“Munanqämi cumplikärishqa”

Chunka pitsqa watanam pasarishqa Emilia precursora këninta mana munëkarpis dejanqampita. Y kanankunam yarpëkashqa precursora kanqan witsan kushishqa kawanqanman, tsëmi precursora këta yapë munarishqa.

Tsënö kaptimpis, juk emprësachö llapan tiemponwan trabajaptinmi precursora kanampaq tiempon tinkurqantsu, tsëmi alläpa llakitsirqan. Juk kutim Emiliaqa alläpa llakikurnin trabajaq mayinkuna wiyëkäyaptin kënö nirqan: “¡Imanö alliraq këkunman wallka tiempolla trabajaptïqa!”. Trabäjonta rikaq warmim, tsëta musyarirnin tapoq ëwarqan parlanqan rasumpa o mana rasumpa kanqantapis willanampaq. Emiliaqa rasumpa parlanqantam nirqan. Pero wallka tiempolla trabajanampaqqa, tsë emprësata rikaq nunawanran o runawanran parlanan karqan, porque tsë emprësaman trabajaq yëkoqkunataqa llapan tiemponkunawan trabajayänampaqmi mañayaq. Tsëmi, Emiliaqa emprësata rikaq nunawan parlanampaq alistakurqan y Jehovätam mañakurqan yachëllapa parlapänampaq.

Parlayanqan höranam, mana mantsapakushpa y respëtowan Emiliaqa ichik tiempollana trabajanampaq mañakurqan. Emprësata rikaq nunatam nirqan mana trabajanqan hörakuna nuna mayinkunata yanapaq ëwanqanta. Kënömi nirqan: “Jehoväpa testïgonmi kä y llapan nunakunatam Diospita yachatsir yanapä. Kanan witsan nunakunapa alli këninqa ichikllapa ichikllapam ushakëkan, tsëmi alläpa necesitäyan Bibliapa consëjonkunata. Manam munätsu trabajo ushariptin imëkatapis ruranqäkuna emprësachö trabajanqäta wallkätsinanta, pero nunakunata yanapanäpaq más tiempö kanantam munä. Tsëmi mañakö más wallka hörakunallana trabajanäpaq”.

Emprësata rikaq nuna shumaq wiyarirmi, nunakunata juk kutichö yanapëta pëpis pensanqanta willarirqan. Jina nirqanmi: “Imanir wallka tiempollana trabajëta munanqëkita nikämaptikiqa mañakunqëki tiempotachi qoykushqëki. Pero wallkallatana gananëkipaq kaqtaqa musyankim, ¿aw?”. Emiliaqa awmi nirqanmi, y necesitanqanllawan kawanampaq kaqtam willarqan. Tsëpitanam nirqan: “Munënïqa alli kaqkunata rurar wakinkunata yanapëmi”. Emprësata rikaq nunanam kënö nirqan: “Alläpam respetä imatapis mana shuyarashpa tiemponkunata rakir wakinkunata yanapëta munaqkunataqa”.

Kananqa, semänachö chusku junaqllanam Emiliaqa trabajan, pëllatam tsë emprësachö tsënö trabajanampaq permitiyashqa. Y kushikïnimpaqqa, mastanam pagayan, tsëmi puntata gananqannölla kanampis chaskikan. Tsëmi kënö nin: “Munanqämi cumplikärishqa, yapëmi precursora kä”.

Y qamqa, ¿precursor kanëkipaq necesitanqëkillawan kawëta pensashqaku kanki?

[32 kaq päginachö ninqan]

Emprësata rikaq nunam kënö nirqan: “Alläpam respetä imatapis mana shuyarashpa tiemponkunata rakir wakinkunata yanapëta munaqkunataqa”