2 Samuel
10 Tiempuwannam ammonïtakunapa+ gobernantin wanukurqan o wañukurqan, y Hanun jutiyoq tsurinmi papänimpa rantin gobernanampaq yëkurqan.+ 2 Tsënam David nirqan: “Nahas kuyamanqannöllam* noqapis tsurin Hanunta kuyashaq”. Tsënö nirmi Davidqa sirweqninkunata mandarqan, papänin wanushqa kaptin Hanunta consolayänampaq. Peru ammonïtakunapa markanman Davidpa sirweqninkuna chäriyaptinmi, 3 ammonïtakunapa dirigeqninkunaqa Hanunta kënö niyarqan: “¿Davidqa rasumpatsuraq papänikita respetan? ¿Rasumpatsuraq consolayäshunëkipaq sirweqninkunata mandamushqa? ¿Manatsuraq ushakätsimënintsikta munar markantsikkunata rikapakuyänampaq mandamushqa?”. 4 Tsënö niyaptinmi Hanunqa, David mandanqan nunakunapa cärankunachö shaprankunata* juk kaq lädullata afeitarapur+ y röpankunatapis tseqllan jawanyaq roqurapur qarquskirqan. 5 Y tsënö penqakatsishqa kayanqanta gobernanti Davidta willariyaptinmi, willakoqkunata mandarqan kënö niyänampaq: “Shaprëkikuna* winanqanyaq Jericö markallachö+ quedakuyë, tsëpitanam kutikayämunki”.
6 Tiempuwannam ammonïtakunaqa musyariyarqan Davidta cöleratsishqa kayanqanta. Tsëmi willakoqkunata mandayarqan Bet-Rehobpita+ y Zobäpita+ veinti mil siriu soldädukunata minkakuyänampaq. Tsënöllam Maacäpa+ gobernantinmampis willakoqkunata mandayarqan mil soldädukunawan yanapanampaq, y Istob+ nunakunamampis mandayarqanmi döci mil soldädukunawan yanapayänampaq. 7 Tsëta musyëkurnam Davidqa Joabtawan llapan soldädunkunata y mas allin kaq soldädunkunatapis mandarqan.+ 8 Ammonïtakunaqa israelïtakunawan pelyayänampaqmi markapa punkunman churanakuyarqan, y Zobäpita y Rehobpita siriu soldädukunanam, Istobpita y Maacäpita soldädukunawan pampaman churanakuyarqan.
9 Joabqa, puntampa y qepampa siriu soldädukuna atacayaptinmi, mas allin kaq soldädukunata akrëkur pëkunawan pelyayänampaq churarqan.+ 10 Y ammonïtakunawan+ pelyayänampaqnam wakin soldädukunata churarqan y wawqin Abisaitam+ diriginampaq* mandarqan. 11 Kënömi nirqan: “Siriu soldädukuna vencimaptinqa, yanapamänëkipaq shamunki. Peru ammonïta soldädukuna qamta venciyäshuptikiqa noqam shamushaq yanapanaqpaq. 12 Marka mayintsikkunata y Teyta Diosnintsik entregamanqantsik markakunata defendinapaqqa valientim kanantsik.+ Jehovä Diosqa yanapamäshunmi”.+
13 Tsënam Joabwan soldädunkuna pelyayänampaq maslla ëwayaptin, siriu soldädukunaqa mantsakarnin qeshpir ëwakuyarqan.+ 14 Siriu soldädukuna qeshpir ëwakuyanqanta rikarmi, ammonïtakunapis Abisaipita y soldädunkunapita qeshpir markaman yëkuriyarqan. Tsëpitanam Joabwan soldädunkunaqa, ammonïtakunata dejarir Jerusalen markaman kutikuyarqan.
15 Israelïtakuna vencishqa këkäyaptimpis, siriu soldädukunaqa yapëmi pelyayänampaq juntakäyarqan.+ 16 Gobernanti Hadadëzermi+ Eufratis mayu*+ kuchunchö täkoq* siriukunata qayatsimurqan, y pëkunam Helam sitiuman shayämurqan. Y dirigeqninkunaqa Hadadëzerpa soldädunkunapa mandaqnin Sobacmi karqan.
17 Davidta willariyaptinnam, llapan soldädunkunata jinan höra qayatsirqan. Tsëpitanam Jordan mayuta* tsimpar Helam sitiuman chäyarqan. Tsënam siriu soldädukunaqa Davidwan y soldädunkunawan pelyayänampaq churanakuyarqan.+ 18 Davidwan soldädunkunam siriukunata venciyarqan. Tsënöllam carrëta manejaq setecientus soldädukunata wanutsiyarqan, y cawallunkuna montashqa ëwaq cuarenta mil soldädukunatapis wanutsiyarqanmi. Y soldädukunapa mandaqnin Sobactapis wanutsiyarqanmi.+ 19 Israelïtakuna tsënö venciriyaptinmi, gobernantikuna y Hadadëzerpa sirweqninkunaqa israelïtakunawan parlayarqan pëkunapa poderninchöna kayänampaq.+ Y siriukunaqa mananam masqa ammonïta soldädukunata yanapayarqannatsu.