Levïticu

18 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Noqam Jehovä Diosnikikuna kä.+ 3 Ama yarqayämunqëki Egiptu nacionchö nunakunanö, ni noqa pushëkanqaq Canaan markakunachö nunakunanöqa kayankitsu.+ Mana allikunata rurayanqanta ama qatiyankitsu. 4 Mandakunqäkunata y leynïkunatam cäsukuyänëki.+ Noqam Jehovä Diosnikikuna kä. 5 Mandakunqäkunata y leynïkunata cäsukurninqa kawayankim.+ Noqam Jehovä Diosnikikuna kä.

6 Ama mëqëkipis kastëkikunawan oqllanakuyankitsu.+ Noqam Jehovä Diosnikikuna kä. 7 Ama mamëkiwan ni papänikiwan oqllanakunkitsu. Mamëki kaptinmi, mamëkiwanqa oqllanakunëkitsu.

8 Ama madrastëkiwan oqllanakunkitsu.+ Tsëta rurarqa papänikitam penqakuyman churanki.

9 Tsë papällapita o tsë mamallapita panikiwanqa ama oqllanakunkitsu. Tsë wayillachö o juk läduchö yurishqa kaptimpis.+

10 Ama warmi tsurikipa o ollqu tsurikipa warmi wamranwanqa oqllanakunkitsu. Tsëta rurarqa penqakuymanmi chanki.

11 Ama madrastëkipa wamranwan oqllanakunkitsu. Pëqa papänikipa tsurin karmi paniki.

12 Ama papänikipa paninwan oqllanakunkitsu. Pëqa tiyëkim, papänikiwanqa tsë yawarllam kayan.+

13 Ama mamëkipa nananwanqa o ñañanwanqa oqllanakunkitsu. Pëqa tiyëkim, mamëkiwanqa tsë yawarllam kayan.

14 Ama papänikipa wawqimpa warminwan oqllanakunkitsu, peqa tiyëkim.+ Tsëta rurarqa tiyuykitam penqakuyman churanki.

15 Ama lumtsuynikiwan oqllanakunkitsu.+ Tsurikipa warmin kaptinmi pëwanqa oqllanakunëkitsu.

16 Ama wawqikipa warminwan oqllanakunkitsu.+ Tsëta rurarqa wawqikitam penqakuyman churanki.

17 Ama mamanwan këkarqa, tsë warmipa warmi wamranwan o willkanwan* oqllanakunkitsu.+ Kastëki kayaptinmi, tsëta rurarqa mana penqakoq kanki.

18 Ama warmikipa nananwan o ñañanwan casakunkitsu, ni warmiki kawëkaptinqa cuñädëkiwan oqllanakunkitsu. Tsëta ruraptikiqa chikinakuyanqam.+

19 Warmiki killanwan këkaptinqa,* ama oqllanakunkitsu.+

20 Ama vecïnuykipa warminwan oqllanakunkitsu, tsëta rurarqa manam rikënïpaq limpiutsu kanki.+

21 Ama Mölek santupaq tsurikikunata rupatsinkitsu.+ Tsëta rurarqa, manam respetëkämankitsu.+ Noqam Jehovä Diosnikikuna kä.

22 Ama warmiwannöqa ollqu mayikiwan oqllanakunkitsu.+ Tsëqa melanëpaqmi.

23 Manam pï ollqupis animalkunawan kanantsu. Tsëta rurarqa, manam rikënïpaq limpiutsu kanqa. Y manam warmipis animalkunawan kanantsu.+ Tsëqa melanëpaqmi.

24 Mëqëkipis tsëkunata rurarqa, manam rikënïpaq limpiunatsu kayanki. Tsëkunata rurarmi qarqunäpaq kaq markachö nunakunapis rikënïpaq limpiutsu kayashqa.+ 25 Tsë nunakuna rikënïpaq mana limpiu kayaptinmi, castigashaq y qarqushaq.+ 26 Peru qamkunaqa leynïkunata y mandakunqäkunatam cäsukuyänëki,+ y manam qamkuna ni qamkunawan kawaq forastërukunapis, tsë melanëpaq rurëkunata rurayänëkitsu.+ 27 Tsë melanëpaq rurëkunatam, manaraq chäyämuptikipis kë markakunachö nunakunaqa rurayarqan,+ tsëmi rikënïpaq limpiutsu kayan. 28 Tsë melanëpaq rurëkunata mana rurayaptikiqa, kë markakunachö nunakunatanötsu manam ushakätsiyashqëki. 29 Tsë melanëpaq rurëkunata ruraqkunataqa, wanutsiyänëkim. 30 Qamkunaqa mandakunqäkunatam cumpliyänëki, y rikënïpaq limpiu kayänëkipaqmi, kë markakunapa melanëpaq rurëninkunata qatiyänëkitsu.+ Noqam Jehovä Diosnikikuna kä’”.