Jeremïas
21 Malkïaspa tsurin Pasjurta+ y Maasëyapa tsurin sacerdöti Sofonïasta,+ Jeremïasman gobernaq Sedequïas+ mandanqan junaqmi, Teyta Jehoväqa Jeremïasta parlaparqan. Sedequïasqa kënö tapuyänampaqmi Jeremïasman mandarqan: 2 “Babiloniachö gobernaq Nabucodonosormi noqakunawan guërrata ruraq shamuykan.+ Tsëmi ima pasayämänampaq kaqta, Teyta Jehoväta jutïkunachö tapuykullë. Capaz Teyta Jehoväqa noqakunata yanapayämarnï, imëka espantëpaqkunata rurar pëkunata markankunaman kutitsinman”.+
3 Jeremïasnam kënö nirqan: “Gobernaq Sedequïasta kënö niyë: 4 ‘Israel nunakunapa Diosnin Teyta Jehovämi këta nin: “Babiloniachö gobernaqpita+ y entëru markëkikunachö këkaq soldädukunapita defendikuyänëkipaq aptarëkäyanqëki espädakunawan y lanzakunawan ushakätsiyäshunëkitam permitishaq. Y kë markapa chowpinmanmi* juntayashqëki.* 5 Qamkunawan cölerakurmi, awmi qamkunawan alläpa cölerakurmi,+ kallpayoq y puëdeq rikräwan qamkunawan pelyashaq.+ 6 Y kë markachö nunakunata y animalkunatam ushakätsishaq. Awmi, alläpa feyu qeshyawanmi llapankunata wanutsishaq”’.+
7 ‘Teyta Jehoväqa kënöpis ninmi: “Tsëpitanam Judächö gobernaq Sedequïasta, sirweqninkunata, kë markachö nunakunata, espädawan mana wanutsiyanqankunata, qeshyawan y mallaqëpita mana wanoqkunata, Babiloniachö gobernaq Nabucodonosorpa makinman y chikeqninkunapa y wanutsita munaqkunapa makinman entregashaq.+ Y Babiloniachö gobernaqqa, manam pëkunata llakipanqatsu.* Awmi, mana llakipar mana ankuparmi llapankunata espädawan ushakätsinqa”’.+
8 Kë markachö nunakunata kënö nï: ‘Teyta Jehovämi këta nin: “Kananmi qamkunata nikä, imata rurar kawayänëkipaq kaqta y imata rurar wanuyänëkipaq kaqta. Qamkunam imata rurayänëkipaqpis akrayänëki. 9 Kë markachö quedakoqkunataqa espädawanmi wanutsiyäshunki, y mallaqëpita y qeshyawanmi wanuyanki. Peru markëkikunapita yarqurnin entëru markëkikunachö këkaq Caldëapita soldädukunaman entregakurqa, kawarmi sïguiyanki, y wanur ushakäyänëkipitam salvakuyanki”’.+
10 ‘Teyta Jehoväqa këtapis ninmi: “Kë markachö nunakunaman allikunata apamunäpa rantin, imëka mana allikunata apamunäpaqmi decidirqö.+ Y Babiloniachö gobernaqpa+ makinmanmi entregashaq, y pëqa ninawanmi ushakätsinqa”.+
11 Judächö gobernaqpa wayinchö kaqkuna, Teyta Jehovä ninqanta wiyayë. 12 Davidpa kastankuna, Teyta Jehoväqa këtam nin:
“Qamkuna mana allikunata rurayaptikiqa,+
qamkunawanmi alläpa cölerakushaq.
Cöleräqa ninanömi kanqa,+ y manam ni pï nunapis upitsita* puëdinqatsu.
Tsëmi cada junaq alli kaqta rurayë, y engañakoqkuna mana engañayänampaq
nuna mayikikunata yanapayë”’.+
13 ‘Pampachö* kawaq nunakuna, awmi, jatun qaqa jananchö wayiyoq nunakuna,
qamkunamanmi imëka mana allikunata chätsimushaq’ nïmi noqa Jehovä.
‘Qamkunaqa, “¿piraq noqantsikwan pelyaq urämunqa?
¿Piraq wayintsikman yëkamunqa?” niyankim.
14 Rurayanqëkimannömi qamkunata castigayashqëki.+
Montikikunata y lädunkunachö kaqkunatapis,
ninawanmi ushakätsishaq’+
nïmi noqa Jehovä”.