Cantar de los Cantäres
4 Mitsikoq jövinmi kënö nin:
“¡Alläpa shumaq shipashmi kanki! ¡Alläpam kuyaq!*
¡Imëyaqpis kuyakuy munëmi kanki!
Nawikipis vëluyki rurinchö, palumapa nawinnöran alläpa shumaq këkan.
Aqtsëkipis alläpa shumaqmi, Galaad jirkakunapita urämoq mëtsika cabrakunanöran.+
2 Kiruykipis tsëllaraq rutushqa üshanö
y bañatsishqa atska üshanömi shumaq yuraqaräkun.
Llapampis parëjum
y manam jukllëllapis pishintsu.
3 Shimikipis chipapaq puka hïlunöran shumaq.
Parlanqëkita wiyëqa alläpam gustëkaman.
Vëluyki rurinchö cärëkipis
ishkëman partishqa granädanöran këkan.
Tsëchömi mil escüdukuna warkuran,
guërrachö alli pelyëta yachaq puëdeq soldädukunapa redondu escüdunkuna.+
5 Y chichikinam* luychupa*+ ishkë wawankunanöraq,
liriu wëtakuna rurinchö mikuykaq luychupa millish wawankunanö”.
6 Sulamïta shipashmi kënö nin:
“Manaraq alalaptin y wänipis o llantuypis manaraq pasaptinmi,
mïrra kanqan jirkaman y olïbanu kanqan taksha jirkaman ëwashaq”.+
7 Mitsikoq jövinnam kënö nin: “¡Alläpa shumaqmi kanki! ¡Alläpam qamta kuyaq!*+
Chaki puntëkipita peqa o uma puntëkiyaqmi kuyakuyllapaq kanki.*
8 Kuyë noviallä, aku ishkantsik Lïbanupita ëwakushun.
Lïbanuchö këkanqantsikpita juntu ëwakushun.+
Leonkunapa machënimpita
y leopardukuna kayanqan jirkapita urämuy.
9 Kuyë noviallä, shonqütam suwarqunki+ alläpam kuyaq.*
Juk wallqëkillatapis rikäriptï
y shumaq nawikiwan rikäramaptikiqa shonqupis nanarinmi.
10 ¡Kuyë noviallä! ¡Alläpam qamta kuyaq!* ¡Kuyamanqëkiqa alläpa shumaqmi!+
¡Kuyamanqëkiqa vïnupitapis masmi gustaman!+
¡Perfümikiqa imëka pukutaqpitapis o mushkoqpitapis mas shumaqmi!+
11 Kuyë noviallä, shimikiqa panalpita shutuykaq mielnöran.+
Qalluyki jawanchöqa* lichi y mielmi kan.+
Vestiduykipis Lïbanuchö montikunanöran shumaq pukutan o mushkun.
12 Kuyë novialläqa alli cercashqa huertanö,
alli segurashqa huertanö y alli tsapashqa pözunömi.
13 Qamqa kanki, huertachö shumaq tseqllikaq* plantanö y alli frütata wayoq granäda plantakunanömi.
Tsë huertachöqa pukutaq o mushkoq plantakunam kan. Kanmi nardupis, alhëñapis,
y olïbanu plantakunapis.
Shumaq pukutaq o mushkoq mas plantakunapis kanmi.+
15 Qamqa kanki huerta rurinchö këkaq shumaq qochanömi,
pözu rurinchö këkaq mishkeq yakunö,
y Lïbanupita urämoq yakunö.+
16 Ura lädupa shamoq vientu, uma lädupa shamoq vientu,
huertäta shumaqlla vientupë,
pukutanqan o mushkunqan mëtsëman chänampaq”.
Sulamïta shipashmi kënö nin:
“Kuyanqä jövin huertanman yëkuykur mas alli kaq frütakunata mikutsun”.