Jeremïas
37 Tsëpitaqa Jehoiaquimpa tsurin Conïaspa*+ rantinmi, Josïaspa tsurin Sedequïasna+ gobernaq karqan. Pëtaqa Judächö gobernanampaqmi, Babiloniachö gobernaq Nabucodonosor churashqa karqan.+ 2 Peru Sedequïas, pëta sirweqkuna y tsë kinrë markachö nunakunaqa, manam Teyta Jehoväpa willakoqnin Jeremïas ninqankunata cäsukuyarqantsu.
3 Tsëpitanam gobernaq Sedequïasqa, Selemïaspa tsurin Jehucalta+ y sacerdöti Maasëyapa tsurin Sofonïasta,+ Diospa willakoqnin Jeremïasta kënö niyänampaq mandarqan: “Noqantsikpaq Jehovä Diosnintsikman mañakuykullë”. 4 Tsë witsanqa manaraq prësu karmi, Jeremïasqa libri purikarqan.*+ 5 Egiptuchö gobernaqpa soldädunkuna Egiptupita+ yarqushqa kayanqanta musyaskirmi, Jerusalenpa entëru lädunchö këkaq Caldëapita soldädukunaqa Jerusalenpita ëwakuyarqan.+ 6 Tsënam Teyta Jehoväqa Jeremïasta parlapar kënö nirqan: 7 “Israel nunakunapa Diosnin Teyta Jehovämi këta nin: ‘Noqaman mandayämushoqniki Judächö gobernaqtam kënö niyänëki: “Rikäyë, qamkunata yanapayäshunëkipaq shamuykaq Egiptuchö gobernaqpa soldädunkunaqa, nacionninkuna Egiptumanmi kutikuyanqa.+ 8 Caldëapita soldädukuna kutimurmi, kë markapita nunakunawan pelyayanqa. Y yëkamurmi, kë markatapis ninawan ushakätsiyanqa”.+ 9 Teyta Jehovämi këta nin: “Caldëapita soldädukunaqa manam ëwakuyanqatsu. Tsëmi, ‘Caldëapita soldädukunaqa ëwakuyanqam, y manam noqantsikta ushakätsimaqnintsik kutiyämunqatsu’ nir engañakuyëtsu. 10 Qamkunawan pelyëkaq Caldëapita llapan soldädukunata ushakätsiyaptiki, y herïdu këkaq soldädukunalla kawëkar quedayaptimpis, tsë kawëkar quedaqkunam carpankunapita* yarquskir, kë entëru markata ninawan ushakätsiyanqa”’”.+
11 Egiptuchö gobernaqpa soldädunkuna shamuykäyanqanta musyëkurmi, Caldëapita soldädukuna Jerusalenpita ëwakuyanqanchö,+ 12 Jeremïasqa marka mayinkunachö tocanqan herenciata chaskinampaq, Jerusalenpita Benjamin kinrëman+ ëwarqan. 13 Peru Benjamin Punku niyanqanman chëkuptinqa, Hananïaspa willkan y Selemïaspa tsurin soldädukunata mandaq Irïyam, rikrapita aptarkur Jeremïasta, “¡qamqa Caldëapita soldädukunatam yanapëkanki!” nirqan. 14 Tsënam Jeremïasqa, “¡tsëqa manam rasuntsu! ¡Noqaqa manam Caldëapita soldädukunata yanapëkätsu!” nirqan. Peru Irïyaqa manam Jeremïas ninqanta creirqantsu, tsëmi Jeremïasta prësuskir dirigeqkunaman aparqan. 15 Y dirigeqkunaqa Jeremïaswan alläpa cölerarmi,+ maqëkatsir secretariu Jehonatanpa wayinman prësutsiyarqan.+ Tsë witsanqa, pëpa wayinmi carcel karqan. 16 Jeremïastaqa calabözu rurinchö cuartukunamanmi prësuyarqan, y atska junaqmi tsëchö karqan.
17 Tsëpitanam gobernaq Sedequïasqa, Jeremïasta wayinman* apëkatsir,+ “¿imallataqa Teyta Jehovä nishurqunkiku?” nir pakëllapa tapurqan. Tsënam Jeremïasqa, “¡awmi!” nirqan. Y kënöpis nirqanmi: “¡Babiloniachö gobernaqpa makinchömi ushanki!”.+
18 Jeremïasqa gobernaq Sedequïasta kënöpis nirqanmi: “¿Qamta, sirwishoqnikikunata y markapita nunakunata, ima mana allita rurashqa kaptïtaq prësurëkätsiyämanki? 19 ¿Mëchötan këkäyan, ‘Babiloniachö gobernaqqa manam qamkunata ni kë nacionta ushakätseq shamunqatsu’ neq willakoqnikikuna?+ 20 Kananqa señorllä gobernaq, kë rogakunqäta wiyëkullë y mañakunqäta rurëkullë. Amana secretariu Jehonatanpa+ wayinman kutitsimënatsu, kutitsimaptikiqa tsëchömi ushakäshaq”.+ 21 Tsëmi gobernaq Sedequïasqa, Soldädukunapa Patiun+ niyanqanman Jeremïasta apayänampaq y tsëchö prësu katsiyänampaq mandakurqan. Y tanta ruraqkuna kawayanqan cällipita+ tantata rantïkurmi, cada junaq jukta qarayaq. Tsëtaqa rurayarqan, tsë markachö tanta manana kanqanyaqmi.+ Y Jeremïasqa, Soldädukunapa Patiun niyanqanchömi prësu quedakurqan.