Levïticu
13 Tsëpitanam Teyta Jehoväqa Moisestawan sacerdöti Aaronta kënö nirqan: 2 “Juk nunapa qaranchö chüpu, qeri o roncha yuriptinqa, Aaronman o tsurin sacerdötikunamanmi apayämunan,+ tsënöpa lepra*+ o mana lepra kanqanta rikäyänampaq. 3 Tsënam sacerdötiqa tsë nunapa qerinta rikänan. Y qerichö aqtsa yuraq tikrashqa kaptin, y tsë qeri ëtsanyaq yëkushqa kaptinqa, lepram kanqa. Tsëkunata rikëkurmi, tsë nunata rikënïpaq mana limpiu kanqanta ninan. 4 Tsë qeri yuraqashqana kaptinqa, y ëtsanyaq mana yëkushqa kaptin ni qerinchö aqtsa mana yuraq tikrashqa kaptinqa, qanchis junaqpa wakinkunapita karuchö kanampaqmi sacerdöti mandanan.+ 5 Qanchis junaq pasariptinqa, sacerdötiqa yapëmi tsë nunapa qerinta rikänan. Tsë qeri kanqannölla kaptin o mana mirashqa kaptinqa, yapëmi qanchis junaqpa wakinkunapita karuchö kanampaq mandanan.
6 Qanchis junaq pasariptinqa, sacerdötiqa yapëmi tsë nunapa qerinta rikänan. Tsë qeri ushakashqa kaptin y mana mirashqa kaptinqa, lluta qerilla kaptinmi, tsë nunata rikënïpaq limpiuna kanqanta ninan.+ Tsë nunaqa röpantam taqshanan, y rikënïpaqmi limpiuna kanqa. 7 Peru rikënïpaq limpiuna kanqanta sacerdöti ninqampita, qaranchö yapë qeri yuriptin y miraptinqa, yapëmi sacerdötiman kutinan. 8 Y sacerdötiqa yapëmi tsë nunapa qerinta rikänan. Y qerin mirashqa kaptinqa, leprayoq kaptinmi rikënïpaq mana limpiu kanqanta ninan.+
9 Juk nunachö lepra qeshya yuriptinqa, sacerdötimanmi apayämunan. 10 Tsënam sacerdötiqa tsë nunata rikänan.+ Qaranchö chüpu yurishqa kaptin, y tsë chüpuchö herïda kaptin y aqtsan yuraq tikrashqa kaptinqa,+ 11 antsashqa leprayoqmi kanqa. Tsëmi sacerdötiqa, tsë nunata rikënïpaq mana limpiu kanqanta ninan. Y mana limpiuna kaptinmi, wakinkunapita karuchö kanampaq mandanantsu.+ 12 Peru tsë nunapa llapan qaranta, o chakimpita peqanyaq o umanyaq lepra usharishqa kanqanta sacerdöti rikarqa, 13 tsë nunapa leprantam rikänan, y llapan qaranchö lepra kaptinqa, rikënïpaq limpiu kanqantam ninan. Llapan qaran yuraqärishqana kaptinmi, rikënïpaq limpiuna kanqa. 14 Peru herïda yurishqa kaptinqa, manam rikënïpaq limpiutsu kanqa. 15 Herïda karqa, lepram kanqa,+ y tsë nunaqa manam rikënïpaq limpiutsu kanqa.+ Tsëmi sacerdötiqa herïdanta rikëkur, rikënïpaq mana limpiu kanqanta ninan. 16 Peru herïdan alliyashqa kaptinqa, yapëmi sacerdötiman ëwanan. 17 Tsënam sacerdötiqa tsë herïdata rikänan.+ Y alliyashqa kaptinqa, tsë nunatam rikënïpaq limpiuna kanqanta ninan, y tsë nunaqa rikënïpaq limpiunam kanqa.
18 Pipa qaranchöpis qeri yurir tsëpita alliyäriptinqa, 19 qerin kanqanchö yuraq chüpu o pukaraq roncha yuriptinqa, sacerdötimanmi ëwanan. 20 Tsënam sacerdötiqa tsë nunapa qerinta rikänan.+ Y ëtsanyaq yëkushqa kaptin, y qerinchö aqtsa yuraq tikrashqa kaptinqa, tsë qerichö lepra qeshya yurishqa kaptinmi, tsë nunata rikënïpaq mana limpiu kanqanta ninan. 21 Peru qerinchö aqtsa mana yuraq tikrashqa kaptin, ëtsanyaq mana yëkushqa kaptin y tsë qeri alliyëkanqanta rikarqa, qanchis junaqpa wakinkunapita karuchö kanampaqmi mandanan.+ 22 Y entëru qaranchö qeri kaptinqa, lepra qeshya kaptinmi, tsë nunata rikënïpaq mana limpiu kanqanta ninan. 23 Peru tsë qeri kanqannölla kaptin, y mana mirashqa kaptinqa, chüpulla kaptinmi, tsë nunata rikënïpaq limpiuna kanqanta ninan.+
24 Pillapis qaranta rupakuptin, y rupakunqan qaran yuraq o puka herïdaman tikraptinqa, 25 sacerdötim tsë herïdata rikänan. Y herïdachö aqtsa yuraq tikrashqa kaptin y ëtsanyaq yëkushqa kaptinqa, rupakunqanchö lepra yurishqa kaptinmi, tsë nunata rikënïpaq mana limpiu kanqanta ninan. Tsëqa lepra qeshyam kanqa. 26 Peru tsë herïdachö aqtsa mana yuraq tikrashqa kaptin, ëtsanyaq mana yëkushqa kaptin y tsë herïda alliyëkanqanta rikarqa, qanchis junaqpa wakinkunapita karuchö kanampaqmi mandanan.+ 27 Qanchis junaq pasariptinqa, sacerdötiqa yapëmi tsë nunapa herïdanta rikänan. Y tsë herïda entëru qaranman mirashqa kaptinqa, rikënïpaq mana limpiu kanqantam ninan. Tsëqa lepra qeshyam kanqa. 28 Peru tsë herïda kanqannölla kaptin, mana mirashqa kaptin y alliyëkanqanta rikarqa, rupakunqampita herïdalla kaptinmi, tsë nunata rikënïpaq limpiu kanqanta ninan. Tsëqa rupakunqampita herïdallam kanqa.
29 Ollqupa o warmipa chakallwanchö* o peqanchö o umanchö qeri yuriptinqa, 30 sacerdötim tsë qerita rikänan.+ Tsë qeri ëtsanyaq yëkushqa kaptin, aqtsan qallwash tikraptin y ushakar qallëkuptinqa, tsë nunatam rikënïpaq mana limpiu kanqanta ninan. Tsëqa nunapa chakallwanchö* o peqanchö o umanchö yureq qeriqa lepram kanqa. 31 Peru tsë qerichö yana aqtsa mana kaptin y ëtsanyaq mana yëkushqa kaptinqa, sacerdötim qanchis junaqpa wakinkunapita karuchö kanampaq mandanan.+ 32 Qanchis junaq pasariptinmi sacerdötiqa yapë tsë nunapa qerinta rikänan. Qerin mana mirashqa kaptin, aqtsan mana qallwash tikrashqa kaptin y ëtsanyaq mana yëkushqa kaptinqa, 33 shaprantam* rutukunan, peru manam qerin kanqantaqa. Tsëpitanam sacerdötiqa qanchis junaqpa wakinkunapita karuchö kanampaq mandanan.
34 Qanchis junaq pasariptinmi sacerdötiqa yapë tsë nunapa qerinta rikänan. Chakallwanchö* o peqanchö o umanchö yureq qeri mana mirashqa kaptin, y ëtsanyaq mana yëkushqa kaptinqa, tsë nunatam rikënïpaq limpiu kanqanta ninan. Tsë nunaqa röpantam taqshanan, y rikënïpaqqa limpiunam kanqa. 35 Peru rikënïpaq limpiuna kanqanta sacerdöti ninqampita, yapë qeri yuriptin y miraptinqa, 36 sacerdötim tsë qerita yapë rikänan. Y tsë nunapa qerin mirashqa kaptinqa, aqtsan qallwash o mana qallwash kanqanta mana rikarllam, rikënïpaq mana limpiu kanqanta ninan. 37 Peru qerin mana mirashqa kaptin, y yapë yana aqtsa winashqa kaptinqa, qerin alliyashqana kaptinmi, tsë nunata rikënïpaq limpiuna kanqanta ninan. Y tsë nunaqa, rikënïpaq limpiunam kanqa.+
38 Ollqupa o warmipa qaranchö yuraq mancha yuriptinqa, 39 sacerdötim tsë manchata rikänan.+ Y tsë mancha yuraq kaptinqa, mana wanutsikoq qeshya kaptinmi, tsë nunata rikënïpaq limpiu kanqanta ninan.
40 Juk nunapa aqtsan shikwar ushakaptinqa, rikënïpaq limpiullam kanqa. 41 Urkun kaqllapa aqtsan ushakaptimpis, rikënïpaq limpiullam kanqa. 42 Peru aqtsan ushakanqanchö o urkunchö pukaraq herïda yuriptinqa, lepra qeshyam kanqa. 43 Y sacerdötim tsë nunata rikänan. Urkunchö o matankan jananchö jakaraq herïda puka kaptin, y lepra niraq kaptinqa, 44 manam rikënïpaq limpiutsu kanqa, leprayoqmi kanqa. Peqanchö o umanchö leprayoq kaptinmi, sacerdötiqa rikënïpaq mana limpiu kanqanta tsë nunata ninan. 45 Tsënö leprayoq nunaqa, röpan rachishqa, mana naqtsakushqa, y shimin tsapashqam purinan. Y ‘manam limpiutsu kä, manam limpiutsu kä’ nirmi purinan. 46 Tsë nunaqa, leprampita alliyanqanyaqmi rikënïpaq limpiutsu kanqa. Mana limpiu karmi, këkäyanqëki campamentupita karuchö täkunan.*+
47 Millwapita o lïnupita röpa mupalliptin, 48 jiläsan o träman mupalliptin, o qaratsa o imapis qaratsapita rurashqa mupalliptin, 49 röpachö, jiläsachö, trämachö, qaratsachö o imapis qaratsapita rurayanqanchö qarwashyëkaq o pukaraq yuriptinqa, mupallim kanqa, sacerdötitam rikätsiyänëki. 50 Tsënam sacerdötiqa tsë mupallita rikänan. Y qanchis junaqpam juk läduman aparti churanan.+ 51 Qanchis junaq pasariptinmi sacerdötiqa yapë tsë mupallita rikänan. Röpaman, jiläsaman, trämaman y imachöpis utilizäyanqan qaratsaman tsë mupalli mirashqa kaptinqa, tsëqa mana ushakaq mupallim kanqa. Tsëqa rikënïpaq manam limpiutsu kanqa.+ 52 Y mana ushakaq mupalli kaptinmi, tsë mupalliyoq röpata, lïnupita o millwapita rurashqa jiläsata o trämata, o imatapis qaratsapita rurayanqanta, ushakanqanyaq sacerdöti rupatsinan.
53 Peru röpachö, jiläsachö, trämachö, qaratsachö o imapis qaratsapita rurayanqanchö mupalli mana mirashqa kaptinqa, 54 tsëkunata alli taqshayänampaqmi sacerdöti mandakunan, tsëpitanam qanchis junaqpa juk läduman aparti churanan. 55 Tsëpitanam sacerdötiqa, taqshar apayanqanta rikänan. Tsë mupalli kanqannölla kaptinqa, mana mirashqa kaptimpis, manam rikënïpaq limpiunatsu kanqa. Janampa y rurimpa mupallishqa kaptinmi, ushakanqanyaq ninawan rupatsinan.
56 Peru tsë taqshayanqan röpachö, jiläsachö, trämachö, qaratsachö o imapis qaratsapita rurayanqanchö mupalli ushakëkanqanta rikarninqa, mupallishqa kaqllatam rachinan. 57 Tsënö kaptimpis, tsë röpachö, jiläsachö, trämachö, qaratsachö o imatapis qaratsapita rurashqachö, tsë mupalli mirarnin juk läduchöna yuriptinqa, ushakanqanyaqmi ninawan rupatsinan.+ 58 Peru taqshayanqan röpachö, jiläsachö, trämachö, qaratsachö o imatapis qaratsapita rurayanqanchö mupalli ushakashqa kaptinqa, yapëmi taqshayänan, y rikënïpaqqa limpiunam kanqa.
59 Kë mandakunqänömi rurayänëki, millwapita o lïnupita röpachö, jiläsachö, trämachö, qaratsachö o imapis qaratsapita rurashqachö mupalli yuriptin. Tsënöpam sacerdöti musyanqa, rikënïpaq ima limpiu o mana limpiu kanqanta”.