Josuë
10 Jerusalen markachö gobernaq Adoni-Zëdecmi musyaskirqan Jericö markata y gobernaqninta+ ushakätsinqannölla, Hai markatawan gobernaqnintapis+ Josuë ushakätsishqa kanqanta. Tsënöllam musyaskirqan israelïtakunawan alli kawakuyänampaq, Gabaon markapita nunakuna juk acuerduta rurashqa kayanqanta+ y juntakäyanqanta, 2 tsëmi alläpa yarpachakurqan.+ Gabaon markaqa, gobernaqkuna mandakuyanqan markakunanömi jatun karqan, Hai markapitapis+ mas jatunmi karqan. Gabaon markachö ollqukunaqa, guërrachö pelyëta yachaqmi kayarqan. 3 Tsëmi Jerusalen markachö gobernaq Adoni-Zëdecqa, Hebron markachö+ gobernaq Hohamta, Jarmut markachö gobernaq Piramta, Lakis markachö gobernaq Jafïata y Eglon markachö+ gobernaq Debirta kënö nir qayatsirqan: 4 “Gabaon markapita nunakunaqa Josuëwan y israelïtakunawanmi alli kawakuyänampaq acuerduta rurayashqa. Tsëta rurayanqampita wanutsinapaq shamur yanapëkayämë”.+ 5 Tsënam Jerusalenchö, Hebronchö, Jarmutchö, Lakischö y Eglonchö amorreukunapa pitsqa gobernaqninkunaqa,+ llapan soldädunkunawan juntakëkur Gabaonchö nunakunaman guërrata ruraq ëwayarqan.
6 Tsënam Gabaon markachö ollqukunaqa, Josuëta kënö niyänampaq Guilgalchö+ campamentuman willakoqkunata mandayarqan: “Jirkakuna këkanqan läduchö amorreukunapa gobernaqninkunam wanutsiyämänampaq juntakäyashqa. ¡Jinan höra shamur salvëkayämë y yanapëkayämë! Sirwishoqnikikunam kayä, ama qonqëkalläyämëtsu”.+ 7 Tsënam Josuëqa llapan soldädunkunata y valienti nunakunata pusharkur Guilgalpita witsarqan.+
8 Tsënam Jehovä Diosqa Josuëta nirqan: “Ama pëkunata mantsëtsu,+ noqam ushakätsinëkipaq entregarqoq.+ Y manam mëqampis vencishunkitsu”.+ 9 Tsënam Josuëqa soldädunkunawan paqaspa Guilgalpita witsarqan, y illaqpita chëkurmi chikeqninkunawan pelyar qallëkurqan. 10 Teyta Jehovämi amorreu soldädukunata alläpa mantsakätsirqan, tsëmi israelïtakunata rikëkur mantsakäyarqan.+ Y israelïtakunaqa Gabaonchömi mëtsikaqta wanutsiyarqan o wañutsiyarqan. Qeshpir ëwaqkunatanam, Bet-Horon markaman witsaq nänipa qatipayarqan. Y Azecä y Maquedä markakunayaqmi wanutsir wanutsir chäyarqan. 11 Bet-Horon bajädapa israelïtakunapita qeshpir ëwëkäyaptinmi, Azecä marka kinrëyaq ruminö jatusaq runtukunata Jehovä Dios ciëlupita shikwatsimurqan, tsëwanmi amorreu nunakuna wanuyarqan. Espädawan atskaqta wanutsishqa kayaptimpis, runtuwanmi masqa wanuyarqan.
12 Israelïtakuna rikëkäyaptin amorreu nunakunata Jehovä Dios wanutsinqan junaqmi, Josuëqa Teyta Jehoväta mañakurnin israelïtakunapa puntanchö kënö nirqan:
“¡Inti o rupay, ama Gabaon marka+ janampita kuyukuytsu!+
¡Qampis killa, Ayalon pampa* jananllachö quedakuy!”.
13 Tsëmi intiqa o rupayqa këkanqanllachö quedakurqan y killapis manam kuyukurqantsu, hasta chikeqninkunata israelïtakuna wanutsir ushayanqanyaq. ¿Manaku Jasar libruchöpis tsënö nikan?+ Intiqa juk junaqpanömi këkanqanllachö quedakurqan, y manam jeqarqantsu. 14 Tsë junaqchö pasanqannöqa manam ni imëpis pasashqatsu, ni unëpis ni kanampis. Tsë junaqmi Jehovä Diosqa juk nuna mañakunqanta wiyarqan,+ y kikin Jehovämi israelïtakunata yanaparnin pelyëkarqan.+
15 Tsëpitanam Josuëqa israelïta soldädukunawan Guilgalchö campamentuman kutirqan.+
16 Tsëyaqmi amorreukunapa pitsqan gobernaqninkunaqa, qeshpirnin Maquedächö machëman yëkuyarqan.+ 17 Tsëpitanam Josuëta, “pitsqan gobernantikunatam Maquedä machëchö këkaqta* tariyashqa” nir willayarqan.+ 18 Tsënam Josuë nirqan: “Jatusaq rumikunawan machëpa punkunta tsaparkuyë, y täpayänampaq soldädukunata churayë. 19 Y wakinnikiqa chikimaqnintsikkunata qatipar ëwayë, y taripëkur wanutsiyë.+ Jehovä Diosnintsikmi ushakätsinapaq entregamarquntsik. Ama markankunaman yëkuyänanta dejayëtsu”.
20 Josuëwan soldädunkunaqa cäsi llapan chikeqninkunatam wanutsiyarqan, juk ishkëllam qeshpir ëwakuyarqan y alli murallashqa markakunaman yëkuyarqan. 21 Tsëpitanam llapan israelïta soldädukunaqa, Maquedächö campamentuman Josuë kaqta kutiyarqan, llapampis sänum këkäyarqan. Tsë junaqpitaqa, manam ni pï nunapis israelïtakunapa contran parlarqannatsu. 22 Tsëpitanam Josuëqa nirqan: “Machëpa punkunta kichëkur, tsëchö këkaq* pitsqan gobernantikunata këman apayämuy”. 23 Tsënam Jerusalen, Hebron, Jarmut, Lakis y Eglon markakunapa gobernaqninkunata+ machëchö këkaqta, Josuëman apayarqan. 24 Tsë gobernantikunata chäratsiyaptinnam, Josuëqa Israelchö llapan ollqukunata qayatsirqan y guërraman ëwaq soldädukunapa comandantinkunatam nirqan: “Shayämuy, kë gobernantikunapa matankankunaman chakikikunata churayë”. Tsënam pëkunaqa ëwëkurnin tsë gobernantikunapa matankankunaman chakinkunata churayarqan.+ 25 Tsëpitanam Josuëqa nirqan: “Ama mantsakäyëtsu.+ Valienti kayë y ama mantsakäyëtsu. Jehovä Diosqa wanutsiyänëkipaq kaq llapan chikiyäshoqnikikunatam tsënö ruranqa”.+
26 Tsëpitanam Josuëqa tsë gobernantikunata wanuratsir pitsqa qerukunaman warkutsirqan, tsëchömi tardiyanqanyaq katsirqan. 27 Y inti o rupay jeqanampaq këkaptinnam, Josuëqa mandakurqan tsë ayakunata qerupita bajatsiyänampaq+ y qeshpir yëkuyanqan machëman jitëkuyänampaq. Tsëpitanam jatusaq rumikunawan machëpa punkunta tsaparkuyarqan, tsë rumikunaqa kananyaqmi tsëchö këkan.
28 Tsë junaqmi Josuëqa Maquedä markaman yëkurqan+ y gobernantita y llapan nunakunata espädawan wanutsirqan. Manam jukllëllatapis kawëkaqtaqa dejarqantsu.+ Jericöchö gobernaqtanöllam, Maquedächö gobernaqtapis wanutsirqan.+
29 Tsëpitanam Josuëqa, israelïta soldädunkunawan Maquedäpita Libnä markaman ëwarqan, y tsë markachö nunakunawanmi guërrata rurarqan.+ 30 Tsë markata y gobernantintapis, Jehovä Diosqa israelïta soldädukunatam entregarqan.+ Tsë markatam ushakätsiyarqan, llapan nunakunatam espädawan wanutsiyarqan, manam ni jukllëllatapis kawëkaqtaqa dejayarqantsu. Awmi, Jericöchö gobernaqtanöllam, Libnä markachö gobernaqtapis wanutsiyarqan.+
31 Tsëpitanam Josuëqa, israelïta soldädunkunawan Libnäpita Lakis markaman ëwarqan.+ Tsëchö campamentuta rurëkurmi, tsë markachö nunakunawan guërrata rurarqan. 32 Y waränin junaqran Lakis markachö nuakunata venciyarqan. Jehovä Diosmi israelïta soldädukunata yanaparqan tsë markata ushakätsiyänampaq, tsëmi llapan nunakunata espädawan wanutsiyarqan.+ Libnä markatanöllam, Lakis markatapis ushakätsiyarqan.
33 Tsëta rikarnam Guëzer markapa+ gobernantin Horamqa, Lakis markaman yanapakoq witsarqan. Peru Josuëqa pëta y markanchö llapan nunakunatam wanutsirqan, manam ni jukllëllatapis kawëkaqtaqa dejarqantsu.
34 Tsëpitanam Josuëqa, israelïta soldädunkunawan Lakispita Eglon markaman+ ëwarqan. Tsëchö campamentuta rurëkurmi, tsë markachö nunakunawan guërrata rurarqan. 35 Tsë junaqllam Eglon markaman yëkuyarqan, y llapan nunakunatam espädawan wanutsiyarqan. Lakis markatanöllam, Eglon markatapis ushakätsiyarqan.+
36 Tsëpitanam Josuëqa, israelïta soldädunkunawan Eglonpita Hebron markaman+ witsarqan. Y tsë markachö nunakunawanmi guërrata rurarqan. 37 Yëkuskirmi tsë markata, gobernantinta, entërunchö markankunata y llapan nunakunata espädawan ushakätsiyarqan, manam ni jukllëllatapis kawëkaqtaqa dejayarqantsu. Eglon markatanöllam, Hebron markata y tsëchö llapan nunakunatapis ushakätsiyarqan.
38 Tsëpitanam Josuëqa, israelïta soldädunkunawan Debir+ markaman kutirqan. Y tsë markachö nunakunawanmi guërrata rurarqan. 39 Yëkuskirmi gobernantinta, llapan markankunata y llapan nunakunata espädawan ushakätsiyarqan,+ manam ni jukllëllatapis kawëkaqtaqa dejayarqantsu.+ Hebron markatawan Libnä markata y gobernantinta ushakätsiyanqannöllam, Debir markata y gobernantintapis ushakätsiyarqan.
40 Josuëqa jirkakuna këkanqan läduchö, Nëguebchö, Sefelächö+ y ladërakunachö llapan markakunata y llapan gobernantinkunatam ushakätsirqan, manam ni jukllëllatapis kawëkaqtaqa dejarqantsu.+ Awmi, Israelpa Diosnin Jehovä mandanqannömi Josuëqa llapan nunakunata wanutsirqan.+ 41 Josuëqa Cades-Barnëapita+ Gäzayaqmi+ markakunata ushakätsirqan. Y Gosenchö llapan markakunatam+ hasta Gabaonyaq+ ushakätsirqan. 42 Tsë kuti guërrata ruraq yarqunqanchöqa, israelïtakunata yanaparnin Israelpa Diosnin Jehovä pelyaptinmi, Josuëqa tsë llapan markakunata y gobernantinkunata ushakätsirqan.+ 43 Tsëpitanam Josuëqa israelïta soldädunkunawan, Guilgalchö+ campamentuman kutirqan.