3 kaq yachatsikï
Agradecikoq kë
BIBLIAQA KËNÖMI NIN: “Ima pasayäshuptiquipis, ‘Grasias’ nicuyanqui” (1 Tesalonicenses 5:18).
¿IMATAQ LLAKISHQA KËMAN CHÄTSIKUN? Nunakuna allitukoq y mana agradecikïta yachaq kayanqanmi, y tsënö këqa muyakunmi (2 Timoteu 3:1, 2). Hinamampis, imëka rurëyoq karninmi kapamanqantsikkunapita o noqantsikrëkur rurayämunqankunapita agradecikïta qonqëkuntsik.
¿IMATAQ KUSHISHQA KANAPAQ YANAPAMÄSHUN? Llapan allikuna kapamanqantsikman pensanqantsikmi. Pero rey Davidta pasanqannöpis, höraqa itsa atska problëmakunawan nitipakashqa karnin, kushishqa këta tarishuntsu. ¿Imatataq David rurarqan? Diosman mañakurmi kënö nirqan: “Llapan ruranqëkikunamanmi pensarqö, llapan shonqüwanmi makiki ruranqankunata kuyarqö” (Salmo 143:3-5). Imëka mana allikunapa pasarpis agradecikoq këtam yacharqan, y tsëmi yanaparqan kushishqa kanampaq.
Tsëmi pipis noqantsikrëkur imallatapis ruramunqanman pensanantsik y agradecikunantsik alläpa precisan. Jesuspis tsënömi rurarqan. Yanasan Maria huk kuti alläpa chaniyoq aceiteta chakinman y peqanman o umanman hichëkapuptinmi, “¿imapaqraq taqe warmi tse perfumita perditsir ujuratsin!” nir piñakuyarqan wakinkunaqa.a Rantikïkur tsë qellëwan waktsakunata yanapë más alli kanqantam pensayarqan. Pero Jesusqa, “¡upälla cayë! ¡Ama piñapäyëtsu!” nirqanmi. Nïkurnam, “que warmeqa puedenqanmannomi noqapaq rurashqa” nirqan (Marcos 14:3-8; Juan 12:3). Jesusqa, manam wakinkunanötsu Marïapaq pensarqan, antis ruranqampitam alläpa agradecikurqan.
Pï më nunakunam familiankunata, amïgonkunata o imankunatapis oqrarir-raq, tsë oqrayanqan alläpa valoryoq kanqanta cuentata qokuriyan. Tsëmi noqantsikpaq alläpa väleq kaqkunataqa imëpis qonqashwantsu. Allichi kanman imakunapita agradecido kanqantsikta yarpanqantsik o papelman qellqanqantsikqa.
Hinamampis, manam qonqanantsiktsu “llapan imecapis” Diospita shamunqanta, tsëmi mañakurnin imëpis agradecikunantsik (Santiagu 1:17). Tsënö rurarninqa, manam agradecido kanqantsikllatatsu rikätsikushun, kapamanqantsikkunawampis kushishqam kashun (Filipenses 4:6, 7).
[Päginapa ura kuchunchö willakï]
a Jesus Patsachö kawanqan witsankunaqa, kuyakoq kayanqanta rikätsikurmi nunakunaqa visïtankunapa peqanman perfume aceiteta hichapuyaq. Jesuspa chakinman aceiteta hicharqa, humilde kanqantam Maria rikätsikurqan.
[6 kaq päginachö dibüju]
¿Agradecikuntsikku noqantsikrëkur rurayämunqankunapita?