Ezequiel
47 Tsëpitanam yapë apamarqan templupa punkunman.+ Tsëchömi rikarqä templupa punkun jawampa* yaku yarqëkämoqta. Templupa punkunqa, inti o rupay yarqamunan lädumanmi rikararqan.+ Tsëmi tsë yakuqa, inti yarqamunan läduman ëwarqan. Tsë yakuqa templupa derëcha kaq lädupam yarqamurqan, altarpa sur kaq lädumpa.
2 Tsëpitanam norti kaq punkupa yarqatsimarqan,+ y yarquskirnam tumayarqä inti o rupay yarqamunan lädumampa këkaq punkuyaq.+ Tsëman chärirnam, derëcha kaq lädupa wallkalla yaku yarqëkämoqta rikarqä.
3 Tsëpitanam tsë nunaqa inti o rupay yarqamunan lädu kaqpa ëwar, cordelninwan quinientus dieciöchu metrusta* medirqan.+ Tsëpitanam yakuta pasanäpaq nimarqan. Y pasaptïqa, utsuputüyaqmi yaku charqan.
4 Tsëpitanam këkanqäpita uraman, quinientus diez metrusta* medirqan, y pasanäpaqmi nimarqan. Pasaptïqa qonqurnïyaq o qonqüyaqmi charqan.
Tsëpitanam këkanqäpita mas uramanna yapë quinientus diez metrusta medirqan, y pasanäpaq nimaptinmi pasarqä, y yakuqa tseqlläyaqnam charqan.
5 Tsëpitanam, këkanqäpita uraman quinientus diez metrusta* medirqan, y yakuqa mayunönam* karqan. Manam chakipaqa pasëta puëdirqänatsu. Tsëmi mëtsika kaptin nadar qallëkurqä.
6 Tsënam kënö nimarqan: “Nunapa tsurin, ¿rikëkankiku?”.
Tsënö niramarmi, mayu* kuchunman kutitsimarqan. 7 Chärirqa, mayupa* ishkan kuchunchömi plantakunata rikarqä.+ 8 Tsëpitanam kënö nimarqan: “Kë yakuqa inti o rupay yarqamunan lädupa ëwarmi, Arabä urëpa pasar lamarman chanqa.+ Lamarman chäriptinqa,+ lamar yakuqa alli yakunam tikranqa. 9 Tsë yaku ëwanqan kaqpaqa, tukuyläya animalkunam kawayanqa. Pescädupis mëtsikam kanqa. Hasta lamar yakupis, alli yakumanmi tikranqa. Tsë mayu* pasanqan kaqpaqqa, llapanmi kawanqa.
10 Tsë lamarchöqa, Jatun lamarchönömi* tukuyläya pescädukuna mëtsika kanqa. Tsëmi pescäduta tsareqkunaqa* tsë lamar kuchunchö, En-Guedïpita qallëkur En-Egläimyaq kayanqa.+ Tsë kinrëkunachömi pescäduta tsariyänan mällankunata majayanqa.+
11 Peru tsë lamar lädunchö oqu sitiukuna y qochakunaqa manam alliyanqatsu, kachiyoqllam kanqa.+
12 Mayupa* ishkan kuchunchömi frütata wayoq tukuyläya plantakuna kanqa. Tsë plantakunapa rapranqa manam tsakinqatsu ni manam frütampis ushakanqatsu. Templupita yarqoq yaku kuchunchö karmi, tsë plantakunaqa cada killa wayunqa.+ Frütanqa mikuyänampaqmi kanqa y raprannam jampi kanqa”.+
13 Llapanta Gobernaq Teyta Jehovämi kënö nin: “Israelchö döci kastakunata herenciankuna entregayänëkipaq kaq markakunaqa këkunam kanqa: Josëtaqa ishkë herenciatam entregayänëki.+ 14 Tsë herenciaqa qamkunapam kanqa y igualmi chaskiyanki. Unë kastëkikunatam änirqä kë markakunata entreganäpaq.+ Tsëmi kananqa qamkuna chaskiyanki.
15 Chaskiyanqëki herenciapa lindërunqa, norti kaq lädupaqa Jatun lamarpitam qallanqa. Tsëpitam Hetlon+ nänipa ëwar chanqa Zedadman,+ 16 Hamatman,+ Berotäman+ y Sibräimman. Sibräimqa Damascupa y Hamatpa amänunchömi këkan. Tsëpitanam Hauranpa+ lindërunchö këkaq Hazer-Haticonyaq chanqa. 17 Tsënömi lindërunqa, lamarpita qallëkur hasta Hazar-Enonyaq chanqa.+ Tsëpa ëwarmi Damascupa norti kaq läduchö këkaq lindërumpa y Hamatpa lindërumpa ëwanqa.+ Tsëmi norti kaq lädupa herenciëkikunapa lindërunqa kanqa.
18 Inti o rupay yarqamunan lädupa kaq lindërunam, Hauranpa y Damascupa pasar Jordan mayu* kuchumpa ëwanqa. Tsëqa kanqa Galaadwan+ Israel qaqaraqchömi. Norti kaq läduchö lindëru ushaqpita qallëkur, mediyë hasta inti yarqamunan läduchö lamaryaq.* Tsëmi rupay yarqamunan lädupa lindërunqa.
19 Sur kaq lädupa lindërunnam Tamarpita qallëkur yaku kanan Meribat-Cadesyaq chanqa.+ Tsëpitanam pasanqa Egiptu läduchö pampapa, y Jatun lamarmanmi chanqa.+ Tsëmi sur kaq lädupa lindërunqa kanqa.
20 Inti o rupay jeqanan lädu lindërunnam Jatun lamar kanqa, sur kaq lindëru usharinqampita hasta Lebö-Hamatpa* tsimpanyaq.+ Tsëmi inti o rupay jeqanan lädupa lindërunqa kanqa”.
21 “Tsë entërutam rakipänakuyänëki. Israelchö döci kastakunatam rakipuyänëki. 22 Tsë herenciata llapëki rakipänakuyë. Qamkunawan kawaq forastëru nunakunatapis y qamkunawanna kawëkäyaptin yurikoq tsurinkunatapis rakipuyë. Tsë tsurinkunaqa qamkunanömi israelïtana kayan. Tsëmi pëkunapis qamkunawan juntu Israelpa döci kastankunawan juntu herenciata chaskiyänan. 23 Forastëru nunataqa, herencian entregayänëki Israelchö mëqan kastawampis täkunqan* sitiuchömi” ninmi Llapanta Gobernaq Teyta Jehovä.