Patsachö mushoq paraíso

RIKË hatusaq hirkakunata, shumaq wëtakunata y hatusaq montikunata. ¿Manaku shumaq kë llapan? Tsë wambrapa makimpitam mikïkan tsë luychuqa rikëkanqëkinöpis. Hina tsampachömi këkäyan cabällokunapis y leonkunapis. ¿Kë shumaq Patsachö o wayichö tärëta munankimantsuraq?

Kënö selläma shumaq Patsachö mana nanatsikushpa y mana llakishpa qam wiñeypaq kawanëkitam munan Teyta Diosqa. Tsë shamoq mushoq paraïsochö täraqkunapaqqa këtam Biblia änimantsik. ‘Pëkunawanshi Teyta Diosqa këkanqa, mananash ni nanatsikï, ni waqë, ni wanïpis, ni kanan tiempochö mana alli kawëkunapis kanqanatsu.’

Kë llapantaqa ruramonqa kikin Jesusshi. ¿Imëraq ruramonqa musyankiku? Awmi, kë llapan mana alli nunakunata y Patsachö llapan mana allikunata ushakäratsimurshi. Yarpaptikeqa, unëpis llapan qeshyakunapitam nunakunata kachakätserqan kë Patsachö y wakin wanushqakunatapis kawaritsimorqam. Tsënöpam Teyta Diospa reinonchö reinar qallëkamorqa Patsachö llapan ruramunanta rikätsimarqontsik.

¡Imanö shumaqraq tsë mushoq paraïsochö kawëqa kanqa! Ciëlopitaqa gobernayämonqa Jesuswan akranqankunash. Llapan Patsachö kushi kushi kayänantash pëkunaqa rikäyämonqa. Tsë mushoq Patsachö kawënintsik Teyta Dios qomänantsikpaqqa, ¿imatash rurashwan?, tsëtam kanan yachakurishun.