1 Crönicas

27 Israelchöqa gobernantita cada killa sirwiyänampaqmi cada grüpuchö veinticuatru mil soldädukuna kayarqan. Tsëchöqa këkäyarqan cada familiachö dirigeqkuna, mil soldädukunapa y cien soldädukunapa mandaqninkuna+ y gobernantita sirweq dirigeqkunam.+

2 Punta kaq killachömi turnun tocarqan Zabdielpa tsurin Jasobeamta,+ y grüpunchöqa veinticuatru mil soldädukunam kayarqan, y pëmi mandaqninkuna karqan. 3 Jasobeamqa Përezpa kastanmi+ karqan. Pëmi qallanan killachö sirweq grüpukunapa mandaqninkunapa mandaqnin karqan. 4 Ishkë kaq killachönam tocarqan Ahohïpa+ kastan Dodäita.+ Pëpa grüpunchöqa veinticuatru mil soldädukunam kayarqan y mandaqninmi Miclot karqan. 5 Kima kaq killachönam tocarqan sacerdöti Jehoiadäpa+ tsurin Benäyata,+ y grüpunchöqa veinticuatru mil soldädukunam kayarqan, y Benäyam mandaqninkuna karqan. 6 Benäyaqa valienti soldädum karqan y treinta valienti soldädukunapa mandaqninmi karqan. Grüpunchö këkaq soldädukunapa mandaqninqa tsurin Amizabadmi karqan. 7 Chusku kaq killachönam tocarqan Joabpa wawqin+ Asahelta,+ y grüpunchöqa veinticuatru mil soldädukunam kayarqan, y pëmi mandaqninkuna karqan. Tsëpitanam Asahelpa rantin, tsurin Zebadïas karqan. 8 Pitsqa kaq killachönam izrahïta Samhut-ta tocarqan, y grüpunchöqa veinticuatru mil soldädukunam kayarqan, y pëmi mandaqninkuna karqan. 9 Joqta kaq killachönam tecoïta+ Iquespa tsurin Iräta+ tocarqan, y grüpunchöqa veinticuatru mil soldädukunam kayarqan, y pëmi mandaqninkuna karqan. 10 Qanchis kaq killachönam pelonïta Hëlezta+ tocarqan, pëqa efraimitam karqan. Grüpunchöqa veinticuatru mil soldädukunam kayarqan, y pëmi mandaqninkuna karqan. 11 Puwaq kaq killachönam husatïta Sibecäita+ tocarqan, pëqa zerahïtam+ karqan. Grüpunchöqa veinticuatru mil soldädukunam kayarqan, y pëmi mandaqninkuna karqan. 12 Isqun kaq killachönam anatotïta+ Abi-Ezerta+ tocarqan, pëqa Benjaminpa kastampitam karqan. Grüpunchöqa veinticuatru mil soldädukunam kayarqan, y pëmi mandaqninkuna karqan. 13 Chunka kaq killachönam netofatïta Maharäita+ tocarqan, pëqa zerahïtam+ karqan. Grüpunchöqa veinticuatru mil soldädukunam kayarqan, y pëmi mandaqninkuna karqan. 14 Onci kaq killachönam piratonïta Benäyata+ tocarqan, pëqa karqan Efrainpa kastampitam. Grüpunchöqa veinticuatru mil soldädukunam kayarqan, y pëmi mandaqninkuna karqan. 15 Döci kaq killachönam netofatïta Heldäita tocarqan, pëqa Otnielpa kastanmi karqan. Grüpunchöqa veinticuatru mil soldädukunam kayarqan, y pëmi mandaqninkuna karqan.

16 Israel kastakunachöqa këkunam mandakoqkuna kayarqan: Rubenpa kastanchömi Zicrïpa tsurin Eliezer mandakoq karqan; Simeonpa kastanchömi Maacäpa tsurin Sefatïas mandakoq karqan; 17 Levïpa kastanchömi Quemuelpa tsurin Hasabïas mandakoq karqan; Aaronpa kastankunachömi Sadoc karqan; 18 Judäpa kastanchömi Davidpa wawqin Elihü+ mandakoq karqan; Isacarpa kastanchömi Miguelpa tsurin Omrï mandakoq karqan; 19 Zabulonpa kastanchömi Abdïaspa tsurin Ismayä mandakoq karqan; Neftalïpa kastanchömi Azrielpa tsurin Jerimot mandakoq karqan; 20 Efrainpa kastanchömi Azazïaspa tsurin Hosëa mandakoq karqan; Manasespa pullan kastanchömi Pedäyapa tsurin Joel mandakoq karqan; 21 Galaad läduchö këkaq Manasespa pullan kastanchömi Zacarïaspa tsurin Idö mandakoq karqan; Benjaminpa kastanchömi Abnerpa+ tsurin Jaasiel mandakoq karqan; 22 y Danpa kastanchönam Jerohampa tsurin Azarel mandakoq karqan. Pëkunam kayarqan Israel kastakunachö mandakoqkuna.

23 Jehovä Diosmi nirqan israelïtakunaqa ciëluchö estrëllakunanö mëtsikaq kayänampaq kaqta,+ tsëmi Davidqa veinti watayoqpita urëpaqa yupatsirqantsu. 24 Zeruyäpa wamran Joabmi israelïtakunata censar qallarqan, peru manam usharqantsu. Tsë censuta ruranqampitam Teyta Dios cölerar israelïtakunata castigarqan.+ Tsëmi gobernanti David kawanqan witsanqa ëkaq israelïtakuna kayanqanta apuntayarqantsu.

25 Gobernantipa väleq cösasninkuna churaränan cuartuta+ rikänampaqmi Adielpa tsurin Azmävet-ta churayarqan. Uzïaspa tsurin Jonatantam churayarqan chakrakunachö, markakunachö, taksha markakunachö y törrikunachö churakuyänan cuartukunata rikänampaq. 26 Kelubpa tsurin Ezrïtam churayarqan chakrakunachö trabajaqkunapa mandaqnin kanampaq. 27 Ramatïta Simeïtam churayarqan üvas chakrakunata rikänampaq. Sifmïta Zabdïtam churayarqan vïnu churayänan cuartukunata rikänampaq. 28 Guederïta Baal-Hanantam churayarqan olïvus chakrakunata y sicömoru+ hïgus chakrakunata Sefelächö+ rikänampaq. Joastam churayarqan aceiti churakuyänan cuartukunata rikänampaq. 29 Saronïta Siträitam churayarqan Saronchö+ wäka mitseqkunata rikänampaq. Adlaipa tsurin Safat-tam churayarqan pampakunachö wäkakunata cuentanchö katsinampaq. 30 Ismaelïta Obiltam churayarqan camëllukunata cuentanchö katsinampaq. Meronotïta Jehdeyätam churayarqan ashnukunata cuentanchö katsinampaq. 31 Y Hagrïta Jaziztam churayarqan üshakunata y cabrakunata cuentanchö katsinampaq. Pëkunam kayarqan gobernanti Davidpa llapan kapunqankunata cuidaqkunapa mandaqninkuna.

32 Davidpa sobrinun Jonatanmi+ alli yachaq nuna karqan, pëmi imatapis Davidta entienditseq, y pëmi secretariupis karqan. Hacmonïpa tsurin Jehielmi gobernantipa wamrankunata cuidaq.+ 33 Ahitofelmi+ gobernantipa consejaqnin karqan, y arkïta Husäimi+ gobernantipa amïgun karqan. 34 Ahitofelpitanam Benäyapa+ tsurin Jehoiadä, Abiatar+ y Joab+ kayarqan. Pëkunaqa gobernantipa soldädunkunapa mandaqninkunam kayarqan.