Jehoväta cäsukoq chusku jövinkuna

Nabucodonosorqa Judächö wakin israelïtakunata y gobernantipa respetashqa wakin familiankunatam Babiloniaman apakurqan. Y cortichö trabajaqkunapa mandaqnin Aspenaz jutiyoq nunatam pëkunata diriginampaq churarqan. Tsëmi Aspenazqa mas sänu y mas yachaq kaq jövinkunata akrarqan. Daniel, Hananïas, Misael y Azarïas jutiyoq jövinkunatapis akrarqanmi. Y Aspenazqa pëkunapa jutinkunatam cambiarqan: Beltsasar, Sadrac, Mesac y Abednëgu nirmi churarqan. Tsë jövinkunaqa gobernantipa palaciunchömi sirwiyänan karqan, y imëkatapis yachaq y alli pensaqmi kayänan karqan. Tsëmi Aspenazqa yachatsinan karqan caldeukunapa idiömankunata y imanö qellqayanqanta. Y gobernanti mikunqan mikuyta y upunqan vïnuta cada junaq qarayänampaqmi mandakurqan. ¿Babiloniachö imëkata yachakurtsuraq tsë jövinkunaqa Jehoväta qonqariyanman karqan?

Tsë chuskun jövinkunaqa Jehovätam cäsukuyarqan. Jehoväpa Leyninta cäsukurmi gobernanti mikunqan mikuykunataqa mikuyarqantsu. Tsëmi Aspenazta kënö niyarqan: “Rogakuyaqmi, tsë mikuyta y vïnuta mana qarayämanëkipaq”. Peru Aspenazqa kënömi nirqan: “Mana mikuyanqëki rëkur, wakin jövin mayikikunapita mas uyu kayanqëkita rikar, gobernanti noqata culpatsamanantam mantsä”.

Tsë cuidaqnin nunatam Daniel kënö nirqan: “Teytë rogakushqëki. Chunka junaqkunapa verdürallata y yakullata qarayämë mä imanöshi kayäshaq. Tsëpitanam igualatsiyämanki gobernantipa mikuyninta mikoq jövinkunatawan”. Tsënö niptinmi Aspenazqa änirqan.

Y chunka junaqkuna pasariptinqa, wakin kaq jövinkunapitapis mas sänum Danielwan amïgunkunaqa kayarqan. Cäsukoq kayaptinmi Jehoväqa alläpa kushikurqan. Y Danieltanam yanaparqan revelacionkunata y suëñukunata entiendinampaq.

Kima wata pasariptinnam Aspenazqa llapan jövinkunata Nabucodonosorman aparqan. Y llapankunawan parlarirmi gobernantiqa cuentata qokurqan Daniel, Hananïas, Misael y Azarïasqa llapampitapis mas yachaq kayanqanta. Tsëmi pëkunata akrarqan pëpaq trabajayänampaq. Gobernantiqa, imatapis mana entiendir o mana musyarqa pëkunatam tapoq. Y cuentatam qokurqan gobernanqan nacionchö llapan brüjukunapitapis y suerti qateqkunapitapis, tsë jövinkuna chunka kuti mas yachaq kayanqanta.

Karu markachö këkarpis Daniel, Hananïas, Misael y Azarïasqa manam qonqariyarqantsu Jehoväpa sirweqnin kayanqanta. ¿Y qamqa? Papänikikunawan mana këkarpis, ¿Jehoväta cäsukunkitsuraq?