Cantar de los Cantäres
8 Turï kaptiki
y mamänïpa chichinta chichir* winashqa kaptikiqa,
cällichö tinkurpis mutsarkoqmanchi,+
y manachi nunakuna penqapäyämanmantsu.
2 Tsëqa imëka rurëta yachatsimaq
mamänïpa wayintachi pushaqman.+
Tsëchöchi shumaq pukutaq o mushkoq vïnuta qaraqman.
Tsëllaraq pallashqa granädapitachi
jügutapis ruramüman.
3 Izquierda makikiwanchi peqäta o umäta shullpapämankiman
y derëcha makikiwanchi waqumankiman o makallamankiman.+
4 Jerusalenpita warmikuna rogakuyashqëki,*
ama parlapäyämëtsu ni obligayämëtsu mana kuyanqä nunata kuyanäpaq”.+
5 Sulamïta shipashpa turinkunam kënö niyan: “Rikäyë, ¿pitan taqë warmi tsunyaq sitiupita shamuykan?
Kuyanqan jövinta waqukushqam o makallakushqam shamuykan”.
Sulamïta shipashnam kënö nin: “Manzäna planta jawanchö punuykaqtam riyatsirqä o rikchatsirqä.
Tsëchömi yurikurqëki.
Tsëchömi mamëkiqa qeshpikushurqëki.
6 Imëpis mana qonqamänëkipaq sëlluwan sellarkoqnö, shonquykichö katsimë.
Rikrëkiman sellarkoqnö imëpis yarparäkamë.
Kë kuyakuytaqa, wanuytanöpis manam michëta puëdïtsu.+
Kë kuyakuypitaqa, manam Sepultürapitanöpis* qeshpita puëdïtsu.
Kë kuyakuyqa, rupakoq ninanöran, Jehoväpa* ninannö.+
7 Kë kuyakuytaqa, manam mëtsika yakupis upitsita puëdinmantsu.+
Manam mayukunapis* apëta puëdinmantsu.+
Kuyanqä jövinta dejanäta munar y apakamëta munar,
juk nuna imëka riquëzankunata munatsimaptimpis manam chaskïmantsu”.*
8 Sulamïta shipashpa turinkunam kënö niyan: “Panintsikqa llullullaran,+
chichinkunapis* manaran winanraqtsu.
Pillapis, pëwan casakuyta munar asheq shamuptinqa,
¿imataraq rurashun?
9 Panintsik alli següru murällanö kaptinqa,
tsëchömi pläta metalpita shumaq törrita rurashun.
Peru kichakaq y wichqakaq punkunöpis kaptinqa,
cedru qerupita tablonwanmi trancarkushun”.
10 Sulamïta shipashnam kënö nin:
“Noqaqa murällanömi kä.
Chichïkunapis* alli törrinömi.
Tsëmi kuyanqä jövinwanqa kushishqa y tranquïlu kakü.
11 Salomonpam, Baal-Hamot sitiuchö üvas chakran kapurqan.+
Tsë plantakunatam chakra cuidaq nunakunata* arrendakoq.
Y arrendaq nunakunaqa cada ünum, cada cosëchapita mil pläta qellëta pagayaq.
12 Teyta Salomon, tsë mil pläta qellëqa qampam,
y doscientusnam planta cuidaqkunapaq kanqa.
Peru noqapaqa, kikïpam üvas chakrä kapaman y kikïllapaqmi”.
13 Mitsikoq jövinnam kënö nin: “Huertakunachö päraq shipash,+
amïgukunam parlanqëkita wiyëkäyan.
Noqapis voznikitam wiyëta munä”.+
14 Sulamïta shipashnam kënö nin:
“Alläpa kuyanqä jövin, luychunöraq*+ cörrimuy.
Jinan höra shamuy.
Pukutaq o mushkoq plantakuna kanqan jirkakuna janampa, mallwa luychunöraq cörrimuy”.