Lección 3
¿Pitaq Jesucristo?
¿Imanirtaq Bibliacho, Jesusta Diospa “mayor” Tsurin nin? (1)
¿Imanirtaq “Palabra” nin? (1)
¿Imanirtaq Jesús shamorqan nunano Patsaman? (2-4)
¿Imanirtaq milagrokunata rurarqan? (5)
¿Jesús imata ruramunampaqtaq ichikllana pishin? (6)
1. Manaraq Patsaman shamurmi, Jesusqa espirituno tärarqan cielocho. Pëmi karqan llapampitapis Diospa punta kamashqan, tsemi Bibliachoqa nin: Diospa “mayor” Tsurin (Colosenses 1:15; Revelación 3:14). Jesusllatam hapallan Dios rurarqan, manam ni pi yanaparqantsu. Tsepitanam, Jehová Jesusta insherqan manaraq nunano Patsaman shamuptin, “uryaq maestrontano” penam yanaparqan llapan cielocho, Patsacho, rikanqantsikta ruramunampaq (Proverbios 8:22-31; Colosenses 1:16, 17). Diospis hina insherqan pepaq parlaqnintanomi. Tsemi Bibliachoqa Jesusta “Palabra” nin (Juan 1:1-3; Revelación 19:13).
2. Diosmi Tsurinta Patsaman kachamorqan, kawëninta Mariapa pachanman churëkamurnin. Jesuspa Teytanqa manam kë Patsacho nunatsu karqan; tsemi pëqa mana hutsata ni imperfeccionta chaskerqantsu. Kima razonwanmi Jesustaqa Dios kachamorqan Patsaman: 1) Diospita razompa kaqta yachatsimänantsikpaq (Juan 18:37), 2) Llapan kawëninchomi Diosllapaq karqan, pë kanqanno noqantsik ruranapaq (1 Pedro 2:21) 3) Noqantsik-rekur wanunampaq, tsenopa hutsapita, wanïpita horqamänantsikpaq. ¿Imanir-raq Jesús wanunan karqan? (Mateo 20:28).
3. Diospa leyninta mana wiyakushqa karninmi, puntata Patsacho kamashqa nuna, Adán, mana alli rurëman ishkirerqan, tsetam Bibliachoqa “hutsa” nin. Tsemi Diosqa sentenciarqan wanïpaq (Génesis 3:17-19). Manana Diospa leynin nenqanno kawashqa karnam, perfectonatsu karqan. Ichikllapayannam awkinyarqan, tsepitanam wanorqan. Tsenopam Adán, llapan tsurinkunata muyarqan hutsata. Tsemi kanan noqantsikpis awkinyantsik, tsatsayantsik, qeshyantsik, wanuntsik. ¿Imanöparaq nunakuna salvakuyanman? (Romanos 3:23; 5:12.)
4. Jesusqa Adannömi perfecto nuna karqan. Pero manam Adanno mana wiyakoqtsu karqan, Jesusqa llapan Dios nenqantam wiyakorqan, imekata rurekäyaptimpis. Tsemi perfecto kawëninwan, Adampa hutsampita nunakunata rantishqa. Kë ruranqantam, Bibliachoqa “rescate” nin. Tsenopam, Adampa tsurinkunaqa, librakäyanman wanïpita. Llapan Jesusman feyoqkunaqa, chaskiyanqa perdontam hutsankunapita, wiñeypaq kawëtawanmi tariyanqa (1 Timoteo 2: 5, 6; Juan 3:16; Romanos 5:18, 19).
5. Kë Patsacho Jesús këkarninmi, kachakätserqan qeshyaqkunata, mallaqekaqkunata qararqan, marcho hatun shukukikunatapis upällatserqanmi. Wanushqakunatapis sharitserqanmi. ¿Imanirtaq milagrokunata rurarqan? 1) Nunakunata hipaqta rikarmi ankuparqan, tsemi yanaparqan. 2) Milagronkunachomi rikarätserqan, Diospa Tsurin kanqanta. 3) Milagronkunawanmi rikätsimarqantsik, pë Reyno Patsata gobernamorqa, tsenolla ruramunanta llapan wiyakoqkunapaq (Mateo 14:14; Marcos 2:10-12; Juan 5:28, 29).
6. Jesús wanuriptinmi Dios sharitserqan espiritutano, tsepeqnam kutikorqan cielota (1 Pedro 3:18). Tsepitanam Dios churarqan Rey Jesusta. Ichikllanam pishin Jesús llapan mana allikunata, llakikikunata Patsapita ushakätsinampaq (Salmo 37:9-11; Proverbios 2:21, 22).
[7 kaq päginachö dibüjukuna]
Kë Patsacho kekarmi, Jesús nunakunata yachatserqan, milagrokunata rurarqan, noqantsik-rekur wanorqan