Isaïas
17 Damascu+ markata ima pasanampaq kaqmi këchö qellqarëkan:
“Damascuchöqa rumillanam qoturanqa,
y manam markanatsu kanqa.+
2 Aroer markakunachöqa+ manam ni pï kawanqanatsu.
Tsëmi tsë sitiukunachö päraq üshakunataqa
ni pï mantsakätsinqanatsu.
3 Efrainchö alli murallashqa markakunapis llapanmi ushakäyanqa,+
y Damascu markapitaqa manam gobernayanqanatsu,+
y Siriachö quedaqkuna puëdeq kayanqampis,
israelïtakuna* puëdeq kayanqan ushakanqannöllam ushakanqa”
ninmi angelkunata mandaq Teyta Jehovä.
4 “Tsë witsanqa, Jacobpa kastankunaqa
manam unënönatsu puëdeq kayanqa, y wira wira* karpis uyuyäyanqam.
5 Jacobpa kastankunaqa,
Refaim pampa kinrëchö chakrakunata cosechariyaptin
pallapakuyänampaq wallkalla quedaq gränunömi kayanqa.+
6 Olïvus plantata wirur* cosechayaptin
mas altu rämankunachö juk ishkë aceitüna quedaqnö
y mas alli wayoq rämankunachö chusku o pitsqa aceitüna quedaqnömi,
pëkunaqa wallkaqlla quedayanqa”+ ninmi Israelpa Diosnin Jehovä.
7 Tsë witsanmi nunakunaqa yanapëkunampaq Kamakoqninman* rikaräyanqa, y Israelpa Limpiu Diosninmanmi confiakuyanqa, 8 y mananam rurayanqan+ altarkunaman,+ sagrädu postinkunaman ni inciensuta rupatsiyänan altarninkunaman confiakuyanqanatsu.
9 Tsë witsanqa alli murallashqa markankunapis, montikuna+ rurinchö tsunyëkaq sitiunö
y israelïtakunata mantsar dejayanqan rämanömi kanqa.
Awmi tsunyaq sitium tikranqa.
10 Qamkunaqa salvayäshoqniki Teyta Diostam qonqayarqunki+
y kallpayoqta* tikratsiyäshoqniki qaqa cuenta Diosnikikunatam+ yarpäyarqunkitsu.
Tsëmi shumaq huertakunata rurayanki
y tsëmanmi juk nacionpita apayämunqëki tseqllipita plantayanki.*
11 Junaqpam plantayanqëkita shumaq cercayanki
y patsa warëmi muruyanqëki jeqamunqa.
Peru alläpa qeshyayanqëki y shonquykichö nanatsikuyanqëki junaqqa,
manam ima cosëchapis kanqatsu.+
12 Wiyayë, mëtsë nacionpita nunakunam
wakman këman kuyuykaq lamar yakunö ima rurëtapis puëdiyantsu
y mëtsika nacionkunam lamar yaku laqcheqsar büllanqannöran büllëkäyan.
13 Mëtsë nacionpita nunakuna büllayanqanqa,
mëtsika yaku büllanqannöran wiyakanqa.
Peru Teyta Dios mandaptinmi jirkachö päjata
y tsakishqa cardonta vientu apakunqannö, qeshpir karuta ëwakuyanqa.
14 Patsa tardiyarkuptinqa, mana allikunapa pasarmi alläpa mantsakäyanqa
y patsa manaraq waraptinmi ushakäyanqa.
Tsënömi pasanqa imëkantsikta quedatsikoqkunawan
y tsëtam chaskiyanqa imëkantsikta apakoqkuna.