Isaïas
23 Tïru+ markata ima pasanampaq kaqmi këchö qellqarëkan:
¡Tarsispita barcukunachö trabajaq nunakuna, llakikur waqayë!+
Kitim kinrëpita nunakunam,+ barcuwan chäyänëki sitiukunata ushakätsishqa kayanqanta willayäshurqunki.
Tsëmi Tïru markaman yëkuyta puëdiyankitsu.
2 Lamar kuchunchö kawaq nunakuna upälla kayë.
Sidonpita rantikoqkunam+ lamarpa tsimpamur markëkikunaman juntarayämushqa.
3 Tïru nunakunapa ganancianqa mëtsika yaku jananchömi këkan.+
Pëkunaqa Sihorpitam* gränukunata apayämushqa, y Nïlu mayupitam* imëkata jipiyashqa.
Tsëkunawanmi mëtsë nacionkunata atska qellëta ganatsiyashqa.+
4 Sidonpita nunakuna penqakuyë.
Qamkunaqa lamar kuchunchö karmi següru sientikuyanki,
tsënö kaptimpis, lamarqa kënömi nishqa:
“Manam llullun yurinampaqna këkaq warminötsu sufrirqö, y manam wamräkuna kantsu.
Manam ollqu wamrakunata wätarqötsu y manam piwampis manaraq oqllanakushqa warmi wamrakunata yachatsirqötsu”.+
5 Egiptu nacionta pasanqanta wiyar llakikuyanqannöllam+
Tïru markata pasanqanta wiyarpis alläpa llakikuyanqa.+
6 ¡Tarsisman ëwayë!
¡Lamar kuchunchö kawaq nunakuna, llakikur waqayë!
7 ¿Kë markachöku unë witsan patsakanqampita kushikuyarqunki y imëkata rurar allish tukuyarqunki?
Qamkunaqa karu nacionkunaman ëwarmi tsëchö kawayarqunki.
8 ¿Pitan Tïru nunakunata tsënö pasanampaq kaqta decidishqa?
Pëkunaqa mëtsëmanmi gobernaqkunata churayaq.
Rantikoqninkunapis gobernadorkunam kayaq,
y negociantinkunataqa entëru patsachömi respetayaq.+
9 Angelkunata mandaq Teyta Jehovämi tsënö kanampaqqa decidishqa.
Tsëtaqa ruranqa shumaq kayanqampita
alabakoq nunakunata mana kaqpaq churanampaq,
y entëru patsachö respetashqa nunakunata penqakatsinampaqmi.+
10 Tarsispita nunakuna, markëkikunachöqa
manam barcukuna chäyämunampaq sitiu kannatsu.
11 Teyta Jehoväqa makinta lamarman kamëkurmi
mëtsë nacionkunata karkaryätsishqa,
y Feniciapa murällankunata ushakätsiyänampaqmi mandakushqa.+
12 Teyta Diosmi këta nin:
Sharkur Kitim-man+ tsimparpis manam yamë këta tarinkitsu”.
13 ¡Rikäyë! Caldëa nunakunapa markankunata.+
Pëkunam, y manam Asiria nunakunatsu,+ chukaru animalkuna pärayänan sitiuman tikratsiyashqa.
Pëkunaqa tsë markaman yëkuyänampaqmi törrikunata rurayashqa,
tsë markapa fuerti törrinkunatam ushakätsiyashqa.+
14 Tarsispita barcukunachö trabajaq nunakuna, llakikur waqayë,
confiakuyanqëkitam ushakätsiyashqa.+
15 Tsë witsanqa, juk gobernaq setenta wata kawanqannöllam, Tïru markapita nunakunapis setenta watapa qonqashqa kayanqa.+ Setenta watakuna pasariptinmi qellëpaqrëkur jukwan jukwan kakoq* warmipaq cantayanqan cancionta, Tïrupita nunakunapaqpis kënö cantayanqa:
16 “Mana ni pï yarpanqan qellëpaqrëkur jukwan jukwan kakoq* warmi
arpëkita aparkur entëru markapa ëwë.
Mana imëpis qonqayäshunëkipaq arpëkita shumaq tocar,
mëtsika cancionkunata cantë”.
17 Setenta watakuna pasariptinqa, Tïru nunakunata yapëmi Teyta Jehovä yarpanqa, y pëkunaqa yapëmi päguta chaskiyanqa. Y mëtsë nacionpita nunakunawanmi jukwan jukwan kakoq warminö portakuyanqa. 18 Tsënö kaptimpis, ganayanqanqa y chaskiyanqan päguqa, Teyta Jehoväpaqmi sagrädu kanqa. Tsë chaskiyanqan pägutaqa, manam churakuyanqatsu ni juntayanqatsu. Tsëkunaqa Teyta Jehoväpa puntachö këkaqkuna pacha junta mikuyänampaq, y shumaq röpata vistikuyänampaqmi kanqa.+