Levïticu
21 Tsëpitanam Teyta Jehoväqa Moisesta kënö nirqan: “Aaronpa tsurin sacerdötikunatam këta ninëki: ‘Teyta Diospa rikënimpaq limpiu kayänampaqmi, sacerdötikunaqa wanushqa israelïta mayinkunapa ayanta yatayänantsu.+ 2 Tsënö kaptimpis, wanushqa mamampa, papänimpa, ollqu o warmi tsurimpa y wawqimpa ayantaqa yatëta puëdiyanqam. 3 Tsënöllam, manaraq casakushqa y piwampis mana oqllanakushqa, pëwan juntu kawashqa panimpa ayantapis yatëta puëdiyanqa. 4 Tsënö kaptimpis, Teyta Diospa rikënimpaq limpiu kayänampaqmi, juk nunapa warmimpa ayantaqa yatayänantsu. 5 Y manam peqankunata o umankunata+ ni shaprankunapa* puntanta rutukuyänantsu, ni wanushqakunapaq llakikur qarankunata roqukuyänantsu.+ 6 Sacerdötikunaqa, Teyta Jehoväpaq apayanqan mikuy cuenta qarëkunatam rupatsiyanqa, tsëmi Teyta Diospa rikënimpaq llapanchö limpiu kayänan,+ y Teyta Diospa jutintam respetayänan.+ 7 Sacerdötikunaqa Teyta Diosta sirwiyänampaq akrashqa karmi, qellëpaqrëkur jukwan jukwan kakoq* warmiwan,+ piwampis oqllanakushqana warmiwan y divorciakushqa warmiwanqa+ casakuyänantsu. 8 Sacerdötikunaqa noqapaq apayämunqëki mikuy qarëkunatam altarchö rupatsiyanqa,+ tsëmi pëkunata respetayänëki. Noqa Jehoväqa limpiu Diosmi kä,+ y limpiu sirwimaqnïkuna kayänëkipaqmi akrarqö,* tsëmi qamkunaqa sacerdötikunata respetayänëki.
9 Sacerdötipa warmi tsurin jukwan jukwan kakurqa, manam Teyta Diospa rikënimpaq limpiutsu kanqa, y papänimpis manam Teyta Diospa rikënimpaq limpiutsu kanqa. Tsëmi tsë warmita wanuratsir ninawan rupatsiyänëki.+
10 Sagrädu röpakunata vistikunampaq+ y sagrädu aceitiwan sacerdöti mayinkunapita akrashqa mandakoq sacerdötiqa,+ shumaqmi naqtsakunan, y manam llakikur röpanta rachinantsu.+ 11 Pëqa manam ni pï nunapa ayanta yatanantsu,+ ni wanushqa papänimpa ni mamampa ayantapis. 12 Sagrädu aceitiwan Teyta Diosta sirwinampaq akrashqa karmi,+ mandakoq sacerdötiqa Teyta Diospa sagrädu sitiunta respetanan,+ y manam tsë sitiupita yarqunantsu. Noqam Jehovä Diosnikikuna kä.
13 Mandakoq sacerdötiqa, piwampis mana oqllanakushqa warmillawanmi casakunan.+ 14 Manam viuda warmiwan, divorciäda warmiwan, pï ollquwampis oqllanakushqana warmiwan ni qellëpaqrëkur jukwan jukwan kakoq* warmiwanqa casakunantsu, sinöqa pï ollquwampis mana oqllanakushqa warmillawanmi casakunan. 15 Manam tsurinkunata penqakuyman churanantsu.+ Noqam Jehovä Diosnikikuna kä, y limpiu sirwimaqnïkuna kayänëkipaqmi akrarqö’”.*
16 Tsëpitanam Teyta Jehoväqa Moisesta kënö nirqan: 17 “Aarontam këta ninëki: ‘Mëqan tsurikipis mana sänu karninqa, manam Teyta Diospaq apayanqan mikuy qarëta altarchö imëpis rupatsinantsu. 18 Manam tsënö kaq tsurikikuna altarman witiyänantsu: wiskukuna o qaprakuna o cöjukuna, senqan dañakushqakuna,* jatun makiyoqkuna o jatun chakiyoqkuna, 19 chakin o makin pakishqakuna, 20 qorukashqakuna o kurkukashqakuna, mana winashqakuna,* juknin nawinta dañakushqakuna, qeriyoqkuna, qaranchö gränuyoqkuna y runtunta dañakushqakuna.+ 21 Tsënö kaq Aaronpa tsurinkunaqa, manam altarman ëwar Teyta Jehoväpaq qarëkunata rupatsiyänantsu. Mana sänu karmi, Teyta Diospaq apayanqan mikuy qarëta altarchö rupatsiyänantsu. 22 Teyta Diospaq apayanqan sagrädu+ y alläpa sagrädu mikuy qarëkunataqa mikuyta puëdiyanmi,+ 23 peru mana sänu karmi, cortïnaman yëkuyänantsu+ ni altarman witiyänantsu,+ y sagrädu sitiütam respetayänan.+ Noqam Jehovä Diosnikikuna kä, limpiu sirwimaqnïkuna kayänëkipaqmi akrarqö’”.*+
24 Moisesqa Teyta Dios llapan ninqantam, Aaronta, Aaronpa tsurinkunata y israelïtakunata willarqan.