Kananqa mas kushishqam kawakuyan

ATSKA millon cristiänukunam Navidäta celebrayantsu. ¿Llakikuyanku tsëta decidiyanqampita? ¿Imatapis manana rurëta puëdiyanqampitaku llakikuyan? ¿Wamrankunaqa imatapis perdikäyanqantaku pensayan? Më tsë nacionpita Jehoväpa testïgunkuna niyanqanta rikärishun.

Jesusta yarpëpaq. Australia nacionpita Evem kënö willakun: “Manaraq Jehoväpa testïgun karqa, höra hörallam iglesiata ëwaq kä. Navidäpaq o Pascua Fiestallapaqmi ëwaq kä, y höraqa manam tsëkunapaqpis ëwaqtsu kä. Peru tsë fiestakunaman ëwarpis, manam Jesusmanqa pensaqtsu kä. Kananqa manam Navidäta celebränatsu, peru semänachö ishkë kutim congregacionnïchö kaqkunawan juntakä, y Jesuspaq Bibliachö ninqampitam nunakunata yachatsï”.

Imatapis qarakuypaq. Irlanda del Norti nacionpita Reubenmi kënö willakun: “Mana pensanqä höra imatapis qarayämaptinqa, alläpam kushikü. ¡Illaqpita imatapis qarayämaptinqa alläpam gustaman! Jukkunata qaranäpaq tarjetakunata y dibüjukunata rurëpis alläpam gustaman. Tsëkunata qaraptï mas kushishqa kayanqanta rikarmi noqapis kushikü”.

Wanëkaqkunata yanapëpaq. Australia nacionpita Emilym kënö willakun: “Qeshyëkaqkunapaq imallatapis cocinakurqa alläpam kushikuyä. Höraqa mas alli sientikuyänampaqmi, postrikunata rurayä, wëtakunata y ima qarëllatapis apayä. Tsëtaqa imë junaqpis rurëta puëdiyämi”.

Familiawan juntakëpaq. Islas Caiman niyanqampita Wendym kënö willakun: “Mana fiesta kanqan junaq familiäwan juntakäyaptïqa, wamräkunapis masmi tiyunkunata, awilunkunata y prïmunkunata reqita puëdiyan. Costumbrikunata mana sïguiyaptï y fiestakunata mana celebrayaptïmi, familiäkunaqa musyayan fiestarëkurlla mana ëwayanqäta sinöqa kuyarnin visitayanqäta”.

Yamë këpaq. Espäña nacionpita Sandram kënö willakun: “Navidächöqa imëka rurëyoq karmi yamë këmanqa ichikllapis pensaqtsu kä. Peru Teyta Dios rurëta munanqampita yachakushqa karmi, wamräkuna mas alli Patsachöna kawayänampaq kaqta musyar tranquïlu sientikü”.