Jeremïas
28 Tsë watallam, Judächö Sedequïas+ chusku watapa manaraq gobernaptin, pitsqa kaq killachö, sacerdötikuna y wakin nunakunapa puntanchö, Gabaonpita+ Azurpa tsurin willakoq Hananïas, Teyta Jehoväpa wayinchö kënö nimarqan: 2 “Israel nunakunapa Diosnin angelkunata mandaq Teyta Jehovämi këta nin: ‘Babiloniachö gobernaqpa mandädunchö yügushqanö kayanqëkipitam salvayashqëki.+ 3 Y Babiloniachö gobernaq Nabucodonosor, noqa Jehoväpa wayïpita llapan apakunqantam, këpita ishkë watallatana Babiloniapita kutitsimushaq’”.+ 4 “‘Babiloniachö gobernaqpa mandädunchö yügushqanö kayanqampita salvarmi, Judächö gobernaq Jehoiaquimpa+ tsurin Jeconïasta+ y Babiloniaman apayanqan Judäpita nunakunata,+ markankunaman kutitsimushaq’ ninmi Teyta Jehovä”.
5 Tsëpitanam Teyta Jehoväpa wayinchö këkaq sacerdötikunapa y wakin nunakunapa puntanchö, willakoq Hananïasta Jeremïas parlaparqan. 6 Kënömi nirqan: “¡Tsënö kallätsun!* ¡Teyta Jehovä tsënö rurëkutsun! Qam ninqëkinölla Teyta Jehoväpa wayimpita, Babiloniaman apayanqankunata y tsëchö këkaq nunakunata Teyta Jehovä kutitsimutsun. 7 Tsënö kaptimpis, qam wiyëkaptiki y kë nunakuna wiyëkäyaptin willakunqäta wiyëkullë. 8 Qampis y noqapis manaraq willakoq kashqam, unë witsan willakoqkunaqa, mëtsë nacion nunakuna y puëdeq gobiernukuna, guërrachö kayänampaq kaqta, y imëka mana allikunawan y qeshyawan sufriyänampaq kaqta willakuyarqan. 9 Mëqan willakoqpis yamë këpaq willakuptinqa, tsë willakunqan cumplikaptinllam, tsë willakoqta Teyta Jehovä mandamunqanqa musyakanqa”.
10 Tsë höram willakoq Hananïasqa, Jeremïas puritsinqan yüguta, matankampita jipir ishkëman pakirqan.+ 11 Tsëpitanam Hananïasqa, llapan nunakunapa puntanchö kënö nirqan: “Teyta Jehovämi këta nin: ‘Tsënöllam këpita ishkë watallachöna, Babiloniachö gobernaqpa mandädunchö yügushqanö kayanqëkipita salvayashqëki. Y mëtsë nacionpita nunakuna yügutanö apayanqantam ushakätsishaq’”.+ Tsënö niptinnam Jeremïasqa ëwakurqan.
12 Jeremïas matankanchö puritsinqan yüguta, willakoq Hananïas pakinqampita ichik tiempullatam, Teyta Jehoväqa Jeremïasta kënö nirqan: 13 “Hananïasman ëwar këta nï: ‘Teyta Jehovämi këta nin: “Pakinqëki qerupita yügupa+ rantinmi fiërrupita yüguta ruranëki”. 14 Israel nunakunapa Diosnin Teyta Jehovämi këta nin: “Babiloniachö gobernaq Nabucodonosorta sirwiyänampaqmi, ninqänölla mëtsë nacionpita nunakunapa matankanman fiërrupita yüguta churashaq.+ Y chukaru animalkunatapis Babiloniachö gobernaqpa cargunmanmi churashaq”’”.+
15 Tsëpitanam Jeremïasqa willakoq Hananïasta+ nirqan: “¡Hananïas, kë ninqäta wiyarallämë! Qamtaqa manam Teyta Jehovätsu mandamushurqunki. Qamqa mana pasakunampaq kaqmanmi, kë markapita nunakunata confiakatsirqunki.+ 16 Tsëmi Teyta Jehovä këta nin: ‘¡Rikë! Kë patsapitam ushakätsishqëki. Noqa Jehoväpa conträ nunakunata churakätsinqëkipitam kë wata wanunki’”.+
17 Willakoq Hananïasqa, tsë watallam qanchis kaq killachö wanurqan.