Qallanan

RASUMPËPA willakïkuna willakoq librom këqa. Bibliapitam këchö llapan willakïkunataqa horqayämushqa. Teyta Dios llapanta rurar qallanqampita patsë, hasta tiempontsikkunayaqmi willamantsik këchö willakïkunaqa. Hasta shamoq tiempokunapaq Teyta Dios änimanqantsiktapis willamantsikmi.

Biblia yachatsikonqanllatam kë libroqa willamantsik. Bibliachö unë nunakunapitam, y llapan rurayanqampitam willakun. Hina Patsachö selläma shumaq huertachö wiñeypaq nunakuna täräyänampaq änikonqantawanmi yachatsimantsik.

Kë librochöqa 116 willakïkunam kan ocho partesman rakishqa. Y cada partechö kaqtam willamantsik tsë parte qallanan päginachö. Y kë willakïkunaqa imë pasanqantapis kuchumpitam willakun. Tsënöpam, cada tiempochö pasanqanta alleq käyinëkipaq yanapashunki.

Alëru käyinallam kayan kë qellqarëkaq willakïkunaqa. Tsënöpam, kikinkunalla leirpis wambrakunaqa käyiyanqa. Tsëmi atska kuti papäninkuna leiyäpuptimpis, wambrakuna mana utishpa wiyakuyanqa. Tsënöllam hina jövempaqpis y mayorpaqpis kë libroqa alläpa alli kanqan rikakonqa.

Y Bibliachö ashinapaqmi tarintsik cada willakï ushananchö. Tsëmi tsë willakïkunata maslla käyinëkipaq Bibliëkichö ashinkiman. Hina cada willakïta usharirmi ashinëki tapukïninkunata, y yarpänëkim llapan yachakonqëkita tsë tapukïkunata yaskinëkipaq, 116 willakï ushariptinllam taririnki kë llapan willakïkunapa tapukïninkunataqa.