Diospa Palabrampita yachatsikïkuna

¿Imaraq religionkunata pasanqa?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa capaz qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Llapan religionkunaku alli kayan?

Llapan religionkunachömi alli nunakuna o runakuna kayan y Diosta wiyakïta munayan. Y Diosqa cuentamanmi pëkunata churan y alläpam kuyan. Pero llakikïpaqqa, religionpa jutinchö imëka mana allikunata nunakuna rurayanqanmi. Unë witsanqa wakin pushakoq religiösokunaqa alläpam sufritsiyarqan pëkuna creiyanqanman mana creeqkunata (2 Corintios 4:3, 4; 11:13-15). Kanan witsampis wiyantsikmi religioso nunakuna terroristakunata y guërrakunata yanapayanqanta, jina wamrakunata violëpitapis tumpëtukuyashqam. (Lei Mateo 24:3-5, 11, 12.)

Bibliaqa nimantsik jukllëlla alli kaq religión kanqanta y wakin kaqqa mana alli kanqantam. Mana alli kaq religionkunaqa mana rasun kaqtam Jehová Diospita yachatsikuyan. Pero pëqa munan nunakuna rasumpa kaqta musyayänantam. (Lei 1 Timoteu 2:3-5.)

2. ¿Imaraq pasanqa mana alli kaq religionkunata?

Diostaqa manam gustantsu “kuyämi” nikarnin pëpita mana rasun kaqta yachatsikoq religionkuna. Pero wakin religiösokunataqa alläpam gustan Satanás Diablupa makinchö këkaq mundo (Santiagu 4:4; 1 Juan 5:19). Bibliaqa nin Diosllata sirwiyänampa rantin o trukan gobiernokunaman markäkoq o yärakoq religionkunaqa imëka lluta purikoq warmi kayanqantam, y “jatungare Babilonia” nirmi jutitsin. Apäkï Tamya kariptin mana alli kaq religionkuna qallanqan markapam tsënöqa jutin karqan. Ichikllachönam Diosqa ushakäratsimunqa ulikoq o llullakoq y nunakunapaq tukï problema apamoq religionkunata. (Lei Apocalipsis 17:1, 2, 5, 17 y 18:8,  23, 24.)

3. ¿Imëtaq kë Patsachö kushishqa kawakï kanqa?

Llapan mana alli religionkunata ushakäratsirmi Jehoväqa ruranqa kë Patsachö kushishqa kawakï kanampaq. Tsë religionkunaqa manam nunakunata ulipäyanqanatsu o llullapäyanqanatsu ni rakiyanqanatsu. Llapan nunakunam jukllëlla y rasumpa kaq Diosta adorayanqa. ¿Manaku tsëqa alläpa alli willakï? (Lei Isaías 11:9 y Apocalipsis 18:20, 21 y 21:3, 4.)

4. ¿Imatataq rurayänan alli shonquyoq nunakuna?

Jehoväqa manam qonqantsu entero Patsachö mana alli religionkunachö këkaq alli shonquyoq nunakunata. Pëqa Bibliapita rasumpa kaq yachatsikïninkunawanmi tsënö nunakunata juntëkan. (Lei Miqueas 4:2, 5.)

Jehoväqa sirwita munaqkunata kushishqam markanman chaskin. Diosta sirwinata familiantsikkuna y  amïgontsikkuna mana munayaptimpis, tsëta rurarqa atska bendicionkunatam chaskishun: Diospa amistadninta, mushoq “familiata” y shamoq tiempochö imëyaqpis kawakïta. (Lei Marcos 10:29, 30 y 2 Corintios 6:17, 18.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 15 y 16 capïtulonkunata leiri, kë librotaqa Jehoväpa testïgonkunam rurayämushqa.

[16 kaq päginachö pikunapa kanqan]

The Complete Encyclopedia of Illustration/J. G. Heck