¿Yarpankiku?
¿Shumaq yachakurku leirqunki tsëllaraq yarqamoq Täpakoq revistakunata? ¿Puëdenkimantsuraq kë tapukïkunata contestëta?
¿Imaman mana ishkinapaqtaq Salomonpa kawënin yanapamantsik?
Diosqa rey Salomonta bendecirqanmi y munëninta ruranampaqmi utilizarqan. Tsënö kaptimpis, rey kanqan witsanqa manam Jehoväta wiyakurqantsu. Faraonpa warmi tsurinwan casakurirpis, mëtsika warmikunataran ashirqan, y tsë warminkuna mana alli religionkunaman pushayänantam jaqirqan. Tsë pasakunqanmi yanapamantsik mana alli pensëkunaman o rurëkunaman mana ishkinapaq (Deu. 7:1-4; 17:17; 1 Rey. 11:4-8) (1/12, 12-15 kaq päginakuna).
¿Imanötaq musyantsik punta cristiänokunapa tiempompita patsë ciëlopaq akrashqakuna Patsachö imëpis kayanqanta?
“Triguwan” ‘balligu’ paqta winanqampaq Jesus parlanqanchöqa, ‘alli muruqa’ ‘Diospa mandaquinincho caqpaq nunacunam’ kayan (Mat. 13:24-30, 38). Ballïgoqa trïgowan paqtam winanan karqan cosecha tiempo chanqanyaq. Pikuna ‘trigo’ cuenta kayanqanta mana musyashqapis, ciëlota ëwaqpaq kaq wakin cristiänokunaqa punta cristiänokunapa tiemponkunapita patsëmi kanan witsanyaq Patsachö kayashqa (1/1, 11 kaq página).
¿Imakunataq pasanqa Armagedón qallanampaq?
Nacionkunaqa “segurunam y alli pasaquichonam cantsic” niyanqam (1 Tes. 5:3). Llapan gobiernokunam mana alli religionkunapa contran sharkuyanqa (Apo. 17:15-18). Jehoväta sirweq cristiänokunatam ushakätsita tïrayanqa. Tsëllachönam ushakë junaq chäramunqa (1/3, 9 kaq página).
¿Imanirtaq Särapaq nintsik Diosta wiyakoq y alli warmi kanqanta?
Ur markapita ëwakunampaq Abrahanta Dios mandaptinqa, familianta, amïgonkunata y alli kawakïninta jaqirïkurmi mana reqinqan markakunaman ëwakunan karqan. Tsënö kaptimpis, Säraqa nunantam yanaparqan y Dios bendecinampaq kaqmanmi markäkurqan o yärakurgan. Pëqa Abrahanta respetarqanmi y tukïchömi alli warmi kanqanta rikätsikurqan (1/2, 7 kaq página).
¿Imanirtaq Jesusqa wiyaqninkunata nirqan pipis qepinta pullan lëguata apapunampaq mañakuptinqa “juc lëgua masyag” apapunampaq? (Mat. 5:41, NTCN.)
Tsë witsankunaqa romänokunapa makinkunachömi Israel nacionqa këkarqan, y pëkunaqa pitapis obligayaqmi yanapayänampaq. Pipis qepinta pullan lëguata apapunampaq mañakuptin “juc lëgua masyag” apapunampaq nirqa, autoridadkuna imachöpis yanapakuyänampaq mañakuyaptin gänas gänaslla rurayänampaqmi Jesus parlëkarqan (1/4, 9 kaq página).