Ezequiel
25 Teyta Jehovämi yapë parlapämarqan y kënömi nimarqan: 2 “Nunapa tsurin, ammonïtakuna+ kawayanqan läduman rikëkur willakuy.+ 3 Ammonïta nunakunata kënö nï: ‘Llapanta Gobernaq Teyta Jehovä parlanqanta wiyayë. Llapanta Gobernaq Teyta Jehovämi kënö niyäshunki: “Sagrädu templüta mana respetayaptin, Israel markakuna tsunyëkar quedariptin y Judäpita nunakunata prësu apakuyaptinmi qamkunaqa burlakuyarqëki y ‘¡allichömi tsë pasëkushqa!’ nirmi kushipäyarqëki. 4 Tsënö kayanqëkipitam kananqa inti o rupay yarqamunan läduchö nunakunapa poderninman churayashqëki. Pëkunam markëkikunaman shamuykur, campamentunkunata y carpa* wayinkunata churayanqa, llapan murukuyanqëkikunatam mikuyanqa y animalnikikunapa lichintam upuyanqa. 5 Y Rabä+ markatam, camëllunkunata mitsikuyänan qewayoq chakrakunaman tikratsishaq y ammonïtakunapa markankunatanam üsha corralkunaman tikratsishaq, y qamkunaqa musyariyankim noqa Jehovä kanqäta”’”.
6 “Këtam Llapanta Gobernaq Teyta Jehovä niyäshunki: ‘Qamqa paqchirmi o taqllakurmi+ y patsatapis jëtarmi alläpa kushikurqëki Israel markakunachö imëka desgraciakuna pasakuptin.+ 7 Tsëmi kananqa poderösu kanqäta musyanki y mëtsë nunakunapa poderninmanmi churashqëki, ushakätsishqëkim y nacionnikichöqa mananam kankinatsu,+ y ushakätsipteqmi musyanki noqa Jehovä kanqäta’.
8 Këtam Llapanta Gobernaq Teyta Jehovä nin: ‘Moabwan+ Seirmi+ kënö niyashqa: “¡Rikë! Judä nacionpis wakin nacionkunanöllanam tikrashqa”. Tsënö niyanqampitam, 9 Moabpa lindërunchö këkaq kuyëllapaq markankunata atacayänampaq dejarishaq: Bet-Jesimot, Baal-Meon markakunapita qallëkurmi hasta Quiryatäim+ markayaq atacayanqa. 10 Tsë markakunataqa* ammonïtakunatawan juntum, inti o rupay yarqamunan läduchö nunakunata entreguëkushaq,+ tsëmi ammonïtakunataqa ni mëqan nacionpis yarpanqanatsu.+ 11 Moabïtakunatam+ juzgarnin condenashaq y pëkunaqa musyariyanqam noqa Jehovä kanqäta’.
12 Llapanta Gobernaq Teyta Jehovämi kënö nin: ‘Edomïta nunakunaqa Judächö nunakunata chikiparmi imëka mana allikunata rurayashqa, tsëta rurarqa jutsatam* rurayashqa.+ 13 Tsëmi Llapanta Gobernaq Teyta Jehovä kënö nin: “Tsënö kayanqampitam edomïtakuna musyayanqa poderösu kanqäta. Kananqa nunatapis y animaltapis ushakätsishaqmi y llapan markankunam tsunyëkar quedanqa.+ Teman sitiupita qallëkurmi, Dedanyaq espädawan ushakäyanqa.+ 14 ‘Edomïta nunakunata ushakätsiyänampaqmi, sirwimaqnï israelïtakunata yanapashaq.+ Pëkuna ushakätsiyaptinmi, edomïta nunakunaqa musyayanqa cölerar castiguëkanqäta’+ ninmi Llapanta Gobernaq Teyta Jehovä”’.
15 Llapanta Gobernaq Teyta Jehovämi kënö nin: ‘Filisteukunaqa israelïtakunatam imëpis chikiyashqa, tsëmi ushakätsita munar imëka mana allikunata rurayashqa.+ 16 Tsëmi Llapanta Gobernaq Teyta Jehovä kënö nin: “Kananmi filisteu+ nunakuna musyayanqa poderösu kanqäta. Keretïta+ nunakunata y lamar kuchunkunachö kawëkar quedashqa nunakunatapis llapantam ushakätsishaq.+ 17 Alläpa cölerarmi mantsakëpaq castïgukunawan castigashaq, y castiganqä junaqmi musyariyanqa noqa Jehovä kanqäta”’”.