1 Crönicas

15 David Markachömi gobernanti Davidqa wayikunata ruratsirqan, y Diospa*+ Sagrädu Cäjan churaränampaqpis carpa* wayitam ruratsirqan. 2 Tsëpitanam David nirqan: “Jehovä Diosqa levïtakunallatam akrashqa Sagrädu Cäjanta apayänampaq y Jehoväta sirwiyänampaq. Tsëmi kanampis levïtakunalla apayänan”.+ 3 Tsënö nirmi Davidqa, llapan israelïtakunata Jerusalen markaman qayatsirqan ruratsinqan+ carpa* wayiman Jehoväpa Sagrädu Cäjanta apayänampaq.

4 Davidqa Levïpa kastankunata+ y Aaronpa kastankunatam+ qayatsirqan. 5 Tsë ëwaqkunaqa këkunam kayarqan: Cohatpa kastankunam ëwayarqan cientu veinti y Urielmi dirigentinkuna karqan; 6 Merarïpa kastankunam ëwayarqan doscientus veinti y Asäyam+ dirigentinkuna karqan; 7 Guersompa kastankunam ëwayarqan cientu treinta y Joelmi+ dirigentinkuna karqan. 8 Elizafanpa kastankunam+ ëwayarqan doscientus y Semäyam dirigentinkuna karqan. 9 Hebronpa kastankunam ëwayarqan ochenta y Elielmi dirigentinkuna karqan. 10 Uzielpa kastankunam+ ëwayarqan cientu döci y Aminadabmi dirigentinkuna karqan. 11 Tsënöllam Davidqa, sacerdöti Sadocta+ y Abiatarta,+ y levïtakuna Urielta, Asäyata, Joelta, Semäyata, Elielta y Aminadabta qayëkatsir 12 kënö nirqan: “Levïpa kastankunachöqa qamkunam dirigentikuna kayanki, tsëmi ruratsinqä sitiuman Israelpa Diosnin Jehoväpa Sagrädu Cäjanta apayämunëkipaq qamkuna y kastëkikuna alistakuyänëki.* 13 Pasaqchö Sagrädu Cäjata apamurqa manam Teyta Dios munanqannötsu rurarqantsik,+ tsëmi qamkuna mana apayämunqëkipita Jehovä Dios llapantsikwan cölerakurqan”.+ 14 David tsënö niptinmi sacerdötikuna y levïtakuna Israelpa Diosnin Jehoväpa Sagrädu Cäjanta apayämunampaq alistakuyarqan.*

15 Tsëpitanam levïtakunaqa Diospa Sagrädu Cäjanta largu listonkunawan+ umbrurkur apayarqan. Tsënöqa apayarqan Jehovä Dios Moisesta mandakunqannömi. 16 Davidmi Levïpa kastankunachö dirigentikunata nirqan wakin kastankuna cantayänampaq. Tsëmi pëkunaqa cantaqkunata mandayarqan cuerdayoq instrumentukunata, arpakunata+ y platïllukunata+ tocayaptin kushishqa cantayänampaq.

17 Levïpa kastankunaqa, Joelpa tsurin Hemanta,+ Berekïaspa tsurin Asafta+ y Merarïpa kastan Cusayäpa tsurin Etantam+ cantayänampaq churayarqan. 18 Y juk kaq grüpuchönam kayarqan+ Zacarïas, Ben, Jaaziel, Semiramot, Jehiel, Unï, Eliab, Benäya, Maasëya, Matitïas, Elifelehu, Micneyä, y punkuchö täpakoqkuna Obed-Edomwan Jeiel. 19 Cobripita platïllukunata+ tocayänampaqnam churayarqan cantaqkuna Hemanta,+ Asafta+ y Etanta. 20 Y cuerdayoq instrumentukunata alamot*+ nötachö tocayänampaqnam niyarqan Zacarïasta, Azielta, Semiramot-ta, Jehielta, Unïta, Eliabta, Maasëyata y Benäyata. 21 Seminit*+ niyanqan nötachö tocar dirigiyänampaqnam churayarqan Matitïasta,+ Elifelehuta, Micneyäta, Obed-Edomta, Jeielta y Azazïasta. 22 Levïpa kastankunachö dirigenti Kenanïasmi+ Sagrädu Cäjata imanö apayänampaq yachatseq. 23 Berekïaswan Elcanämi Sagrädu Cäjata cuidayaq. 24 Diospa Sagrädu Cäjampa+ puntanchö trompëtata tocaq sacerdötikunanam kayarqan Sebanïas, Josafat, Netanel, Amasäi, Zacarïas, Benäya y Eliezer. Obed-Edomwan Jehïasnam Sagrädu Cäjata cuidaqkuna kayarqan.

25 David, Israelchö dirigeqkuna y mil soldädukunapa mandaqninkunapis kushishqam Obed-Edompa+ wayinta ëwayarqan Jehovä Diospa Sagrädu Cäjanta apayämunampaq. 26 Sagrädu Cäjata apayänampaq Teyta Dios yanapaptinmi, kushikur qanchis mallwa törukunata y qanchis carnërukunata pishtëkur Jehoväpaq rupatsiyarqan.+ 27 Diospa Sagrädu Cäjanta apaq levïtakunanö, cantaqkunanö y apaqkunapa y cantaqkunapa dirigeq Kenanïasnömi Davidqa, alli kaq tëlapita rurashqa mangannaq röpan vistishqa këkarqan. Tsënöllam sagrädu mandilnin vistikushqa këkarqan.+ 28 Waqrapita rurashqa trompëtata,+ wakin trompëtakunata, platïllukunata, cuerdayoq instrumentukunata y arpakunata+ fuertipa tocarëkarmi llapan israelïtakuna kushishqa büllata+ rurar Jehovä Diospa Sagrädu Cäjanta apayarqan.

29 Peru Jehoväpa Sagrädu Cäjanta David Markaman+ chäratsiyaptinmi, Saulpa tsurin+ Micalqa ventänapa rikëkurqan gobernanti David Teyta Diosta alabar kushishqa tushur y saltar ëwëkaqta, tsëmi shonqunllachö despreciarqan.*+