¿Metaraq ewantsik wanurnenqa?

Waniqa huklayam kawepita. Alleq puninomi waniqa (Juan 11:11-14). Wanushqakunaqa manam wiyayantsu, ni rikäyantsu, ni parlayantsu, ni yarpakachäyantsu imatapis (Eclesiastés 9:5, 10). Mana alli religionqa yachatsikun, wanushqakunaqa ewkuyan, wak vidaman, üne wanushqa castankunawan taraq, nishpam. Manam tsenotsu Bibliaqa yachatsikun.

Wanushqakunaqa manam ni imacho yanapamantsiktsu ni mantsakätsimantsiktsu. Kanan nunakunaqa, wanushqakunapaqmi imekampis apayapun, kushikuyänampaq nirnin. Manam tse costumbrekunaqa Diosta kushitsintsu, tse nunakuna rurayanqan costumbreqa, Satanaspa ulikïninmi. Manam ni wanushqakunatapis kushitsiyannatsu, pekunaqa mananam kawayannatsu. Tsemi mantsashwantsu ni adorashwantsu wanushqakunataqa. Diosllatam adoranantsik (Mateo 4:10).

Wanushqakunaqa kawariyämonqam. Jehovaqa riyatsimonqam wanushqakunata, paraisocho tarayänampaq (Juan 5:28, 29; Hechos 24:15). Imanomi noqantsik punïkaqkunata riyaratsintsik, tseno kaqmi Diospis wanushqakunata riyaratsimonqa (Marcos 5:22, 23, 41, 42).

Manam nuna wanuntsu niyanqanqa ardemi, Satanás Diablom tseno nunakunata creitsin. Satanasqa demonionkunawan nunakunatam creitsin, wanushqakunapa espiritunkuna kawayanqanta, qeshyatsikur, tüki mana allikunata rurarnin puriyanqanta. Hina nunakunata ulipan sueñokïninkunacho, yuripun wanushqakunarikoq. Tsemi Jehovaqa chikin, wanushqakunawan parle munaqkunata (Deuteronomio 18:10-12).