Ezequiel

48 “Norti kaq lädupita qallëkurmi, Israelchö cada kastapa jutin y lindërunqa kënö kanqa: Danpa+ kastankunapa lindërunqa Hetlon nänipam ëwanqa y Lebö-Hamatpa*+ pasarmi hasta Hazar-Enanyaq chanqa. Tsënömi ëwanqa norti lädunchö këkaq Damascupa lindërumpa hasta Hamat+ läduyaq. Tsëmi inti o rupay yarqamunan lädupita hasta jeqanan läduyaq lindërun kanqa. 2 Aserpa+ kastankunapa lindërunqa, Danpa kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 3 Neftalïpa+ kastankunapa lindërunqa, Aserpa kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 4 Manasespa+ kastankunapa lindërunqa, Neftalïpa kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 5 Efrainpa kastankunapa lindërunqa, Manasespa+ kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 6 Rubenpa kastankunapa lindërunqa, Efrainpa+ kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 7 Judäpa kastankunapa lindërunqa, Rubenpa+ kastankunapa lindërunwanmi tinkunqa, inti o rupay yarqamunan lädupita hasta jeqanan läduyaq. 8 Y Judäpa kastankunapa juknin läduchö lindërunkunapita qallëkurmi, sagrädu kanampaq rakiyänëki. Largunqa wakin kastakunapanöllam kanqa, inti o rupay yarqamunan lädupita hasta jeqanan läduyaq. Peru anchunqa döci mil novecientus cincuenta metrusmi* kanqa.+ Tsë rakiyanqëki sagrädu sitiupa pullanninchömi templu kanqa.

9 Noqa Jehoväpaq rakiyanqëki chakrapa largunqa döci mil novecientus cincuenta metrusmi* kanan y anchunnam cincu mil cientu ochenta metrus* kanan. 10 Sacerdötikunapaq rakiyanqëki chakraqa+ medinan norti kaq lädupam döci mil novecientus cincuenta,* inti o rupay jeqanan lädupam cincu mil cientu ochenta,* inti yarqamunan lädupam cincu mil cientu ochenta y sur kaq lädupanam döci mil novecientus cincuenta. Y noqa Jehoväpa templüqa tsë chakra pullanchömi kanan. 11 Tsë chakraqa Sadocpa+ tsurin sacerdötikunapaqmi kanqa. Pëkunaqa llapan mandanqätam cumpliyarqan y manam israelïtakunanötsu ni levïtakunanötsu mana cäsumar mana allikunata rurayarqan. Tsëmi pëkunaqa limpiu kayan.+ 12 Sagrädu kanampaq rakiyanqëki chakrapitaqa, pëkunapaqmi juk parti kanqa. Y levïtakunapa lindërunwanmi qaqaranqa.

13 Sacerdötikunapa chakran lädunchönam, levïtakunapa chakrankuna kanqa. Tsë chakrapa largunqa döci mil novecientus cincuenta metrusmi* kanqa y anchunnam cincu mil cientu ochenta metrus* kanqa. Largunmi döci mil novecientus cincuenta metrus kanqa y anchunnam cincu mil cientu ochenta metrus kanqa. 14 Tsë chakraqa noqa Jehoväpam, tsëmi sagrädu y mas alli kaq chakra. Tsëmi pitapis rantikuyänantsu ni piwampis cambiayänantsu ni pitapis pasëkuyänantsu.

15 Sobraq kaq chakranam, markachö täkoqkuna* utilizäyänampaq kanqa.+ Tsë chakrapa anchunqa dos mil quinientus noventa metrusmi* kanqa, largunnam döci mil novecientus cincuenta metrus* kanqa. Tsëqa kanqa wayikunata rurayänampaq y qewapaqmi. Y markanam, tsë chakrapa pullanninchö kanqa.+ 16 Markapa tamäñunqa kënömi kanqa: norti kaq lädupam, dos mil trescientus treinta y un metrus* medinqa; sur kaq lädupam, dos mil trescientus treinta y un metrus medinqa; inti o rupay yarqamunan lädupam, dos mil trescientus treinta y un metrus medinqa; y inti o rupay jeqanan lädupam, dos mil trescientus treinta y un metrus medinqa. 17 Marka lädunchö qewapaq chakrapa tamäñunqa kënömi kanqa: norti kaq lädupam, cientu treinta metrus* medinqa; sur kaq lädupam, cientu treinta metrus medinqa; inti o rupay yarqamunan lädupanam, cientu treinta metrus medinqa; y inti jeqanan lädupanam, cientu treinta metrus medinqa.

18 Y markapa ishkan lädunchö këkaq chakrakunapa tamäñunqa kënömi kanqa:+ inti o rupay yarqamunan läduchö këkaq chakrapa largunqa, cincu mil cientu ochenta metrusmi* kanqa; y inti jeqanan läduchö këkaq chakrapa largunqa, cincu mil cientu ochenta metrusmi kanqa. Tsë chakrakunaqa sagrädu chakrapa lädunchömi këkan. Tsë chakrakuna wayunqantam markachö trabajaqkunaqa mikuyanqa. 19 Tsë chakrataqa muruyanqa markachö trabajaqkunam. Tsë nunakunaqa kayanqa, Israelchö llapan kastakunam.+

20 Sagrädu kanampaq rakiyanqëki chakraqa cuadrädum kanqa. Largumpis y anchumpis döci mil novecientus cincuenta metrusmi* kanqa. Tsëtaqa rakiyänëki marka kanampaq kaq chakratawan juntum.

21 Sagrädu chakrapa ishkan lädunchö y marka kanampaq kaq chakrapa ishkan lädunchö chakrakunaqa, mandakoqpaqmi kanqa.+ Tsë chakraqa inti o rupay yarqamunan lädupapis y jeqanan lädupapis döci mil novecientus cincuenta metrus* lindëruwanmi qaqaranqa. Sagrädu kaq chakrawan y marka kanampaq kaq chakrawanmi qaqaranqa. Tsëmi mandakoqpaq kanqa. Sagrädu kaq chakra y templuqa tsë ishkan chakrakunapa chowpinchömi* kanqa.

22 Mandakoqpa chakran ishkan läduchö kaptinmi, levïtakunapa chakran y marka kanampaq chakraqa chowpinchöna* quedarinqa. Mandakoqpa chakrampa lindërunqa, Judäpa+ lindërunwan y Benjaminpa lindërunwanmi tinkunqa.

23 Wakin kastakunapa lindërunqa kënömi kanqa: Benjaminpa kastankunapa lindërunqa inti o rupay yarqamunan lädupita hasta jeqanan läduyaqmi kanqa.+ 24 Simeonpa kastankunapa lindërunnam Benjaminpa+ kastankunapa lindërunwan tinkunqa, inti o rupay yarqamunan lädupita hasta jeqanan läduyaq. 25 Isacarpa+ kastankunapa lindërunnam Simeonpa kastankunapa lindërunwan tinkunqa, inti o rupay yarqamunan lädupita hasta jeqanan läduyaq. 26 Zabulonpa kastankunapa lindërunnam Isacarpa+ kastankunapa lindërunwan tinkunqa, inti o rupay yarqamunan lädupita hasta jeqanan läduyaq.+ 27 Gadpa kastankunapa lindërunnam Zabulonpa+ kastankunapa lindërunwan tinkunqa, inti o rupay yarqamunan lädupita hasta jeqanan läduyaq. 28 Gadpa kastankunapa sur kaq lädupa lindërunqa, Tamarpita+ qallëkurmi yaku kanan Meribat-Cadesyaq+ chanqa. Tsëpitanam pasanqa Egiptu läduchö pampapa+ y Jatun lamarmanmi* chanqa.

29 Tsënömi Israel kastakunata herenciankuna entregayänëki+ y tsëkunam cada ünupa herenciankuna kanqa”+ ninmi Llapanta Gobernaq Teyta Jehovä.

30 “Markapa yarqunankunaqa kënömi kanqa. Norti kaq lädupam dos mil trescientus treinta y un metrus* medinqa.+

31 Punkukunaqa Israelchö kastakunapa jutintam apanqa: norti kaq läduchömi kima punkukuna kanqa. Juk kaqmi kanqa Rubenpaq, juk kaqmi kanqa Judäpaq y juk kaqnam kanqa Levïpaq.

32 Inti o rupay yarqamunan lädupa yarquyänannam, dos mil trescientus treinta y un metrus* medinqa. Tsëchöpis kima punkukunam kanqa. Juk kaqmi kanqa Josëpaq, juk kaqnam kanqa Benjaminpaq y juk kaqnam kanqa Danpaq.

33 Sur kaq lädupa yarquyänannam, dos mil trescientus treinta y un metrus* kanqa. Tsëchöpis kima punkukunam kanqa. Juk kaq punkum Simeonpaq kanqa, juk kaq punkum Isacarpaq kanqa y juk kaq punkunam Zabulonpaq kanqa.

34 Inti o rupay jeqanan lädumampa këkaq yarquyänannam, dos mil trescientus treinta y un metrus* kanqa. Tsëchöpis kima punkukunam kanqa. Juk kaq punkum Gadpaq kanqa, y juk kaq punkunam Aserpaq kanqa y juk kaqnam Neftalïpaq kanqa.

35 Tsë markata entëru lädumpa mediptinmi, nuëvi mil trescientus veinticuatru metrus* medinqa. Tsë junaqpita witsëpam, tsë markapa jutinqa kanqa: Jehovämi Tsëchö Këkan”.+