Wambrakunata kuyan

HUK wambratam këchö Jesusqa waqurëkan. Wambrakunatapis pëqa kuyaqshi këchö rikanqëkinö. Apostolninkunash kayan rikarëkaq nunakunaqa. ¿Imaraq Jesús nikan, musyankiku?

Karu ëwayanqampitash kutirayämushqa Jesusqa apostolninkunawan. Tsë kutimïchöshi liryashqa kayänaq apostolninkuna. Tsëshi, ‘¿imatataq nänichöqa liryayarqëki?,’ nishpash tapunaq Jesús chärirnin. Pero liryayanqampitaqa musyanaqshi Jesús. Mä willarayämanqakush neqnöllash tapurinaqqa.

Y manash ni ima niyantsu apostolninkunaqa, mëqan mandakoq kanantash liryëkäyänaq nänichöqa. Wakinqa wakinkunapitapis más reqishqa këtash munayan. ¿Imanöraq mandakoq kë munë mana alli kanqanta nenqa Jesús?

Tsë wambrata qayarirshi, pëkuna nöpanman churarinaq. Tsëpitanash, ‘manam Teyta Diospa reinonman yëkuyankitsu mana kë wambranö karqa, y mana cambiarqa. Reinochö más reqishqa mandakoqqa kë wambranö tikraqmi, tsëtam alleq käyiyänëkita munä,’ nishpash ninaq Jesús apostolninkunata. ¿Imanir-raq tsëta nerqa, musyankiku?

Këtaqa ninaq, wambrakunaqa mana reqishqa o wakinkunapa mandakoqnin këta mana pensayaptinshi. Tsëshi wambrakunanö këta yachakuyanman apostolninkunaqa, tsënöpa reqishqa o mandakoq këta munar mana liryayänampaq.

Hina huk kutikunapis, Jesusqa wambrakunata alläpash kuyanaq. Y tsëpita unëllatanash Jesús rikaq wakin nunakuna apayämunaq wambrankunata. Pero pëman witiyänanta manash munayänaqtsu apostolninkunaqa. Tsënash, ‘ama michäyëtsu wambrakuna noqaman shayämunanta, pëkunanö kaq nunakunapaqmi Teyta Diospa reinonqa kanqa,’ nishpash ninaq Jesús pëkunata. Y tsëpeqnash bendecirinaq waqurkur wambrakunata. ¡Imanö shumaqmi Jesús wambrakunata kuyanqan musyëqa! ¿Manaku tsënö parecipushunki?