Romänus
13 Teyta Diospita mana karqa, manam autoridä kanmantsu,+ tsëmi llapan nunakuna autoridäkunata respetar cäsukuyätsun.+ Llapan autoridäkunatapis, tukuyläya carguchö kayänampaqmi Teyta Dios churashqa.+ 2 Tsëmi autoridäkunapa contran churakaqqa, Teyta Dios patsätsinqampa contran këkan, y patsätsinqampa contran kaqkunaqa, condenashqam kayanqa. 3 Allita ruraqkunaqa manam gobernaqkunata mantsayantsu, peru mana allita ruraqkunam sïqa mantsayan.+ Tsëqa, ¿autoridäkunata mana mantsarku kawakuyta munanki? Tsëqa imëpis alli kaqta rurë,+ y pëkunam alabayäshunki. 4 Pëkunaqa qampa biennikipaqmi Teyta Diosta sirwikäyan. Peru mana allita rurëkarqa, mantsakuy, autoridäkunaqa manam ardëllatsu* espädata puritsiyan. Pëkunaqa mana allita ruraqkunata castigayänampaqmi Teyta Diospa sirweqninkuna kayan.
5 Tsëmi qamkunaqa pëkunata respetar cäsukuyänëki, manam castigashqa këta mantsarllatsu, sinöqa concienciëkikunarëkurmi.+ 6 Gobernaqkunaqa Diospa sirweqnin karmi nunakunata imëpis sirwikäyan. Tsëmi qamkunaqa impuestuta pagayanki. 7 Llapankunawan rurayänëkipaq kaqta cumpliyë: impuestuta mañakoqtaqa, impuestuta pagayë;+ tribütuta mañakoqtaqa, tribütuta pagayë; cäsukuyänëkita munaqkunataqa, cäsukuyë;+ respetayänëkita munaqkunataqa, respetayë.+
8 Mana kutitsita puëdirqa, ama prestakuyëtsu, peru këtam sïqa rurayänëki: jukniki juknikim kuyanakuyänëki.+ Nuna mayinta kuyaqqa, ley ninqantam cumplishqa.+ 9 Awmi, “mana majëkikunawanqa manam oqllanakuyänëkitsu,+ manam nuna mayikikunata wanutsiyänëkitsu,+ manam suwakuyänëkitsu,+ manam nuna mayikikunapa imantapis munapäyänëkitsu”+ neq mandamientukuna y ima mandamientupis, kë mandamientullamanmi chätsikun: “Qamkuna kuyakuyanqëkinömi nuna mayikikunatapis kuyayänëki”.+ 10 Kuyakoq nunaqa, manam nuna mayinta ima mana allitapis rurantsu.+ Tsëmi kuyakoq nunaqa ley ninqanta cumplin.+
11 Qamkunaqa musyayankim punukashqa këkäyanqëkipita riyayänëki o rikchayänëki hörana kanqanta,+ tsëmi ninqäkunata rurayänëki. Kananqa creikoq tikranqantsikpitapis mas këllachönam salvacionnintsik këkan. 12 Paqasqa pasëkannam y junaqnam chëkämun. Tsëmi paqaspa rurayanqan rurëkunata dejashun+ y junaqpa utilizäyanqan armadürata vistikushun.+ 13 Junaqpanö alli portakushun,+ ama lluta portakuyänan fiestakunachö,* machakur, tukuyläya melanëpaq rurëkunata rurar, mana penqakur mana allikunata rurar,*+ pelyar y chikipänakurqa kashuntsu.+ 14 Tsëpa rantinqa, Señor Jesucristu imanö kawanqampita yachakuyë,+ y ama jutsata* ruraq cuerpuykikuna munanqanta rurayänëkipaq puntallapitana pensar kayëtsu.+