Levïticu

8 Tsëpitanam Teyta Jehoväqa Moisesta kënö nirqan: 2 “Aarontawan tsurinkunata qayatsi,+ y pëkunapaq ruratsinqëki röpakunata,+ shumaq pukutaq o mushkoq aceitita,+ jutsankunapita* perdonashqa kayänampaq apayämunqan töruta, ishkë carnërukunata y canastachö levadürannaq tantakunata alistë.+ 3 Y llapan israelïtakunata mandë carpa* wayipa yëkunanchö juntakäyänampaq”.

4 Tsënam Moisesqa Teyta Jehovä mandanqannölla rurarqan, y llapan israelïtakunam carpa* wayipa yëkunanchö juntakäyarqan. 5 Tsëchömi Moisesqa israelïtakunata, “Teyta Jehovämi këta ruranapaq mandakushqa” nirqan. 6 Tsëpitanam Moisesqa Aarontawan tsurinkunata qayëkatsir bañatsirqan.*+ 7 Tsëpitanam Aaronta yuraq largu röpata+ vistiratsir wachukuwan+ tseqllanta watapurqan. Tsëpitanam mangannaq largu röpata+ y mandilninta+ vistiratsir juk mas wachukuwan+ tseqllanta chachaq watapurqan. 8 Y pechërata+ wallqarkatsirmi Urimta y Tumimta+ pechëra rurinman churarqan. 9 Tsëpitanam peqa o uma wankunan+ wankutsirqan, y alli kaq örupita sagrädu vinchatam urkunman churapurqan, tsëqa Teyta Dios akrashqa kanqantam rikätsikoq.+ Teyta Jehovä mandanqannöllam Moisesqa tsë llapanta rurarqan.

10 Teyta Diospa rikëninchö sagrädu kanampaqmi, Moisesqa carpa* wayiman y tsëchö kaqkunaman sagrädu aceitita+ pillchitsirqan.* 11 Tsëpitanam pishtashqa animalkunata rupatsiyänan altarman, tsë altarchö utilizäyanqan kaqkunaman, jatun lavatoriuman y tätsiyänampaq armazonman sagrädu aceitita qanchis kuti pillchitsirqan,* tsënöpa Teyta Diospa rikëninchö tsëkuna sagrädu kanampaq. 12 Tsëpitanam sacerdöti karnin Teyta Diosta sirwinampaq Aaronpa peqanman o umanman sagrädu aceitita jicharqan.+

13 Tsëpitanam Moisesqa Aaronpa tsurinkunata pë kaqman ëwayänampaq nirqan. Y largu röpakunata vistiratsirmi wachukuwan tseqllankunata watarqan. Tsëpitanam wankukuyänanwan+ peqankunata o umankunata wankurqan. Teyta Jehovä mandanqannöllam Moisesqa tsë llapanta rurarqan.

14 Moisesqa jutsankunapita* perdonashqa kayänampaq töruta apayänampaqmi nirqan, y Aaronwan tsurinkunam tsë törupa peqanman o umanman makinkunata churayarqan.+ 15 Tsëpitanam Moisesqa tsë töruta pishtarqan, y yawarnintam altarpa waqrankunaman dëdunwan shututsirqan,+ tsënöpa Teyta Diospa rikëninchö limpiu kanampaq. Wakin yawartanam altarpa chakinman jicharqan, tsënöpa Teyta Diospa rikëninchö altar limpiu kanampaq, y jutsata* rurayanqampita apayanqan animalkunata tsëchö rupatsiyänampaq. 16 Tsëpitanam Moisesqa tsë törupa aqishninchö* wirata, ñatinninchö wirata, ishkan riñonninta y riñonninkunachö wirata jipirkur altarchö rupatsirqan.+ 17 Tsë törupa qaranta, ëtsanta y panzantaqa, campamentupita karuman apëkurnin ushakanqanyaq rupatsiyänampaqmi mandakurqan.+ Teyta Jehovä mandanqannöllam Moisesqa tsë llapanta rurarqan.

18 Tsëpitanam Moisesqa, Teyta Diospaq ushakanqanyaq rupatsina qarëpaq apayanqan carnëruta apayänampaq nirqan, y Aaronwan tsurinkunam tsë carnërupa peqanman o umanman makinkunata churayarqan.+ 19 Tsënam Moisesqa tsë carnëruta pishtarqan, y altarpa llapan kuchunmanmi yawarninta pillchitsirqan.* 20 Tsë carnërupa ëtsantam prësa prësa roqurqan, tsëpitanam wiranta, peqanta o umanta y roqunqan prësakunata Teyta Diospaq rupatsirqan. 21 Tsëpitanam tsë carnërupa aqishninta* y chakinkunata yakuwan awir* llapan carnëruta altarchö Teyta Diospaq rupatsirqan, tsëqa Teyta Jehoväpaq ushakanqanyaq rupatsina qarëmi karqan. Ninawan rupanqanqa Teyta Diosta alläpam gustarqan. Teyta Jehovä mandanqannöllam Moisesqa tsë llapanta rurarqan.

22 Tsëpitanam Moisesqa, sacerdötikuna carguta chaskiyänampaq apayanqan juknin kaq carnëruta apayänampaq nirqan,+ y Aaronwan tsurinkunam tsë carnërupa peqanman o umanman makinkunata churayarqan.+ 23 Tsënam Moisesqa tsë carnëruta pishtarqan, y Aaronpa derëcha rinrimpa kuchunta, derëcha makimpa maman dëdunta y derëcha chakimpa maman dëdunta tsë yawarwan llushirqan. 24 Tsëpitanam Moisesqa Aaronpa tsurinkunata pëman ëwayänampaq nirqan, y derëcha rinrinkunapa kuchunta, derëcha makinkunapa maman dëdunta y derëcha chakinkunapa maman dëdunta tsë yawarwan llushirqan. Y wakin yawartanam altarpa llapan lädunman pillchitsirqan.*+

25 Tsë carnërupa wiranta, chupanchö wirata, aqishninchö* wirata, ñatinninchö wirata, ishkan riñonninta, riñonninkunachö wirata y derëcha kaq chankantam rakirqan.+ 26 Teyta Jehoväpa rikëninchö këkaq levadürannaq tantakunayoq+ canastapitam levadürannaq juk roscata, aceitiwan pichushqa juk roscata+ y juk gallëtata jipirqan. Tsëpitanam carnërupa chankan y wiran jananman churarqan. 27 Tsë llapantam Aaronpa y tsurinkunapa makinman churarqan. Y Teyta Jehoväpa rikëninchömi puntaman y qepaman tsë qarëkunata kuyutsiyarqan. 28 Tsëpitanam Moisesqa, altarchö rupëkaq wakin ushakanqanyaq rupatsina qarëkunapa jananchö tsë llapanta rupatsirqan. Tsëqa sacerdötikuna carguta chaskiyaptin Teyta Jehoväpaq rupatsiyanqan qarëmi karqan, y ninawan rupanqanqa Teyta Diosta alläpam gustarqan.

29 Tsëpitanam Moisesqa tsë carnërupa pëchunta aptarkur Teyta Jehoväpa rikëninchö puntaman y qepaman kuyutsirqan.+ Carguta chaskirnin sacerdötikuna apayanqan carnërupa pëchunqa, Teyta Jehovä Moisesta mandanqannöllam kikin Moisespaq karqan.+

30 Moisesqa sagrädu aceitiwan+ y altarchö këkaq yawarwanmi Aaronta y röpanta, Aaronpa tsurinkunata y röpankunata pillchitsirqan,* tsënöpa Aaron, tsurinkuna y röpankuna Teyta Diospa rikëninchö limpiu kayänampaq.+

31 Tsëpitanam Moisesqa Aarontawan tsurinkunata kënö nirqan: “Tsë ëtsataqa carpa* wayipa yëkunanchömi yanuyänëki.+ Y canastachö* këkaq tantatawan juntum tsëchö mikuyänëki. Tsënö rurayänëkipaqmi Teyta Diosnintsik kënö nir mandamarqan: ‘Aaronwan tsurinkunam mikuyänan’.+ 32 Sobraq ëtsata y tantataqa ushakanqanyaqmi rupatsiyänëki.+ 33 Sacerdöti kayänëkipaq carguta chaskiyänëkipaqqa, qanchis junaqpam tsëchö kayänëki.+ Tsëmi carguta chaskiyanqëkiyaq, carpa* wayipa yëkunanllachö qanchis junaqpa quedakuyänëki. 34 Kanan ruranqantsiktaqa, jutsata* rurayanqëkipita perdonashqa kayänëkipaqmi Teyta Jehovä mandakushqa.+ 35 Y Teyta Dios mandakushqa kaptinmi, paqasta junaqta carpa* wayipa yëkunanchö qanchis junaqpa quedakuyänëki.+ Y mana wanuyänëkipaqmi o wañuyänëkipaqmi, Teyta Jehovä mandakunqanta cumpliyänëki”.+

36 Aaronwan tsurinkunaqa, Moisesta Teyta Jehovä mandanqannöllam llapanta rurayarqan.