiloniachö gobernaqpa palaciunchömi carguyoq kayanqa’”.+

8 Isaïas tsënö niptinnam, Ezequïasqa kënö nirqan: “Llapan nimanqëkiqa Teyta Jehovä alli kaqta ruraq kanqantam rikätsikun”. Y kënöpis nirqanmi: “Tsëqa, wanunqäyaqqa yamë y alli segürum kawakuyäshaq”.+