Ezequiel
29 Chunka watachömi, chunka killapa döci kaq junaqninchö Teyta Jehovä parlapämarqan. Kënömi nimarqan: 2 “Nunapa tsurin, kananqa Egiptu nacionman rikëkur Egiptuchö gobernaqta+ y llapan egipciu nunakunata ima pasanampaq kaqta willakuy. 3 Kënömi ninëki: ‘Këtam Llapanta Gobernaq Teyta Jehovä nishunki:
Qammi nirqunki: ‘Nïlu mayuqa kikïpam.
Kikïpaqmi rurakurqö’.+
4 Shimikimanmi ganchuta churamushaq, y Nïlu mayuchö* këkaq pescädukunatam escämëkiman laqakätsimushaq.
Tsëpitanam escämëkiman laqakämushqa pescädutawan juntu Nïlu mayupita sutamushqëki.
5 Wakin pescädukunatawan juntum tsunyaq sitiuman apëkur dejarishqëki.
Tsëchömi tsaki patsachö jitaranki y manam ni pï ëllushunkitsu o qorishunkitsu.+
Tsëchö jitarëkaptikim chukaru animalkuna y volaq* animalkuna mikuyäshunki.+
6 Tsëmi egipciu nunakuna musyariyanqa noqa Jehovä kanqäta.
Qamkunaqa israelïtakunata yanaparpis, tsakishqa turukpanömi ni imapaq sirwiyarqëkitsu.+
7 Yanapanëkita munar makipita aptarkuyäshuptikipis pakirirqëkim,
y ishkirmi rikrankunata sutarapurqëki.
Yanapanëkita munar tsarapakarkayämuptimpis pakiskirqëkim y
pësu ishkirmi chakinkunata malograrirqëki”.+
8 Tsëmi Llapanta Gobernaq Teyta Jehovä kënö nishunki: “Kananmi qamta ushakätsishqëki, y llapan nunakunata y animalkunatapis espädawanmi ushakätsishaq.+ 9 Egiptuqa tsunyëkar y imannaqmi quedanqa.+ Y pëkunaqa musyariyanqam noqa Jehovä kanqäta. Tsënöqa pasashunki, ‘Nïlu mayuqa* kikïpam. Kikïmi rurakurqö’+ ninqëkipitam. 10 Tsëmi kananqa qampa contrëki y Nïlupa contran churakarqö. Egiptutaqa pasëpa* tsakitam tsunyaq sitiutanö dejarishaq.+ Tsënömi dejashaq Migdolpita+ qallëkur hasta Siëniyaq+ y Etiopïa lindëruyaq. 11 Manam tsëpaqa nunapis ni animalpis pasanqatsu.+ Cuarenta watapam tsëchöqa ni pï kawanqatsu. 12 Egiptutaqa tsunyaq sitiupitapis mas peortam imannaqta dejarishaq. Llapan markankunachöpis manam ni ima kanqatsu. Tsënömi cuarenta watapa kanqa.+ Y egipciu nunakunataqa mëtsë nacionkunamanmi qarqushaq”.+
13 Llapanta Gobernaq Teyta Jehovämi kënö nishqa: “Cuarenta wata pasariptinnam, egipciukunataqa mëtsë markakunapita kutitsimushaq.+ 14 Punta markankunamanmi, Patros markaman kutitsimushaq.+ Tsëchömi gobernantiyoq kayanqa, peru waktsallam kayanqa. 15 Egiptuqa wakin nacionkunapita mas dëbil karmi, wakin nacionkunataqa dominanqanatsu.+ Taksha nacion karmi, wakin nacionkunataqa poderninchö katsita puëdinqanatsu.+ 16 Israel nunakunaqa, manam egipciu nunakunaman yanapananta munar puntatanö confiakuyanqanatsu.+ Egipciu nunakunaman confiakuyanqanta yarparqa, penqakuyanqam. Y pëkunaqa musyariyanqam Llapanta Gobernaq Jehovä noqa kanqäta”’”.
17 Veintisiëti watachömi, punta kaq killapa punta junaqninchö, Teyta Jehovä parlapämarqan, y kënömi nimarqan: 18 “Nunapa tsurin, Babiloniachö gobernaq Nabucodonosormi*+ soldädunkunawan ëwarqan Tïru+ markata ushakätsinampaq. Tsëman ëwayanqanchömi qala putu quedayarqan y hombrunkunapis pasëpa* shoqpir ushashqam quedarqan. Peru Tïru markata atacayanqampitaqa, manam kikin Nabucodonosor ni soldädunkunapis päguta chaskiyarqantsu.
19 Tsëmi Llapanta Gobernaq Teyta Jehoväqa kënö nin: ‘Tsëmi kananqa, Babiloniachö gobernaq Nabucodonosorpa*+ makinman Egiptuta entreguëkushaq. Pëmi egipciu nunakunapa llapan riquëzankunata apakunqa. Tsëmi soldädunkunapa pägun kanqa’.
20 ‘Egiptu markatam entreguëkushaq. Tsëmi pägun kanqa, noqa mandaptï Tïru markata ushakätsinqampita’.+ Tsënömi nin Llapanta Gobernaq Teyta Jehovä.
21 Tsë junaqmi Israel nunakunaman churashaq juk puëdeq nunata.*+ Tsëmanmi qamtapis churashqëki pëkunata parlapänëkipaq, y pëkunaqa musyariyanqam noqa Jehovä kanqäta”.