2 Crönicas
21 Jehosafat wanuriptinnam, David Markaman pampayarqan. Tsëpitanam Jehoram jutiyoq tsurinna gobernar qallëkurqan.+ 2 Y wawqinkunam kayarqan Azarïas, Jehiel, Zacarïas, Azarïas, Miguel y Sefatïas. Pëkunam Israelchö gobernaq Jehosafatpa tsurinkuna kayarqan. 3 Pëkunatam Jehosafatqa mëtsika öruta, pläta metalta, imëka väleq cösaskunata y alli murallashqa markakunatapis Judächö qararqan.+ Peru Jehoramtaqa+ mayor kaptinmi gobernanampaq churarqan.
4 Gobernanti kanampaq yëkurirmi Jehoramqa mas puëdeq këta munar llapan wawqinkunata+ y Israelchö wakin dirigentikunata wanutsirqan. 5 Jehoramqa treinta y dos watayoq këkarmi gobernar qallarqan. Y puwaq watapam Jerusalen markachö gobernarqan.+ 6 Y Acabpa wamranwan casakushqa karmi,+ Acabpa familiankunanö y Israelpa gobernantinkunanölla,+ Jehovä Diosta mana cäsukur imëka mana allikunata rurarqan. 7 Tsënö kaptimpis, Jehovä Diosqa Davidtam änishqa karqan+ kastampita* imëpis Judächö gobernanti kanampaq.+ Tsëmi Judä nacionta ushakätsirqantsu.
8 Jehoram gobernanqan witsanmi, edomïta nunakunaqa Judä nacionpa podernimpita yarqurir+ kikinkuna juk gobernantita churayarqan.+ 9 Tsëmi Jehoramqa soldädukunapa mandaqninkunawan y guërrapaq carrëtankunawan ëwarqan. Tsënam edomïta soldädukunaqa Jehoramta y carrëtakunata manejaqpa mandaqninkunata atacayänampaq entëru lädupa churanakuyarqan. Peru Jehoramqa paqaspam atacarqan y edomïta soldädukunatam vencirqan. 10 Edomïta nunakunaqa manam kananyaqpis Judä nacionpa poderninchötsu kayan. Tsë witsankunam Libnä+ nunakunapis, Judä nacionpa podernimpita rakikäyarqan. Tsënöqa karqan unë kastankunapa Diosnin Jehoväta Jehoram manana sirwinqampitam.+ 11 Jehoramqa Judä jirkakunachömi, sagrädu altu sitiukunata rurarqan+ Jerusalenchö täkoqkuna* Diosta dejarir* santukunata adorayänampaq. Tsëmi Judä nunakunapis Teyta Diosta cäsuyarqannatsu.
12 Tsënö këkaptinmi Diospa willakoqnin Elïas+ Jehoramman kënö nir cartakurqan: “Unë kastëkipa Diosnin Jehovämi kënö nishunki: ‘Qamqa manam papäniki Jehosafatnötsu+ ni Judächö gobernaq Asänötsu+ cäsumarqunki. 13 Tsëpa rantinqa Israelchö gobernantikuna rurayanqantam qatirqunki.+ Y Acabpa kastankuna jukwan jukwan kakoq* cuenta santukunata adorayanqannöllam,+ noqata dejaratsimar Judächö y Jerusalenchö nunakunata santukunata adoratsirqunki.*+ Hasta papänikipa tsurinkunatapis, wawqikikuna këkäyaptinmi wanutsirqunki.+ Pëkunaqa qampitapis mas alli nunam kayarqan. 14 Kananqa tsëta ruranqëkipitam noqa Jehovä, warmikikunata, tsurikikunata y gobernanqëki nunakunata castigashaq y kapushunqëki cösaskunatapis llapantam ushakätsishaq. 15 Qampis imëka qeshyawanmi sufrinki. Hasta pacha nanëwanmi grävi qeshyanki,* tsëmi maslla antsaptiki aqishnikipis* yarqamunqa’”.
16 Tsëmi Jehovä Dios munaptin,+ etïopi nunakunapa amänunchö täkoq* filisteu+ y ärabe+ nunakuna Jehorampa contran churakäyarqan. 17 Y Judä markakunatam atacayarqan. Palaciu wayiman yëkuskirmi imëka cösaskunata apakuyarqan.+ Tsënöllam Jehorampa warminkunata y tsurinkunatapis apakuyarqan. Jehoacaz*+ jutiyoq menor tsurinllam quedarqan. 18 Tsëpitanam Jehovä Diosqa Jehoramta castigarqan. Tsëmi pacha nanëwan* grävi qeshyarnin alliyarqannatsu.+ 19 Ishkë wata cumpliriptinnam maslla antsakurkuptin aqishnin* yarqaramurqan. Tsë qeshyawanqa llakipëpaqmi* sufrirqan, y tsënö qeshyëkarllam wanukurqan. Y marka mayinkunaqa manam unë kastankuna wanukuptin rurayanqannöqa yantallatapis rupatsiyarqantsu.+ 20 Jehoramqa treinta y dos watayoq këkarmi gobernar qallarqan, y puwaq watapam Jerusalenchö gobernarqan. Wanukuptinqa o wañukuptinqa manam ni pï waqarqantsu ni llakirqantsu. Pëtaqa David Markaman pamparpis,+ manam gobernantikunapa sepultüranmanqa pampayarqantsu.+