Levïticu
2 Teyta Jehoväpaq gränupita rurashqa qarëta* mëqëkipis apëta munarqa,+ alli aqashqa harinapitam rurayänëki. Tsë harinamanmi aceitita y yuraq inciensuta jichayänëki.+ 2 Tsëpitanam Aaronpa tsurin sacerdötikunaman apayänëki, y sacerdötim harinata aceitiwan y yuraq inciensuwan pichurkur altarchö juk aptëta rupatsinan, tsëqa apayanqëki qarëta Teyta Diosnintsik imëpis yarpänampaqmi kanqa.+ Tsëqa ninawan rupatsishqa qarëmi kanqa, y ninawan rupanqanqa Teyta Jehoväta alläpam gustanqa. 3 Sobraq gränupita rurashqa qarëqa Aaronpaqwan tsurinkunapaqmi kanqa.+ Tsë sobraq qarëqa, Teyta Jehoväpaq apashqa kayaptikim alläpa sagrädu kanqa.+
4 Mëqëkipis gränupita rurashqa qarëta hornuchö rurarkur Teyta Diospaq apëta munarqa, alli aqashqa harinapitam rurayänëki. Tsëqa aceitiwan pichushqa levadürannaq roscakuna y aceitiwan llushishqa levadürannaq gallëtakunam kanan.+
5 Mëqëkipis gränupita rurashqa qarëta läta jananchö+ ankarkur Teyta Diospaq apëta munarqa, alli aqashqa harinaman aceitin jicharkurmi levadürannaq tantata rurayänëki. 6 Y atskaman pakïkurmi jananman aceitita jichayänëki.+ Tsëqa gränupita rurashqa qarëmi kanqa.
7 Mëqëkipis gränupita rurashqa qarëta kaswilachö ankarkur Teyta Diospaq apëta munarqa, alli aqashqa harinaman aceitin jicharkurmi rurayänëki. 8 Tsënö gränupita rurashqa qarëta Jehovä Diospaq aparqa sacerdötitam entregayänëki, pënam altarman apanqa. 9 Tsëpitanam apayanqëki gränupita rurashqa qarëta Teyta Diosnintsik imëpis yarpänampaq,+ tsë qarëpita wakinllata altar jananchö sacerdöti rupatsinan. Tsëqa ninawan rupatsishqa qarëmi kanqa, y ninawan rupanqanqa Teyta Jehoväta alläpam gustanqa.+ 10 Y sobraq gränupita rurashqa qarëqa Aaronpaq y tsurinkunapaqmi kanqa. Teyta Jehoväpaq apashqa kayaptikim tsë sobraq qarëqa alläpa sagrädu kanqa.+
11 Teyta Jehoväpaq gränupita rurashqa qarëta aparqa, manam levadüran winayänëkitsu.+ Teyta Jehoväpaqqa ama imatapis levadürayoqta ni mielyoqtaqa rupatsiyankitsu.
12 Punta mas alli cosëchëkikunataqa, Jehovä Diospaqmi apayänëki,+ y tsë qarëtaqa manam ninawan rupatsiyänëkitsu.
13 Teyta Diospaq gränupita rurashqa qarëta rurarqa, kachiyoqtam rurayänëki. Kachiqa Teyta Dioswan rurayanqëki acuerdutam rikätsikun, tsëmi kachinnaqtaqa ima qarëtapis apayänëkitsu. Teyta Diospaq qarëta aparqa kachiyoqtam apayänëki.+
14 Tsëllaraq cosechayanqëki punta mas alli kaq gränu mikuypita Teyta Jehoväpaq qarëta aparqa, ankashqata y saqtulla* aqëkurmi apayänëki. Tsëqa kanqa puntata cosechayanqëkipita Teyta Diospaq gränupita rurashqa qarëmi.+ 15 Y tsëmanmi aceitita y yuraq inciensuta jichayänëki. Tsëqa gränupita rurashqa qarëmi kanqa. 16 Tsëpitanam apayanqëki qarëta Teyta Dios imëpis yarpänampaq,+ aceititawan y yuraq inciensutawan saqtulla aqashqa qarëpita wakinta altarchö sacerdöti rupatsinan. Tsëqa Teyta Jehoväpaq ninawan rupatsishqa qarëmi kanqa.