2 Samuel

4 Hebron+ markachö Abner wanushqa kanqanta musyëkurmi, Saulpa tsurin Is-Bösetqa+ feyupa mantsakarqan,* y israelïtakunapis alläpam yarpachakuyarqan. 2 Saulpa tsurin Is-Bösetpa soldädunkunam asaltanti kayarqan y pëkunapa mandaqninkunam Baanäwan Recab kayarqan. Pëkunaqa Benjaminpa kastankunapita beerotïta Rimonpa tsurinkunam kayarqan. (Beerot+ markaqa Benjaminpa kastankunatapis perteneceqmi. 3 Beerot markachö täkoqkunaqa,* Guitäim+ sitiutam qeshpir ëwakuyarqan y tsëchömi forastërunö kananyaq kawakuyan).

4 Saulpa tsurin Jonatanpam,+ Mefiböset jutiyoq cöju+ tsurin karqan. Mefiböset pitsqa watayoqllaraq këkaptinmi, Saultawan Jonatanta Jezreel+ markachö wanutsiyanqanta willakuyarqan. Tsëta musyëkurmi wätaqnin warmiqa, mantsakarnin wamrata mellqarkur qeshpir ëwakurqan, y cörrikaptinmi wamraqa makimpita jeqakurkurqan. Tsënöpam Mefibösetqa cöju+ tikrarqan.

5 Beerotïta Rimonpa tsurinkuna Recabwan Baanäqa, pullan junaq achachanqan höram Is-Böset punuykaptin wayinman chäyarqan. 6 Recabwan wawqin Baanäqa+ trïguta asheqnölla yëkuskirmi, Is-Böset-ta pachachö tuksïkur qeshpir ëwakuyarqan. 7 Recabwan Baanä chäyänampaqqa, Is-Bösetqa cuartunchömi punuykarqan. Y wanoqpaq tuksïkurmi peqanta o umanta roquriyarqan, y aparkurmi tsë paqaslla Arabä nänipa ëwayarqan. 8 Hebron markaman chëkurnam Is-Bösetpa peqanta o umantaqa+ gobernanti Davidman apar kënö niyarqan: “Këmi Is-Bösetpa peqan o uman. Papänin Saulmi chikishurniki+ wanutsishuynikita munarqan.+ Peru kananqa Jehovämi yanapashurqunki Saulpita y familiampita vengakunëkipaq”.

9 Peru Davidqa beerotïta Rimonpa tsurinkuna Recabtawan Baanätam kënö nirqan: “Llapan sufrimientukunapita libramaq Jehovä Diospa jutinchö niyashqëki,+ 10 kushikunäta pensarnin, ‘Saulmi wanushqa’+ nir willamaqtapis Ziclagchömi wanutsirqä.+ ¡Tsënömi pagarqä willakoq shamunqampita! 11 ¿Manatsuraq tsënölla wanutsïman wayinman ëwëkur mana culpayoq nunata cämanchö wanutseq asesïnukunatapis? ¡Qamkunapis Is-Böset-ta wanutsiyanqëkipitam wanuyänëki o wañuyänëki!”.+ 12 Tsënö nirmi Davidqa yanapaqninkunata mandarqan wanutsiyänampaq,+ y rikrankunata y chakinkunata roquskirmi Hebron pözu lädunman ayankunata warkurkuyarqan.+ Peru Is-Bösetpa peqanta o umantaqa, Hebron markachömi Abner pamparanqanman pampëkuyarqan.