Davidpa wayinchö llakikïkuna

JERUSALENCHÖ David gobernar qallanqampitash, peleakunachö ganayänampaq Jehová yanapan llapan soldädokunata. Israelïtakunata Canaán markata qonampaqshi Jehová änishqa kanaq. Y tsënöshi pëkunapa tikrarinaq llapan Jehová änenqan markakuna, kikin Jehoväpa yanapëninwan.

Alli gobernantesh kanaq Davidqa. Pëqa Jehovätash kuyanaq. Tsëshi Jerusalenman yëkurerqa puntata Jehoväpa arca del pacto nishqanta apanaq tsëman. Huk templotash rurëta munan tsëman churanampaq.

Watakuna pasanqanchönash, alläpa hutsallakïkunaq David. Pëqa hukpa kaqta yatapakï mana alli kanqanta musyanshi. Pero huk ampinash, huk shumaqllan warmita rikärinaq palacionchö purikachëkar. Davidpa soldädon Urías nishqan nunapa warminshi kanaq tsë Bat-seba shutiyoq warmiqa.

Tsënash palacionman aparatsimunaq tsë Bat-seba warmita alläpa munarnin. Peleachöshi këkan tsë warmipa qowanqa. Tsëyaqnash David Bat-sëbawan punukïkunaq y tsëpitanash musyarinaq qeshyaq këkanqanta. Tsënash alläpa yarparëkun Davidqa y tsë warmipa qowan Urías wanunampaqnash, Joab soldädonkunapa mandaqninta puntaman peleachö churëkunampaq mandarinaq. Y tsë Urías nuna wanuriptinnash Bat-sëbawan casakurinaq David.

Tsënash Davidwanqa Jehová alläpa piñakurkunaq. Tsëshi hutsankunapita parlapänampaq kachanaq Natán nishqan profëtanta. Davidtawan Natanta këchö rikëkanqëkinö. Tsëshi llapan mana alli ruranqampita alläpa llakïkunaq Davidqa, y tsëta rikarnash mana wanutsinaqnatsu Jehová. Pero ‘alläpa sasa kawëkunam kanqa wayikichö kë llapan mana alli ruranqëkipita,’ ninshi. ¡Y imëkash llakikïninkuna Davidpa!

Puntatash wanurinaq Bat-sëbapa wawan. Tsëpitanash Davidpa mayor tsurin Amnón panin Tamar nishqanwan mälas punukïkunaq. Tsëta musyëkurnash Davidpa huknin Absalón tsurin wanïkatsinaq Amnonta. Tsë pasariptinnash rey churayänampaq nunakunapa shonqunkunata tumakäratsinaq pëman Absalonqa. Tsënönash Absalón wanuriptin David ganarinaq peleata. Y tsënöshi alläpa llakikïninkuna kaptin hipëkunaq David.

Kë llapan pasëkaptinnash Salomón shutiyoq wawan yuririnaq Bat-sëbapa, y Adonías nishqan tsurinnash rey këta munanaq David edäyashqa qeshyëkaptin. Tsënash Sadoc nishqan sacerdöteta qayëkatsir, tsurin Salomonpa peqanman aceiteta hichëkatsinaq rey kanampaq. Y tsënöllanash 70 watayoq këkar David wanurinaq. Y 40 watash gobernashqa kanaq. Kananqa Salomonnash rey.