Josuë
5 Lamar lädunmampa kawaq cananeu nunakunapa+ gobernantinkuna y Jordan mayupa* lädunmampa* kawaq amorreu nunakunapa+ gobernantinkunam, israelïtakuna tsimpayänampaq Jordan mayuta Jehovä Dios qochakätsishqa kanqanta musyariyarqan. Tsëta musyëkurmi alläpa mantsakäyarqan+ y manam valorninkunapis karqannatsu israelïtakunawan pelyayänampaq.+
2 Tsëpitanam Jehovä Diosqa Josuëta nirqan: “Pedernal rumipita cuchillukunata rurë,+ ollqukunata penqëninkunachö yapë señalatsinëkipaq”.* 3 Tsënam Josuëqa pedernal rumipita cuchillukunata rurarqan. Tsëpitanam Guibeat-Haaralot* sitiuchö ollqukunata penqëninkunachö señalatsirqan.+ 4 Tsëtaqa Josuë rurarqan Egiptupita yarqamoq guërrapaq akrashqa llapan ollqukuna, tsunyaq jirkachö wanur o wañur ushakäyashqa kayaptinmi.+ 5 Egiptupita yarqoq ollqukunaqa, penqëninkunachö señalakushqam kayarqan. Peru tsunyaq jirkakunachöna yurikoq kaqkunaqa, manam señalakushqatsu kayarqan. 6 Israelïtakunaqa, Egiptupita yarqoq guërrapaq akrashqakuna wanur ushakäyanqanyaqmi cuarenta watapa tsunyaq jirkakunachö puriyarqan.+ Pëkunaqa manam Jehovä Diosta cäsuyarqantsu,+ tsëmi mana cäsukuyanqampita Teyta Jehoväqa nirqan, lichipis, mielpis mëtsika kanqan+ markakunaman mana yëkuyänampaq kaqta.+ Unë awilunkunatam Teyta Jehovä änirqan tsë sitiutaqa cäsukoqkunata entreganampaq.+ 7 Tsë mana cäsukoq nunakunapa rantinmi tsurinkunana kayarqan.+ Tsë tsurinkunataqa, viäjichö mana señalakushqa kayaptinmi penqëninkunachö Josuë señalatsirqan.
8 Ollqu kaqkunata penqëninkunachö señalariyaptinqa, llapan israelïtakunam pëkuna alliyäyanqanyaq campamentuchö quedakuyarqan.
9 Tsëpitanam Jehovä Diosqa Josuëta nirqan: “Kanampitam egipciu nunakuna penqapäyäshunqëkita ushakätsirqö”.* Tsëmi tsë sitiutaqa Guilgal*+ nir kananyaqpis reqiyan.
10 Israelïtakunaqa Jericö markapa tsunyaq pampankunachö këkaq Guilgal sitiuchömi quedakuyarqan. Tsëchömi killapa catorci junaqninchö+ tardipëpa Pascua Fiestata celebrayarqan. 11 Pascua Fiestata celebrayanqampita waränin junaqnam, chakrakuna wayunqantana mikur qallëkuyarqan. Tsë junaqmi levadürannaq tantata+ y ankashqa gränukunata mikuyarqan. 12 Chakrakuna wayunqanta israelïtakuna mikur qallayanqan junaqpitam, manä mikuyqa shikwamurqannatsu.+ Manä mikuy manana shikwamuptimpis, tsë wataqa Canaan markakunachö chakrakuna wayunqantanam mikuyarqan.+
13 Jericö markapa amänunchö këkarmi, Josuëqa juk nunata rikarqan+ espädan aptashqa shëkaqta.*+ Tsënam Josuëqa witïkur kënö tapurqan: “¿Noqakunapa favornïkunaku o chikimaqnïkunapa favorninku këkanki?”. 14 Pënam, “manam, noqaqa Jehovä Diospa soldädunkunapa mandaqnin karmi* shamurqö”+ nirqan. Tsënam Josuëqa urkumpis patsaman chanqanyaq qonqurikurir, “teytallë, ¿ima nillämaqtan shamurqunki?” nirqan. 15 Tsënam Jehovä Diospa soldädunkunapa mandaqninqa Josuëta nirqan: “Sagrädu sitiuchömi këkanki, llanqikita chakikipita jipi”. Tsënam Josuëqa llanqinta jipikurqan.+