2 Crönicas

28 Veinti watayoq këkarmi Acazqa+ gobernar qallarqan. Y dieciseis watapam Jerusalen markachö gobernarqan. Pëqa manam unë kastan Davidnötsu Jehovä Diosta cäsukurqan.+ 2 Israelchö gobernantikuna rurayanqantam rurarqan,+ hasta Baal santukunatam metalpita+ ruratsirqan. 3 Y santukunapaqmi Hinon pampachö* qarëkunata rupatsirqan, hasta wamrantam rupatsirqan+ tsë santukunata adorar. Tsë melanëpaq imëka mana allikunataqa rurarqan, Jehovä Dios qarqunqan unë nunakuna rurayanqanta qatirmi,+ tsë qarqunqan nunakunaqa manam israelïtatsu kayarqan. 4 Acazqa jirkakunachö, atska rämayoq jatusaq montikuna o jatusaq qerukuna chakinchö+ y sagrädu altu sitiukunachömi+ santukunapaq qarëkunata rupatsir qoyätseq o qoshnïtseq.

5 Tsëta ruranqampitam Jehovä Diosqa, Siriachö gobernaqpa+ poderninman entreguëkurqan, tsëmi pëkunaqa venciskir mëtsika prësukunata Damascu+ markaman apayarqan. Tsënöllam Israel gobernantipa poderninman entreguëkurqan, tsëmi pëkunapis mëtsikaqta wanutsiyarqan o wañutsiyarqan. 6 Juk junaqllachömi Remalïaspa tsurin Pëcah,+ cientu veinti mil valienti soldädukunata Judächö wanutsirqan. Tsënöqa wanuyarqan o wañuyarqan unë kastankunapa Diosnin Jehoväta mana cäsukuyanqampitam.+ 7 Efrainpita Zicrï jutiyoq valienti soldädum, gobernantipa tsurin Maasëyata, palaciuchö mandakoq Azricamta y gobernantipa mas puëdeq yanapaqnin Elcanätapis wanutsirqan. 8 Israelïtakunaqa Judäpitam warmitapis, ollqu y warmi wamrakunatapis doscientus milta prësu apayarqan. Tsënöllam imëka cösasninkunatapis Samaria markaman apayarqan.+

9 Samariaman apëkäyaptinmi Jehovä Diospa willakoqnin Oded, soldädukunata taripëkur kënö nirqan: “Judächö täkoq* nunakunawanqa Jehovä Diosmi cölerashqa kashqa, tsëmi venciyänëkita permitishqa.+ Peru mana llakipëpa* wanutsiyanqëkitaqa o wañutsiyanqëkitaqa Teyta Diosmi rikämushqa. 10 Judächö y Jerusalenchö täkoq* nunakunatam sirwishoqnikikuna kayänampaq kanan apayämurqunki.+ ¿Manaku qamkunapis Jehovä Diosta mana cäsukur jutsata* rurayarqunki? 11 Kananqa parlanqäta wiyayämë. Jehovä Diosmi qamkunawan cölerashqa këkan. Apayämunqëki prësukunata jinan höra kutitsiyë, qamkunapis tsë kastallam kayanki”.

12 Tsënö niptinmi Jehohananpa tsurin Azarïas, Mesilemotpa tsurin Berekïas, Salumpa tsurin Jehizquïas y Hadläipa tsurin Amasä, guërrapita chëkaq soldädukunata parlapäyarqan. Pëkunaqa kayarqan Efrainpa kastankunachö dirigentikunam. 13 Kënömi niyarqan: “Prësu apayämunqëkikunata ama yëkatsiyämuytsu, yëkatsiyämuptikiqa Jehovä Diosnintsikmi cölerakunqa y mas jutsamanmi* chäshun. Jutsata ruranqantsikllawannam Teyta Diosqa Israelwan cölerashqa këkan”. 14 Tsënö niyaptinmi soldädukunaqa prësu apayanqankunata dejaskiyarqan+ y apayanqan cösaskunatapis dirigentikunapa y llapan nunakunapa puntanchö dejaskiyarqan. 15 Tsënam prësukunata atiendiyänampaq akrayanqan nunakunaqa, apayanqan cösaskunachö röpakunata ashirir qalapächu këkaqkunata vistitsiyarqan y llanqitapis llanqitsiyarqan. Tsëpitanam qarayarqan mikuytapis, yakutapis y qarankunata jampiyänampaq aceititapis. Y ëwëta mana puëdeq kaqkunatam, ashnuman montarkatsir kastankunaman kutitsiyarqan palmërakuna kanqan Jericö markaman. Tsëpitanam tsë apaqkunaqa Samaria markata kutikuyarqan.

16 Tsë witsanmi Acazqa Asiria nacionchö gobernaqta yanapanampaq mañakurqan.+ 17 Yapëmi edomïta soldädukunaqa Judächö nunakunata atacayarqan y mëtsikaqtam prësu apayarqan. 18 Filisteukunapis+ Sefelächö+ y Nëguebchö këkaq markakunatam atacayarqan. Nëguebqa Judächömi karqan. Tsënö atacarmi duëñutukuyarqan Bet-Sëmes+ markata, Ayalon+ markata, Guederot markata, Socö markata y ichik markankunata, Timnä+ markata y ichik markankunata, Guimzö markata y ichik markankunata. Y tsë markakunachömi kawakuyarqan. 19 Israelchö gobernaq Acazmi, munëninkunata rurakuyänampaq Judächö nunakunata dejashqa karqan, tsëmi pëkunaqa Jehovä Diosta qonqëkur mana allikunata rurayarqan. Tsënö kayanqampitam Jehoväqa Judächö nunakunata sufritsirqan.

20 Asiriachö gobernaq Tiglat-Pilëserpis+ yanapanampa rantinmi, atacar sufritsirqan.+ 21 Acazqa Asiriachö gobernaq yanapananta munarmi Jehovä Diospa templumpita, palaciu wayipita+ y dirigentikunapa wayinkunapita llapan väleq cösaskunata qarashqa karqan. Tsënö qarëkaptimpis kikintam atacarqan. 22 Tsënö sufrikarnimpis Acazqa, masraqmi Teyta Jehovä chikinqankunata rurarqan. 23 Venceqnin Damascu+ nunakuna adorayanqan santukunapaqmi animalkunata pishtëkur rupatsirqan.+ Kënömi pensarqan: “Siriachö gobernaqkunata yanapanqannöllam, noqatapis animalkunata pishtëkur rupatsiptïqa yanapayämanqa”.+ Tsëta rurarmi kikimpis y israelïtakunapis mana allichö ushayarqan. 24 Tsëpitanam Acazqa Teyta Diospa templunchö këkaq llapan cösaskunata juntëkur ushakätsirqan.+ Y Jehovä Diospa templunta wichqaratsirmi,+ santukunata adorayänampaq Jerusalen markapa cada esquïnanchö altarkunata ruratsirqan. 25 Tsënöllam Judächö këkaq llapan markakunachöpis santukunapaq+ qarëkunata rupatsir qoyätsiyänampaq o qoshnïtsiyänampaq sagrädu altu sitiukunata ruratsirqan. Tsëta rurarmi unë kastankunapa Diosnin Jehoväta cöleratsirqan.

26 Gobernanti Acaz ruranqankunapitaqa, qallanampita ushananyaqmi Judächö y Israelchö Gobernaqkunapaq Willakoq Libru masllata willakun.+ 27 Acaz wanuriptinnam Jerusalen markaman pampayarqan, peru manam Israelchö gobernantikuna pamparäyanqanmanqa pampayarqantsu.+ Tsëpitanam tsurin Ezequïas gobernar qallëkurqan.