Mesias chäramun

¿IMANÖRAQ nunakuna reqiyanman karqan Mesïasta? Kikin Diosmi musyatsikunan karqan pï kanqantapis. Escrituras Hebrëasta qellqayanqan 400 watakuna pasarishqanchömi, Galilëapa norte kaq lado Nazaretchö täraq Maria shipashta ángel Gabriel yuripurqan. Y wamrayoq kanampaq willarqan. Ollquwan mana kashqa kaptimpis, Diosmi santo espïritunwan qeshyaq tikranampaq permitirqan. Kë wamram Dios awnikushqan Rey karnin imëyaqpis gobernanan karqan. Kikin Diosmi ciëlochö kawëkaq mayor Wamrampa kawëninta Marïapa pachanman churanan karqan.

Marïaqa kushishqam Diospa qarëninta chaskirqan. Y novion Josënam, Maria imanir qeshyaqyanqanta juk angelninwan Dios willariptin pëwan casakurqan. Pero yarpäshun, Diosqa willakurqan Mesias Belenchö yurinampaqmi, manam Nazaretchö yurinampaqtsu (Miqueas 5:2). Pero ¿imanöraq cumplikanman karqan Nazaret markapita 140 kilömetroschöraq Belen këkaptinqa?

Ichik tiempollachömi, Römata gobernaq mandakurqan juk censota rurayänampaq, tsëmi llapan nunakuna yurikuyanqan markaman inscribikoq kutiyänan karqan. Këchömi tanteantsik Josëpawan Marïapa familiankuna Belenpita kayanqanta, tsëmi wamra yurinampaq ichikllana pishikaptin Belenta viajayarqan (Lucas 2:3). Jesusqa juk establochömi yurikurqan, y animalkunata qarakuyänanllamanmi punuratsiyarqan. Washaninkunachö mitsikoqkunanam atska angelkunata rikäriyarqan, y juk angelnam Mesias o Cristu yurishqanta mitsikoqkunata willarqan.

Jina juk nunakunapis musyatsikuyarqanmi Jesus awnikushqa Mesias kanqanta. Profeta Isaïasmi willakurqan Cristu ruranampaq kaqkunata juk nuna nänita kichaq cuenta shamunampaq kaqta (Isaías 40:3). Tsë nunaqa Juan Bautistam karqan. Juk kutim Jesusta rikärir kënö nirqan: “¡Ricayë, taqemi Diospa achcasnin. Pemi jinantin munducho nunacunapa jutsancunarecur wanonqa!”. Tsë höram Juanpa qateqninkunaqa Jesuspa discïpulonkuna tikrariyarqan. Juk kaqmi, “¡Mesiastam noqacuna taricuyarqö!” nirqan (Juan 1:29, 36, 41).

Pero Mesias pï kanqanqa tsëran más alli musyakänan karqan. Jesusta Juan bautizariptinmi, santo espïritunwan Mesias kanqanta Jehová kënö willakurqan: “Quemi noqapa cuyë Tsurï. ¡Perecurmi noqa allapa cushicü!” (Mateo 3:16, 17). Awmi, ¡Dios awnikunqan Mesïasqa chäramushqanam karqan!

Pero ¿imëtaq chämurqan? 29 watachömi, Daniel willakunqan 483 wata cumpliriptin. Kananqa, Jesus Mesias kanqampita wakin yachatsikïkunallatam rikärirquntsik. Pero ¿imapitaraq kë Patsachö yachatsikunman karqan?

(Mateo 1–3, Marcos 1, Lucas 2 y Juan 1 capïtulokunapita jorqashqam.)