Leeqkuna tapukuyanqan

¿Huk kastallataku Diosnintsik más allitanö rikan?

▪ Manam, Diosnintsik yanapaptinmi apóstol Pedru kënö qellqarqan: “Tëtecuna, cananqa allim noqa cäyicurerqö llapan nunatapis Dios iwallla ricamanqantsicta. Porqui jinantin marcacho pipis allicunata rurar y Diosta respetar cacuyaptenqa, pëqa chasquinmi” (Hechos 10:34, 35).

Këchöqa clärom rikantsik Diosnintsikpa pensënin nunakunapa pensëninnö mana kanqanta. Atskaq nunakunam niyan kikinkunapa kastanlla más alli kasta kanqanta. Tsënö pensëqa Charles Darwinpa pensëninnöllam, pëmi këta qellqarqan: “Imë karpis, [...] nunakunapa más alli kaq kastankunam, chuncho kaq kastakunata ushakäratsiyanqa”. Llakikïpaqqa, kikinkunapa kastankunalla más alli kanqanta pensar wakin nunakunata chikiyanqanmi.

Pero ¿rasumpëpaku más alli kasta kayan? ¿Cientïficokuna rikätsikuyashqaku ima kastapis más alli kanqanta? Manam, tsëpa rantinqa, Universidad de Oxford nishqanchö Bryan Sykes shutiyoq profesormi këta nirqan: “Manam imapis kantsu huk kasta wakin kastakunapita más alli kanqanta rikätsikoqqa. [...] Imëpis tapuyämanmi, huk griëgopaq, huk italiänopaq hukläya hukläya ADNa nishqan kayäpunqanta, pero manam kantsu. [...] Llapantsikpis tsë kastallam kantsik”.

Tsënö ninqanqa Biblia ninqannöllam, Diosqa huk nunallatam y huk warmillatam kamarqan, y llapantsikpis pëkunapa tsurinkunam kantsik (Génesis 3:20; Hechos 17:26). Tsëmi Diosnintsikpa rikënimpaqqa, huk kastalla llapan nunakunapis kayan.

Jehoväpaqqa manam precisantsu nunakunapa qarankuna ima color kanqan ni qaqllankuna imanö kanqampis, pëpaqqa más precisan nunakuna shonqunkunachö imanöpis kayanqanmi. Kikinmi këta nirqan: “Nunaqa nawin rikanqanllatam rikan, pero Jehoväqa shonqutam rikan” (1 Samuel 16:7). Këta musyëqa alläpam kushitsimashwan. ¿Imanir? Rikärishun.

Ima kastapita karpis, itsachi kushishqatsu kantsik ima rikoq kanqantsikwan, y rasumpa kaqchöqa manam tsëtaqa altsëta puëdentsiktsu. Pero mana alli pensënintsikkunata y mana alli munënintsikkunataqa altsëta puëdentsikmi (Colosenses 3:9-11). Imanö pensanqantsiktapis alleqmi rikänantsik, itsa wakinkunapita más alli kasta kanqantsikta o mana väleq kasta kanqantsikta pensëkashwan. Tsë pensëkuna Diospa pensënimpa contran kanqanta musyarmi, tukïta ruranantsik shonquntsikpita tsë pensëta horqanapaq (Salmo 139:23, 24).

Jehoväqa yanapamäshunmi pë pensanqannölla pensanapaq sinchikushqaqa. Tsëpaqmi Biblia kënö nimantsik: “Jehoväpa nawinkunaqa hinantin patsapam rikëkan pëllata llapan shonqunkunawan kuyaqkunata kallpanwan yanapanampaq” (2 Crónicas 16:9). Tsënö ninqan cumplikanqanqa, ¡imanö kushikïpaqmi ima kastapita kashqapis!

[Päginapa ura kuchunchö willakï]