Jeremïas
27 Josïaspa tsurin Jehoiaquim Judächö gobernar qallanqan witsanmi, Teyta Jehoväqa Jeremïasta parlarparqan. 2 “Teyta Jehovämi këta nimashqa: ‘Yügukunata y kuyuntankunata o labräsankunata rurarkur matankëkiman churakuy. 3 Y Judächö gobernaq Sedequïasta rikaq Jerusalenman shamoq nunakunawan, Edom+ kinrëchö gobernaqman, Moab+ kinrëchö gobernaqman, Ammonpita+ nunakunata gobernaqman, Tïruchö+ gobernaqman y Sidonchö+ gobernaqman tsë yügukunata apatsi. 4 Y patronninkunata kënö niyänampaq mandë:
“Israel nunakunapa Diosnin, angelkunata mandaq Teyta Jehovämi këta nin, y këtam patronnikikunata niyänëki: 5 ‘Noqam alläpa puëdeq kar puëdeq rikräwan, entëru patsata, nunakunata y patsachö llapan animalkunata kamarqö. Y entreguëta munanqä nunatam* entregarqö.+ 6 Kananqa, Babiloniachö gobernaq sirwimaqnï Nabucodonosorpa+ cargunmanmi kë entëru nacionkunata churarqö. Y pëta sirwiyänampaqmi chukaru animalkunatapis cargunman churarqö. 7 Y nacionninkuna dominanqan tiempu ushanqanyaqmi, mëtsë nacionpita nunakuna pëta, tsurinta y willkanta sirwiyanqa.+ Tsëpitanam mëtsika nacionkunapa y puëdeq gobernaqkunapa esclävunkuna kayanqa’.+
8 ‘Y mëqan nacionpis o gobiernupis, Babiloniachö gobernaq Nabucodonosorta sirwita mana munaptin y yügushqanö mandädunman mana churakaptinqa, Babiloniachö gobernaq pëkunata ushakätsinqanyaqmi, espädawan ushakätsiyänanta, y mallaqëpita y qeshyawan wanuyänanta permitishaq’+ ninmi Teyta Jehovä.
9 ‘Tsëqa ama willakoqkunata, suerti qateqkunata, suëñukuna imapaq kanqanta musyaqkunata, magia ruraqkunata y brüjukuna niyäshunqëkita wiyayëtsu. Pëkunaqa kutin kutinmi nikäyäshunki: “Qamkunaqa manam Babiloniachö gobernaqta sirwiyankitsu”. 10 Pëkunaqa mana rasumpa kaqtam willakuykäyan. Tsëmi pëkunata cäsuyaptikiqa, markëkikunapita karuman apayäshunki, mëtsëchö ushayanki y wanurmi ushakäyanki.
11 Peru yügushqanö Babiloniachö gobernaqpa mandädunman churakaq nunakunaqa, noqa permitiptïmi markankunachö quedakuyanqa. Y murupakurmi markankunachö kawayanqa’ ninmi Teyta Jehovä’”’”.
12 Tsënöllam Judächö gobernaq Sedequïastapis+ nirqä: “Yügushqanö Babiloniachö gobernaqpa mandädunman churakë, y pëta y nacionninchö nunakunata sirwi. Tsëqa imëpis kawëkankim.+ 13 ¿Imanirtan qampis y gobernanqëki nunakunapis, espädawan ushakäyankiman,+ y mallaqëpita+ y qeshyawan+ wanuyankiman? ¿Imanirtan Babiloniachö gobernaqta mana sirweqkunapaq, Teyta Jehovä ninqannölla qamkunatapis pasayäshunkiman? 14 Ama willakoqkuna niyäshunqëkita wiyayëtsu. Pëkunaqa mana rasumpa kaqta parlarmi nikäyäshunki:+ ‘Qamkunaqa manam Babiloniachö gobernaqta sirwiyankitsu’.+
15 ‘Tsë willakoqkunaqa, noqa mana mandëkaptïmi jutïchö tsëkunata willakuykäyan. Tsëmi pëkunata cäsurqa, qamkuna y tsëkunata willayäshoqnikikunapis mëtsëman apashqa kayanki, y wanurmi ushakäyanki’ ninmi Teyta Jehovä”.+
16 Sacerdötikunata y markachö nunakunatam nirqä: “Teyta Jehovämi këta nin: ‘Ama willakoqkuna niyäshunqëkita wiyayëtsu. Pëkunaqa kutin kutinmi, mana rasumpa kaqta nikäyäshunki:+ “¡Rikäyë! Ichikllachönam Teyta Jehoväpa wayimpita apakuyanqan kaqkunata Babiloniapita kutitsimunqa”.+ 17 Tsëmi ama pëkunata wiyayëtsu. Tsëpa rantinqa, imëpis kawëkäyänëkipaq Babiloniachö gobernaqta sirwiyë.+ ¿Imanirtan kë markaqa rumillana quedanman? 18 Peru rasumpa willakoqkuna karqa y noqa Jehovä ninqäkunata willakurqa, noqa Jehoväpa wayïchö, Judächö gobernaqpa wayinchö* y Jerusalenchö quedaqkunata Babiloniaman mana apakuyänampaq, noqa angelkunata mandaq Teyta Jehoväman rogakayämutsun’.
19 Angelkunata mandaq Teyta Jehoväqa, kë markachö quedaq templupa columnankunapaq,+ Lamar niyanqan+ cobripita lavatoriupaq, carrëtakunapaq+ y wakin utilizäyanqan kaqkunapaqmi parlarqan. 20 Judächö gobernaq Jehoiaquimpa tsurin Jeconïasta, y Judäpita y Jerusalenpita reqishqa nunakunata Babiloniaman aparpis, manam tsëkunataqa Babiloniachö gobernaq Nabucodonosor Babiloniaman apakurqantsu.+ 21 Awmi, noqa Jehoväpa wayïchö, Judächö gobernaqpa wayinchö y Jerusalenchö quedaq kaqkunapaqmi, noqa Israel nunakunapa Diosnin angelkunata mandaq Teyta Jehovä këta nï: 22 “Tsëkunataqa Babiloniamanmi apakuyanqa.+ Y pëkunata yarpar kë kinrë markankunaman kutitsimunqä junaqyaqmi, tsë nacionchö kayanqa” tsëtam nï noqa Jehovä’”.+