LAMENTACIÖNES
א [älef]
1 ¡Jerusalen markachöqa mëtsika nunakunam kayarqan,+ peru kananqa manam kayannatsu!
¡Wakin nacionkunapitapis mas reqishqam karqan,+ peru kananqa viudayashqa warminömi këkan!
Wakin provinciakunapitapis mas shumaqmi karqan, gobernantikunapa warmi wamrankunanöran shumaq karqan, peru kananqa esclävutanömi trabajëkätsiyan.+
ב [bet]
2 Paqaskunapapis waqakurllam kakun,+ weqimpis atska yakunöran cäran urëpa ëwan.
Kuyaqninkunapis dejariyashqam, y manam jukllëllapis shoqarkunampaq kantsu.+
Amïgunkunapis llapanmi contran tikrayashqa,+ kananqa alläpam chikiyan.
ג [gïmel]
3 Judä nunakunataqa+ alläpa sufritsirmi esclävunkunapaq apakuyashqa,+
kananqa wakin nacionkunawan juntum kawayanqa+ y manam kushishqatsu kayanqa.
Alläpa llakishqa kanqan höram llapan chikeqninkuna qatipar taripäyashqa, y manam defendikuyta puëdishqatsu.
ד [dälet]
4 Sionman ëwaq nänipaqa manam ni pï purinnatsu, Teyta Diosta adorayänan fiestamampis manam ni pï shamunnatsu.+
Punkunkunapis ushakashqam këkan,+ sacerdötikunapis alläpa llakishqam këkäyan,
y shipashkunata* shoqayänampaqpis manam ni pï kantsu. Sionqa llakishqam waqakurlla këkan.
ה [he]
5 Kananqa chikeqninkunam patronninkuna kayan; chikeqninkunaqa manam imapaq yarpachakuyannatsu.+
Tsënöqa këkäyan, imëka jutsata* rurayanqampita Teyta Jehovä castigashqa kaptinmi.+
Wamrankunataqa chikeqninkunam puntankunallata apakuyashqa.+
ו [waw]
6 Sionpa warmi wawampa shumaq këninqa mëtaraq ëwashqa.+
Dirigentinkunapis, qewa mana kaptin wanunëkaq luychunömi këkäyan,
y chikeqninkuna qatikachäyaptinmi chakinkunata qarachëllapana, imëkanöpa qeshpir ëwëkäyan.
ז [zayin]
7 Llakishqa y wayinnaq kanqan junaqkunam,
Jerusalenqa yarpan unë witsankuna imëka väleq cösaskunayoq kashqa kanqanta.+
Tsëchö täkoq* nunakunataqa chikeqninkunam ushakätsiyarqan.+
Jerusalentaqa manam ni pï yanaparqantsu, tsëmi chikeqnin nunakunaqa rikëkur asipäyarqan.+
ח [jet]
8 Jerusalenqa alläpa jutsatam* rurëkushqa, tsëmi kananqa pëtaqa pïmëpis melanan.+
Penqakuypaq qalapächu warminö këkaqta rikashqa karmi,
puntata respetaqkunapis kananqa despreciayan.+
Jerusalenqa waqakurllam kakun+ y penqakurmi cärantapis tsapakun.
ט [tet]
9 Jutsata* rurashqa kaptinmi faldampis rakcha püru o iska püru këkan,
manam pensarqantsu mana allikunapa pasanampaq kaqta.+
Sufrimientuman ishkinqanqa alläpa mantsakëpaqmi, manam ni pillapis shoqanampaq kantsu.
Y kënömi nin: ‘Teyta Jehovä, alläpam sufrikä, chikiyämaqkunam vencirayämar gälakur këkäyan’.+
י [yod]
10 Chikeqninkunam llapan väleq cösasninkunata+ ashi ashïkur apakuyashqa,
rikëkaptinmi juk nacion nunakuna sagrädu sitiuman+ yëkuyashqa.
Sirwiyäshoqnikikunawan juntakäyänampaq mana mandëkaptikim, tsë nunakunaqa yëkayämushqa.
כ [kaf]
11 Llapan nunakunam alläpa llakishqa këkäyan y mallaqarmi mikuyta ashir këkäyan.+
Wanuyta mana munarmi, imëka väleq cösasninkunawan ichiklla mikuyta trokayan.
Teyta Jehovä, ama qonqëkamëtsu, kananqa imapaqpis mana väleq warminömi* tikrarqö.
ל [lämed]
12 Nänipa pasaqkuna, ¿manaku qamkunataqa imapis qokuyäshunki?
¡Imanö këkanqäta rikäyämë!
Noqanöqa, manam ni pï kënö sufrimientupa pasashqatsu,
Jehovämi alläpa cölerar castigamashqa.+
מ [mem]
13 Ciëlupitam ninata mandamushqa, tsëmi tullüyaq yëkushqa,+
llapan tullükunatam rupar ushashqa.
Ishkinäpaqmi, mällapita rurashqa trampata puntäman churamushqa, tsëmi qeshpir kutikurqö.
Kananqa waktsa warminömi imannaq quedarqö, entëru junaqmi qeshyarlla jitaräkü.
נ [nun]
14 Llapan jutsa* ruranqätaqa Teyta Diosmi yügutanö matankäman churamushqa,
peru noqapaqa manam kallpä kashqatsu sutanäpaq,
Teyta Jehovämi, noqapita mas puëdeq nunakunapa poderninman churamashqa.+
ס [sämekh]
15 Teyta Jehovämi, noqachö këkaq llapan puëdeq ollqukunata qarqushqa,+
jövinnïkunata ushakätsinampaqmi mëtsikaq nunakunata qayatsimushqa.+
Teyta Jehovämi vïnupaq üvasta jaruyänan pözuchö, ollquwan manaraq kashqa Judächö llapan shipashkunata jarur ushashqa.+
ע [ayin]
16 Tsëmi waqakurlla kakü, alläpa waqaptïmi weqïpis ushakärinna.+
Yanapayämänampaq o shoqayämänampaq kaq nunakunapis mëchöraq kakuyan.
Chikeqninkuna vencishqa kayaptinmi, wamräkunapis imannaq quedayashqa.
פ [pe]
17 Yanapayänampaq makinta choqparkur Sion mañakuptimpis,+ manam ni pï yanapantsu.
Teyta Jehovämi mandakushqa llapan vecïnunkuna Jacobta ushakätsiyänampaq,+
kananqa tsë nunakuna Jerusalenta alläpam melanäyan.+
צ [sadë]
18 Teyta Jehoväqa imëpis allillata ruraqmi,+ peru noqam mandakunqankunata mana cäsukur mana allitaqa rurarqö.+
Mëtsë markachö nunakuna, imanö sufrikanqäta rikäyämë.
Llapan jövinnïkunatam, warmitapis ollqutapis prësu apakuyashqa.+
ק [qof]
19 Kuyamaqnïkunatam qayatsirqä,+ peru conträmi tikrayashqa.
Sacerdötïkuna y dirigentïkunapis,
mikuyänampaq mikuyta ashikarmi mallaqëpa wanuyashqa o wañuyashqa.+
ר [resh]
20 Teyta Jehovä, rikëkallämë, alläpam sufrikä.
Mana cäsukoq kanqäta yarpaptïmi, pachäpis,* y shonqüpis llakikuptï alläpa nanan.+
Waqtachö këkaqkunatapis espädawanmi wanuykätsiyan+
y wayi rurinchö kaqkunapis wanurmi o wañurmi ushakëkäyan.
ש [shin]
21 Y llapan nunakunam wiyayashqa waqëkanqäta, manam ni pillapis shoqarkamantsu,
llapan chikimaqnïkunam musyayashqa alläpa sufrikanqäta y alläpam kushikuyan.+
Kënö sufrinäpaqqa qammi castigamarqunki,
peru pëkunatapis ushakätsinëkipaq willakunqëki junaqqa chäramunqanam,+ pëkunapis noqanömi ushakäyanqa.+
ת [taw]
22 Jutsata* rurayanqanta llapanta rikëkullë,
y jutsata ruranqäpita noqata castigamanqëkinölla pëkunatapis castiguëkullë.+
Noqaqa imëka pasanqampitam llakikü, tsëmi shonqüpis alläpa nanan.
א [älef]
2 Teyta Jehoväqa alläpa cölerarmi, Sionpa warmi wamranta yana pukutëwan tsaparkoqnöraq castigashqa.
Israelpa shumaq kënintapis ciëlupitam jitarkamurqan,+
Israelqa chakin jarukunampaqmi karqan, tsëtapis manam yarparqantsu.+
ב [bet]
2 Teyta Jehoväqa, mana llakipëpam* Jacobpa llapan wayinta ushakätsirqan.
Y Judächö alli murallashqa markakunatam ushakätsirqan.+
Nacionnintapis+ y dirigentikunatapis despreciarmi+ patsaman jitar ushashqa.
ג [guïmel]
3 Teyta Diosqa alläpa cölerarmi, Israelpa puëdeq kënintapis ushakätsirqan.
Chikeqninkuna atacayaptimpis manam yanaparqantsu.+
Jacobpa kastankunatapis y entëru lädunchö kaqkunatapis ninanömi usharirqan.+
ד [dälet]
4 Teyta Diosqa, chikeqninkunatanö ushakätsimänapaqmi, derëcha makinchö flechakuna arcunwan listullana këkan.+
Llapan kuyëllapaq kaqkunatam ushakätsishqa.+
Sionpa warmi wawampa+ carpa* wayintam, alläpa cölerar ninawannöraq ushakätsishqa.+
ה [he]
5 Teyta Jehoväqa chikimaqnintsik nunanömi tikrashqa.+
Israeltam ushakätsishqa y törrinkunatapis juchutsishqam.*
Alli murallashqa markakunatam ushakätsishqa,
tsëmi Judäpa warmi wamranqa,
masraq llakikur y waqar këkan.
ו [waw]
Teyta Jehoväqa, manam munannatsu säbadu junaqkunata ni fiestakunatapis Sionchö yarpäyänanta.
Y alläpa cölerashqa karmi ni gobernantita ni sacerdötita llakipantsu.*+
ז [zayin]
7 Teyta Jehoväqa altarnintapis manam rikëta munannatsu, y templuntapis despreciashqam.+
Alli murallashqa törrinkunatapis, chikeqninkuna ushakätsiyänampaqmi dejarirqan.+
Chikeqninkunaqa, Teyta Jehoväpa templunman yëkuskirmi,+
fiestachönöraq kushishqa fuertipa qapariyarqan.*
ח [jet]
8 Sionpa warmi wawampa wayinta ushakätsiyänampaqmi, Teyta Jehovä permitishqa.+
Y murällankunatapis medina cordelwanmi medishqa+ y mana llakipëpam* llapanta ushakätsishqa.
Teyta Dios permitiptinmi, murällakuna
y murälla chakinman qotuyanqan rumipis ni allpapis sirwinnatsu,
y markataqa manam imapis tsapannatsu.
ט [tet]
9 Markapa punkunkunapis patsamanmi hundikashqa.+
Teyta Diosmi punkukunata ushakätsishqa y trancaraqninkunatapis pakir ushashqa.
Jerusalenchö gobernaq y dirigentikunapis juk nacionchömi këkäyan.+
Teyta Jehoväpa leynintaqa manam cäsukuyannatsu ni willakoqninkunapis manam ima revelacionta chaskiyannatsu.+
י [yod]
10 Sion markachö dirigeqkunaqa, patsachömi upälla jamarëkäyan.+
peqankunaman o umankunaman allpata jichakur y chukru tëlakunata churakurkurmi këkäyan.+
Jerusalenchö shipashkunaqa,* urkunkunapis patsaman chanqanyaqmi qonqurikuyashqa.
כ [kaf]
11 Alläpa waqaptïmi nawïpis rikannatsu.+
Pachäpis* alläpam nanëkun.
Markächö nunakunata* ishkishqata rikaptï,
wamrakunata y llullukunata pläzakunachö+ desmayaqta rikaptïmi shonqü* alläpa nanan.+
ל [lämed]
12 Wamrakunaqa mamankunatam, “mallaqämi, yakunämi”*+ niyan.
Pläzakunachömi guërraman ëwashqa nunakunanö desmayar këkäyan.
Y mamankunapa mellqaninchömi mallaqëwan wanukuykäyan.
מ [mem]
13 Jerusalenpa wawan, ¿qamtaqa piwanraq o imawanraq igualatseqman?
Ollquwan manaraq kashqa Sionpa wawan, ¿imawan igualatsir-raq qamtaqa shoqaqman?
Tsëläya desgraciaman chanqëkiqa lamarnö alläpa jatunmi.+
¿Piraq jampishuynikita puëdinman?+
נ [nun]
14 Willakoqnikikunaqa llutanta rikarmi mana kaqta niyäshurqëki.+
Mana allita rurëkaptikipis manam willayäshurqëkitsu.+
Tsënö pasakuykaptimpis, pëkunaqa llutankunata rikarmi mana kaqta niyäshurqëki.+
ס [sämekh]
15 Qampita burlakoq nunakunam paqchir o taqllar pasayan.+
Jerusalenpa warmi wawanta rikarmi despreciar wichyayan,+ y peqankunata o umankunata kuyutsirmi kënö niyan:
“Kë markapaqku niyarqan ‘¿wakin markakunapitapis mas shumaq kanqanta? ¿Kë markata rikarku entëru patsachö nunakuna kushikuyarqan?’”.+
פ [pe]
16 Llapan chikishoqnikikunam, qampita burlakuyan.
Wichyar y alläpa cölerarmi kirunkunatapis rikapätsiyäshurniki kënö niyan: “Pasëpam* ushakätsirquntsik.+
Tsënö ushakashqa kanantam munarqantsik. Tsë tiempuqa chäramushqam,+ tsëtam rikëkantsik”.+
ע [ayin]
17 Teyta Jehoväqa munanqantam rurashqa,+ unëpitana parlanqantam cumplishqa.+
Mana llakipëpam* ushakätsishurqunki.+
Chikishoqnikikuna qampita asikuyänantam permitishqa,
y chikishoqnikikunatam qampita mas puëdeqta tikratsishqa.
צ [sadë]
18 Sionpa warmi wawan,* llapan nunakunam Teyta Jehoväman rogakuykäyan.
Paqaspapis junaqpapis alläpa waqaptiki, yakunöraq weqiki ëwatsun.
Llakikur waqarnin sïgui.
ק [qof]
19 Paqaspa sharkur, patsa waranqanyaq waqë.
Shonquykichö imanö këkanqëkita waqarnin Teyta Jehoväta willë.
Wamrëkikunaqa mallaqëwanmi cällikunachö desmayar këkäyan,
ר [resh]
20 Teyta Jehovä, rikëkullë feyupa castiganqëki nunakunata.
¿Imanirtan warmikunaqa kikinkuna wachayanqan wamrankunata mikukurkuyan?+
Teyta Jehovä, ¿sacerdötikunata y willakoqnikikunataqa templuchötsuraq wanutsiyanqa o wañutsiyanqa?+
ש [shin]
21 Jövinkunapis y awkinkunapis cällichömi wanushqa jitaräkuyan.+ Warmitapis ollqutapis llapantam espädawan wanutsiyashqa.+
ת [taw]
22 Fiestapaqnömi mëtsëpita chikimaqnïkunata qayatsimunki.+
Teyta Jehovä cölerakunqan junaqqa, manam ni pï qeshpir ëwakurqantsu ni manam ni pï salvakurqantsu.+
Qeshpikunqä y wätanqä wamräkunatam chikimaqnïqa ushakätsishqa.+
א [älef]
3 Alläpa cölerar Teyta Dios castigamashqa kaptinmi alläpa sufrirqö.
2 Pëqa qarqamashqam, aktsichönö puritsimänampa rantinmi ampichönö o tsakëchönö* puritsiman.+
3 Pëqa patsa waranqampita tardiyanqanyaqmi kutin kutin castigaman.+
ב [bet]
4 Tsëmi cäräpis y ëtsäpis ushakärinna.
Y tullütapis pakirmi ushashqa.
5 Mana qeshpinäpaqmi entëru lädüpa murällata ruramushqa. Venënuyoq+ plantakunatam entëru lädüman plantamushqa y imëka problëmamanmi chätsimashqa.
6 Mëtsika tiempupa wanushqatanömi o wañushqatanömi, aktsi mana kanan sitiuchö katsimashqa.
ג [guïmel]
7 Mana qeshpinäpaqmi entëru lädüpa murällata ruramushqa.
Y cobripita rurashqa alläpa lasaq cadënakunawanmi cadenamashqa.+
8 Y imanö këtapis mana musyar, yanapëkamänampaq qayakuptïpis manam wiyamantsu.+
9 Purikunqä nänitapis pasëpam* malograr ushashqa,
y mana pasanäpaqmi labrashqa rumikunawan tsaparkushqa.+
ד [dälet]
10 Ösunö atacamänampaq, juk leonnö juklla atacamänampaqmi shuyarëkäman.+
11 Nänipita juk läduman apëkamarmi rachir ushamashqa.*
Tsëmi imata ruranäpaqpis sirwïnatsu.+
12 Alli apuntëkurmi flëchanwan chätsimashqa.
ה [he]
13 Flechamanqanqa riñonnïmanmi yëkushqa.
14 Mëtsë markachö nunakunam asipäyäman y patsa waranqampita tardiyanqanyaqmi noqapita burlakur cantapäyäman.
15 Imëka asqaqkunatam o ayaqkunatam mikutsiman y asqaq o ayaq ajenjutam uputsiman.+
ו [waw]
16 Kirütapis aquwanmi pakitsimushqa.
Alläpa mantsakashqam uchpa jananchö këkä.+
17 Teyta Dios, kushishqa kawanätaqa manam munankinatsu, alli kawakunqä witsankunataqa manam ichikllapis yarpänatsu.
18 Tsëmi kënö nï: “Kananqa manam puntatanönatsu reqishqa kä y Teyta Jehovä yanapamänampaq kaqtaqa manam shuyaränatsu”.
ז [zayin]
19 Teyta Dios, alläpa llakishqa y wayinnaq këkanqäta yarpë,+ imëka asqaqkunata o ayaqkunata mikutsimanqëkita y ajenjuta uputsimanqëkita yarpë.+
20 Tsëta yarparkurqa yanapamänëkipaqmi shamunki.+
21 Tsëtam shonqüchö yarparä. Tsëmi pacienciawan shuyaräshaq.+
ח [jet]
22 Teyta Jehoväqa, alläpa kuyakoq karmi ushakätsimarquntsiktsu.+
Pëqa imëpis llakipämantsikmi.*+
23 Cada junaqmi llakipämantsik,*+ manam ni imëpis dejamantsiktsu.+
24 Y kënömi nirqä: “Noqapaqqa Teyta Jehovämi herenciä, tsëmi pacienciawan shuyaräshaq”.+
ט [tet]
25 Teyta Jehoväqa, pëman confiakoqkunapaq+ y mana dejëpa asheqkunapaqqa alläpa allim.+
26 Teyta Jehovä salvamänapaq kaqta pacienciawan shuyarëqa alläpa allim.+
27 Juk nuna jövin kanqan witsan mana allikunapa pasanqanqa allim.+
י [yod]
28 Tsëmi, imëka mana allikunapa pasananta Teyta Dios permitikaptinqa, japallan upälla jamaränan.+
29 Shimimpis patsaman chanqanyaq qonqurikutsun,+ capaz salvakunqa.+
30 Laqyayaptimpis, cäranta maslla kamäputsun. Imëkata qayapäyaptimpis upällalla chaskikutsun.
כ [kaf]
31 Teyta Jehoväqa manam qonqëkamäshuntsu.+
32 Castigamarnintsikpis, alläpa kuyakoq karmi llakipämäshun.*+
33 Pëqa manam nunakunata sufritsir ni imëka mana allikunapa pasatsir kushikuntsu.+
ל [lämed]
34 Teyta Diosqa, prësu këkaq nunakunata imëka mana allikunata rurayaptin rikëkanmi.+
35 Llapanta Gobernaq Poderösu Diosqa rikëkanmi, juk nuna justiciata mañakuptin justiciata mana rurayaptin,+
36 y juk nuna juiciuchö kaptin ardëpa* perditsiyaptin.
Tsëkunata rurayanqantaqa manam Teyta Jehoväta gustantsu.
מ [mem]
37 Tsënö këkaptinqa, ¿piraq imallatapis ninman? Teyta Jehovä mana mandëkaptinqa, ¿piraq imatapis ruranman?
38 Llapanta Gobernaq Poderösu Diosqa imëpis allillatam parlan
y mana allitaqa manam imëpis parlantsu.
39 Tsënö këkaptinqa, ¿piraq jutsata* ruranqampita sufrirnin quejakunman?+
נ [nun]
40 Alli yarpachakushun imanö kawëkanqantsikta+ y imanö portakunqantsikta. Y Teyta Jehoväta yapë cäsukushun.+
41 Makintsikta pallarkur* llapan shonquntsikwan ciëluchö+ këkaq Teyta Diosnintsikta kënö nishun:
42 “Jutsatam* rurayarqö y mandakunqëkikunata manam cäsukuyarqötsu.+ Tsëmi qamqa perdonayämarqunkitsu.+
ס [sämekh]
43 Cölerashqa karmi chaskiyämarqunkinatsu,+
mëtsëpam qatikachäyämarqunki y mana llakipëpam* wanutsiyämarqunki.+
44 Mañakayämunqäta wiyëta mana munarmi pukutëta churamurqunki.+
45 Basüratanömi rikäyämanki. Tsëmi mëtsë markakunaman basüratanö jitayämarqunki”.
פ [pe]
46 Llapan chikiyämaqkunam imëkata niyäman.+
47 Alläpam mantsapakuyä, trampachönömi këkäyä+ y markäkunatapis juchutsirmi* ushayashqa. Y manam ni imapis kannatsu.+
48 Markächö nunakunata ushakätsishqa kayaptin alläpa waqaptïmi, weqïpis yakunöraq ëwan.+
ע [ayin]
49 Paqasta junaqtam waqarlla kakushaq.+
50 Tsënöqa waqashaq imanö këkanqäta ciëlupita Teyta Jehovä rikämunqanyaqmi.+
51 Marka mayï warmikuna alläpa sufriyanqanta rikarmi alläpa llakikü.+
צ [sadë]
52 Mana imanëkaptïmi, chikiyämaqkunaqa pishqutanö qatikachayämashqa y prësuyämashqa.
53 Wanutsiyämëta munarmi pözuman jitarkayämarqan y janämanmi rumita qotuyämurqan.
54 Yaku rurinman peqä o umä hundikäriptinmi, “kananmi sïqa ushakärillä” nirqä.
ק [qof]
55 Hondu pözu rurinchö këkarmi, Teyta Jehovä, jutikipa qayakamurqä.+
56 Qamqa mañakamuptï wiyamankim, yanapëkamanëkipaq rogakamuptï cäsumankim.
57 Y qayakamunqä junaqmi qamqa shamurnin, “ama mantsapakuytsu” nimarqëki.
ר [resh]
58 Teyta Jehovä, qammi juiciuchö këkaptï defendimarqunki, wanunäpaq kaqpitam salvamarqunki.+
59 Teyta Jehovä rikarqunkim imëka mana allikunata rurayämanqanta. Tsëmi justiciata ruranëkipaq rogakamü.+
60 Rikarqunkim llapan rurayämanqanta y imëka mana allita rurayämänampaq parlayanqanta.
ש [sin o shin]
61 Teyta Jehovä wiyarqunkim imëkata insultayämanqanta, imëka mana allikunata rurayämänampaq parlayanqantapis.+
62 Wiyarqunkim chikimaqkuna imëkata parlayämanqanta y patsa waranqampita tardiyanqanyaqpis imëkata rimayämanqanta.
ת [taw]
63 Rikë, jamarëkarpis o shëkarpis* burlakurmi noqapaq imëkata cantayan.
64 Teyta Jehovä, tsëkunata rurayanqampitam pëkunataqa castiganki.
65 Maldiciptikim, pëkunaqa mana cäsukoq y mana entiendeq kayanqa.
66 Teyta Jehovä, qamqa cölerakurmi llapankunata qati qatïkur wanutsinki, y kë patsachöqa manam jukllëllapis kawëkar quedanqatsu.
א [älef]
4 Örupis, alli kaq öru këkar+ manam chipapannatsu.
Sagrädu sitiuchö perqaraq rumikunapis+ cälli esquïnakunachömi jitaräkun.+
ב [bet]
2 Sionchö täkoq* nunakunataqa
alli kaq örutanöran kuyayarqan.
Peru kananqa, nuna ruranqan mitu mankatanöllanam rikäyan.
ג [guïmel]
3 Chacal* niyanqan chukaru animalkunapis wawankunataqa kuyarmi chichin.*
Peru markächö nunakunaqa,+ tsunyaq sitiuchö päraq avestruz wawankunata qonqëkoqnömi wamrankunata kuyayannatsu.+
ד [dälet]
4 Chichikaq* wamrakunapaqa alläpa yakunäyaptinmi qallunkunapis paladarninkunaman laqakan.
Wamrakunaqa alläpa mallaqarmi mikuyta mañakuyan,+ peru manam ni pï imallatapis qarëkuntsu.+
ה [he]
5 Alli mikuyta mikur kawakushqa nunakunapis, kananqa cällikunachömi mallaqëpita wanur purikäyan.+
Alläpa cuestaq röpakunata vistishqa*+ winashqakunapis, kananqa uchpa jananchömi jamarëkäyan.
ו [waw]
6 Jutsata* rurayanqampita Sodöma+ markachö nunakuna castïguta chaskiyanqampitapis, markächö nunakunaqa mas peormi castïguta chaskiyashqa.
Sodöma markachö nunakunaqa jukllam ushakäriyarqan y manam ni pï yanaparqantsu.+
ז [zayin]
7 Teyta Diosllata sirwiyänampaq+ markächö akrashqa nunakunaqa rashtanöran* y lichinöran yuraq kayarqan.
Cuerpunkunapis puka pukaran karqan, lamar rurinchö coral niyanqan rumikunapitapis mas shumaq y alli chipapätsiyanqan zafïru ruminö shumaqmi karqan.
ח [jet]
8 Peru kananqa qetyapitapis mas yanam këkäyan.
Cällikunachöpis mana reqipaqmi purikäyan.
Tullunwan+ qaranllanam këkäyan y tsakishqa qerunömi këkäyan.
ט [tet]
9 Chakrakunachö mikuy mana kaptinmi, nunakunaqa mallaqëpita alläpa sufrirnin purikäyanqanchö wanuyan.+
Guërrachö wanuyanqanchi mas alliqa kanman karqan, guërrachö espädawan wanukoqkunaqa mana sufrillapam wanuyan o wañuyan.
י [yod]
10 Markächö nunakunata ushakätsiyanqan witsanqa,
kuyakoq këkarmi warmikunapis+ mallaqëta mana aguantar wamrankunata mikuyarqan.+
כ [kaf]
11 Teyta Jehoväqa alläpa cölerashqam këkan.+
Alläpa cölerashqa karmi Sion markaman ninata prendïkatsishqa.+
Tsëmi cimientunkunatapis rupar ushëkan.
ל [lämed]
12 Mëtsë nacionkunachö gobernantikuna, ni pï nunapis manam pensariyarqantsu,
Jerusalenman chikeqninkuna punkupa yëkuriyänampaq kaqta.+
מ [mem]
13 Peru Jerusalenmanqa yëkuyashqa, Diospa willakoqninkuna
y sacerdötikuna+ imëka jutsata* rurayanqampitam y jutsannaq nunakunata wanutsiyanqampitam.+
נ [nun]
14 Cällikunachömi wiskunö o qapranö oqrakashqa purikäyan.+
Y röpankuna yawarllana kaptinmi,+
nunakunaqa yatëtapis munayantsu.
ס [sämekh]
15 Kënö nirmi qayapäyan: “¡Këpita ëwakuyë! Melanëpaq nunakuna, washa washata ëwayë. Jinan höra yarquyë. Ama yatayämëtsu”.
Manam wayinkuna kantsu. Tsëmi mëpa ëwayanqantapis musyayantsu.
Juk nacion nunakunanam kënö niyashqa: “Pëkunaqa ama markantsikchö kawayätsuntsu.+
פ [pe]
16 Pëkunataqa Jehovämi mëtsëpa qarqushqa.
Manam ni ichikllapis yarpanqanatsu.+
Y nunakunapis, manam sacerdötikunata+ ni dirigentikunatapis respetanqanatsu”.+
ע [ayin]
17 Yanapamänapaq rikachakur këkashqam, nawintsikpis nanarinna.+
Yanapamënintsikta mana puëdeq naciontam, yanapamänapaq kutin kutin rogarquntsik.+
צ [sadë]
18 Chikimaqnintsikkunaqa cada päsuchömi shuyarämarquntsik.+ Tsëmi pläzakunapa ëwëtapis puëdirqantsiktsu.
Kananqa manam puntatanönatsu kawakushun. Kananqa llapantsikmi ushakäshun.
ק [qof]
19 Chikimaqnintsikkunaqa pichakpitapis* mas velozmi kayarqan.+
Tsëmi jirkakunachö qatikachämarqantsik. Tsunyaq sitiukunachömi ratakuykur o tsinkakuykur* shuyarämarqantsik.
ר [resh]
20 Pëkuna rurayanqan jatun pözumanmi, kawatsimaqnintsik nuna ishkishqa,+ Teyta Jehovä akranqan nuna,+
pëpaqmi noqantsikqa nirqantsik: “Pë cuidamashqam* nacionkunachöqa alli kawakushun”.
ש [shin]
21 Uz markachö täkoq* Edom+ nunakuna, gälakur kushikuyë.
Peru qamkunatapis, upuyanqan cöpataqa makyayäshunkim,+ tsëmi macharkur penqakuypaq qalapächu puriyanki.+
ת [taw]
22 Sion marka, qamqa jutsata* ruranqëkipita castïguta chaskirqunkinam.
Teyta Diosqa manam permitinqanatsu prësu apakuyäshunëkita.+
Peru kananqa Edom nunakuna, qamkunatanam jutsata rurayanqëkipita Teyta Dios juzgayäshunki.
Llapan jutsëkikunatam musyatsikunqa.+
5 Teyta Jehovä, ama qonqëkayämëtsu, imëka mana allikunapam pasayarqö.
Penqakuypaqmi këkäyä, yanapëkayämë.+
2 Kananqa, herenciäkunapis mana reqiyanqä nunakunapanam, wayïkunatapis juk nacion nunakunam duëñu tukuyashqa.+
3 Papänïkunapis wanukuyashqam y mamänïkunapis viudam* quedayashqa.+
4 Kikïkunapa yakükunata upuyanqäpitam pagatsiyäman,+ yantatapis kikïkunapatam rantikayäman.
5 Qatikachäyämaqkunaqa cäsi cäsinam achkuyäman.
Pishipashqa* karmi ëwëtapis puëdiyänatsu, manam ni ichikllapis jamarita puëdiyätsu.+
6 Mikuyänäpaq imäkunapis mana kaptinmi, Egiptu+ nunakunata y Asiriu+ nunakunata mikuyta qarayämänampaq rogakuyä.
7 Jutsata* ruraq unë kastäkunaqa, wanurnam ushakäyashqa, peru pëkuna jutsata rurayanqampitam noqakuna kananyaq sufrikäyä.
8 Kananqa sirwipakoqkunam patronnïkuna kayan. Pëkunapa poderninkunapitaqa manam ni pillapis salvayämëta puëdintsu.
9 Tsunyaq sitiukunachö asaltantikuna* kayaptinmi, vïdäkunatapis peligruman churar wayïkunaman mikuyta apayämü.+
10 Alläpa mallaqëwan pachäkuna nanaptinmi, cäräkunapis hornunöraq achachan.+
11 Sion markachöqa, casäda warmikunatam violayashqa. Tsënöllam Judä markakunachöpis ollquwan manaraq kashqa shipashkunata violar ushayashqa.+
12 Mandakoqkunatam makipita warkuyashqa,+ y dirigentikunatapis manam respetayashqatsu.+
13 Jövinkunam maki mulinuta apayan, y wamrakunanam yantata apayan, peru apëta mana puëdirmi ishkir ushayan.
14 Markaman yëkuna punkunkunachöpis, manam dirigentikuna kayannatsu,+ ni manam jövinkunapis müsicata tocayannatsu.+
15 Manam kushishqanatsu kayä. Kushishqa tushuyänäpa rantinmi, wanupakushqanö llakishqalla kakuyä.+
16 Corönäkunapis peqäkunapitam o umäkunapitam ishkishqa. Jutsatam* rurayarqö. ¡Allaw noqalläkuna, imanöraq kayäshaq!
17 Llakikuyaptïmi shonqükunapis alläpa nanan.+
Alläpa waqayaptïmi nawïkunapis rikannatsu.+
18 Sion jirkata ushakashqata rikarqa, alläpam llakikuyä.+ Tsëchöqa, atoqkunallanam kananqa pärayan.
19 Peru qamqa Teyta Jehovä, gobernar täkunëkichömi imëpis këkanki.
Qamqa imëpis gobernëkankillam.+
20 ¿Imanirtan qonqëkayämarqunki? Mëtsika tiempunam pasashqa, ¿imanirtan yarpäyämankinatsu?+
21 Teyta Jehovä, qammanmi kutimuyta munayä, chaskiyämaptikiqa jinan höram kutikayämushaq.+
Puntata kawakuyanqänö kawakuyänäpaq yanapëkayämë.+
22 Peru qamqa, manam rikëtapis munayämankitsu.
Noqakunawanqa alläpa cölerashqam këkanki.+
Hebreu idiömachöqa “ollquwan manaraq kashqa shipashkunata” ninmi.
Kënöpis niyanmi: pecäduta.
Kënöpis niyanmi: täraq; päraq.
Kënöpis niyanmi: pecädutam.
Kënöpis niyanmi: Pecäduta.
Kechöqa, Jerusalen markatam juk warmitawan igualëkätsin.
Kënöpis niyanmi: pecädu.
Hebreu idiömachöqa “aqishnïkunapis o aqashnïkunapis” ninmi.
Kënöpis niyanmi: Pecäduta.
Kënöpis niyanmi: ankupëpam; kuyapëpam.
Kënöpis niyanmi: toldu.
Kënöpis niyanmi: laqmatsishqam.
Kënöpis niyanmi: ankupantsu; kuyapantsu.
Kënöpis niyanmi: qayëkachäyarqan.
Kënöpis niyanmi: ankupëpam; kuyapëpam.
Hebreu idiömachöqa “ollquwan manaraq kashqa shipashkunaqa” ninmi.
Hebreu idiömachöqa “Aqishnïkunapis; Aqashnïkunapis” ninmi.
Hebreu idiömachöqa “Markäpa warmi wawankunata” ninmi. Tsënö nirqa, alläpa mana allipa pasayanqanta rikar llakipanqampaqmi parlëkan.
Hebreu idiömachöqa “ñatinnï” ninmi.
Hebreu idiömachöqa “¿mëchötan vïnu y tsaki mikuy këkan?” ninmi.
Kënöpis niyanmi: Jankatmi.
Kënöpis niyanmi: ankupëpam; kuyapëpam.
Hebreu idiömachöqa “murälla” ninmi.
Kënöpis niyanmi: joqarkur.
Kënöpis niyanmi: ankupëpam; kuyapëpam.
Kënöpis niyanmi: tutapëchönö.
Kënöpis niyanmi: jankatmi.
Capazchi “barbechashqa chakratanö dejamashqa”.
Kënöpis niyanmi: ankupämantsikmi; kuyapämantsikmi.
Kënöpis niyanmi: ankupämantsik; kuyapämantsik.
Kënöpis niyanmi: ankupämäshun; kuyapämäshun.
Kënöpis niyanmi: yaptapa.
Kënöpis niyanmi: pecäduta.
Kënöpis niyanmi: joqarkur.
Kënöpis niyanmi: Pecädutam.
Kënöpis niyanmi: ankupëpam; kuyapëpam.
Kënöpis niyanmi: laqmatsirmi.
Kënöpis niyanmi: ichirëkarpis.
Kënöpis niyanmi: täraq; päraq.
Tsë animalqa atoq niraqmi.
Kënöpis niyanmi: chuchun.
Kënöpis niyanmi: Chuchuykaq.
Hebreu idiömachöqa “chipapaq puka röpa” ninmi.
Kënöpis niyanmi: Pecäduta.
Kënöpis niyanmi: rapinöran; jankanöran.
Kënöpis niyanmi: pecäduta.
Kënöpis niyanmi: ankapitapis; pichakapitapis.
Kënöpis niyanmi: illarikur; pakakuykur.
Hebreu idiömachöqa “wäninchö o llantuyninchö katsimashqam” ninmi.
Kënöpis niyanmi: täraq; päraq.
Kënöpis niyanmi: pecäduta.
Hebreu idiömachöqa “viudanömi” ninmi.
Kënöpis niyanmi: Utishqa; Shaykushqa.
Kënöpis niyanmi: Pecäduta.
Hebreu idiömachöqa “espäda kaptinmi” ninmi.
Kënöpis niyanmi: Pecädutam.