Ezequiel

7 Teyta Jehoväqa yapëmi parlapämarqan, y kënömi nimarqan: 2 “Nunapa tsurin, Llapanta Gobernaq Teyta Jehovämi Israel markata kënö nin: ‘Ushakëmi chäramushqa. Chuskun lädupam kë markapa ushakënin chäramushqa. 3 Kananmi sïqa ushakanki. Kananqa cölerarmi castigashqëki. Mana alli portakunqëkipitam juzgashqëki y imëka mana allikunata ruranqëkipitam cuentata mañashqëki. 4 Manam llakipashqëkitsu,* ni manam ichikllapis qampaq yarpachakushaqtsu.+ Mana alli portakunqëkipitam castigashqëki, y imëka mana allikunata ruranqëkipitam sufrinki.+ Qamkunaqa musyariyankim noqa Jehovä kanqäta’.+

5 Llapanta Gobernaq Teyta Jehovämi kënö nin: ‘Rikë, alläpa sufrimientum kanqa. Tsë sufrimientunöqa manam imëpis kanqatsu.+ 6 Ushakëqa chëkämunnam. Ushakätsishunëkipaqmi, ushakëqa chäramunqana. Rikë, shamuykannam. 7 Markachö këkaqkuna, kananqa qamkunanam ushakäyanki.* Ushakäyänëki junaqqa chëkämunnam, hörëkikunaqa chëkämunnam.+ Jirkakunachöpis kushishqa qayëkachäyänampa rantinmi mantsakashqana këkäyan.

8 Ichik tiempullachönam mana llakipëpa* castigashqëki.+ Kananqa cölerarmi castigashqëki.+ Mana alli portakunqëkipitam juzgashqëki, y imëka mana allikunata ruranqëkipitam cuentata mañashqëki. 9 Manam llakipashqëkitsu* ni manam ichikllapis qampaq yarpachakushaqtsu.+ Mana alli portakunqëkipitam castigashqëki y imëka mana allikunata ruranqëkipitam sufrinki. Y musyariyankim noqa Jehovä qamkunata castiguëkanqäta.*+

10 Rikë, tsë junaqqa chëkämunnam. Rikë, shamuykannam.+ Kananqa qammi castigashqa kanki.* Castiganaqpaq tukruqa listunam këkan. Chikiyämaqkunaqa alläpa orgullösum tikrayashqa. 11 Imëka mana allikunata rurayanqampitam tukruwan castigashaq, manam pëkunaqa salvakuyanqatsu.+ Mëtsika karpis ushakäyanqam y riquëzankunapis y reqishqa këninkunapis ushakanqam. 12 Tsë junaqqa chäramunqanam. Tsë höraqa chäramunqanam. Llapankunatam cölerarnin castigashaq. Tsëmi ranteq kaqqa ama kushikutsuntsu, ni rantikoq kaqpis ama llakikutsuntsu.*+ 13 Revelar willakunqäqa llapankunapaqmi. Tsëmi rantikoq kaqqa, kawëkar quedarpis, tsë rantikunqanta kutitsikuyta puëdinqatsu. Llapankunam ushakäyanqa. Jutsata* rurayanqampitaqa llapankunam wanuyanqa.

14 Tsë llapan nunakunawanmi cölerashqa këkä.+ Tsëmi guërraman ëwayänampaq listu këkarpis y trompëtata tocayaptimpis+ ni pï ëwantsu. 15 Markapita waqtamanqa espädam këkan+ y marka rurinchönam raslla o saslla wanutsikoq qeshya y mallaqë këkan. Markapita waqtaman këkaqkunataqa espädawanmi wanutsiyanqa y marka rurinchö këkaqkunanam mallaqëwan y raslla o saslla wanutsikoq qeshyawan wanuyanqa.+ 16 Tsëpita salvakoq kaqkunaqa pampakunachö palumanömi jirkakunapa qeshpir ëwakuyanqa. Jutsata* rurayanqampitaqa alläpam llakikuyanqa.+ 17 Rikrankunapapis manam kallpan kanqanatsu y mantsakarmi ishpapakur ushayanqa.+ 18 Llakikurmi chukru tëlakunata churakuyanqa+ y mantsakarmi pasëpa* karkaryäyanqa.+ Llapankunam penqakuyanqa y llakikurmi umankunatapis o peqankunatapis qala pututa rutuyanqa.

19 Pläta qellëninkunatapis cällikunamanmi jichar ushayanqa y örunkunatapis melanäyanqam. Teyta Jehovä castiganqan junaqqa manam pläta qellëninkuna ni örunkunapis salvanqatsu.+ Manam kushishqatsu kayanqa y pachankunapis manam juntanqatsu. Pëkunaqa pläta qellëninkuna kaptin y örunkuna kaptinmi jutsa* rurëman chäyashqa. 20 Shumaq adornukunayoq karmi gälakuyarqan y tsë adornukunawanmi melanëpaq santukunata rurayarqan.+ Tsëta rurayanqampitam pläta metalninkunata y örunkunatapis melanäyanqa. 21 Tsëkunataqa juk nacion nunakunatam entregashaq, y premiutanömi mana alli nunakunata entregashaq. Pëkunaqa manam respetayanqatsu, munayanqantam rurayanqa.

22 Pëkunapitam rakikäkurishaq,+ tsëmi contran këkaq nunakunaqa sagrädu sitiüman* mana respetëpa yëkuyanqa. Ladronkunam yëkuyanqa y manam respetayanqatsu.+

23 Markachöqa manam justicia kantsu,+ wanutsinakurlla y maqanakurllam kawakuyan.+ Tsëmi prësu apakuyänampaq cadënakunata alistanëki.+ 24 Juk nacionpitam mana llakipäkoq* nunakunata pushamushaq.+ Pëkunam wayinkunawan quedakuyanqa+ y sagrädu sitiunkunatapis manam respetayanqatsu. Tsëmi puëdeq tukoq këkarpis penqakushqa ushayanqa.+ 25 Imëka sufrimientukunapa pasayanqan höram alli kawakuyta munar imëkata rurayanqa, peru manam puëdiyanqatsu.+ 26 Imëka sufrimientupam jananman jananman pasayanqa, y mana alli noticiatapis jukta juktaran wiyayanqa. Tsëmi musyëta munar Diospa willakoqninta ashiyanqa,+ peru sacerdötikuna leypita yachatsiyanqampis y dirigentikuna consejayanqampis manam yanapanqatsu.+ 27 Gobernantipis wanupakushqanöran llakikunqa+ y mandakoq nunapis manam imanö këta puëdinqatsu. Y nunakunapa rikrankunaqa mantsakëwanmi karkaryanqa. Imanöpis portakuyanqanmannömi castigashaq, pëkuna juzgayanqanmannömi juzgashaq. Musyariyanqam noqa Jehovä kanqäta’”.+