QARANCHÖ TËMAPITA ¿IMANIRTAQ ALLÄPA SUFRIMIENTU KAN? ¿IMËRAQ USHANQA?
¡Mëtsikaq culpannaqkunam wanuyashqa!
Noelleqa alläpa kuyakoq y dibujëta gustaq wamram karqan. Juk tardim, wayin waqtanllachö trompesar yakuman ishkirirqan. Chusku watanta cumplinampaq ishkë semäna pishikaptinmi yakuchö shenqakëpa wanurqan.
Charlotte, Daniel, Olivia, Josephine . . . Këkunam ishkë chunka wanushqa joqta y qanchis watayoq wakin wamrakunapa jutinkuna, pëkunataqa wanutsiyarqan Estädus Unïduspa juk escuëlanchömi. 2012 wata 14 de diciembri junaqqa, 26 nunakunam wanuyarqan. Panpayanqan junaqmi Estädus Unïduspa presidentin Barack Obama wanushqa wamrakunapa jutinkunata leyirir, tsëchö këkaqkunata kënö nirqan: “Kë desgraciakunaqa manam sïguinmantsu”.
Irak nacionpita 18 watayoq Bano jutiyoq shipashmi 1996 watachö familianwan Noruëgaman ëwakuyarqan. Amïgunkunaqa kuyarninmi Sol nishpa qayayaq. Peru 2011 wata 22 de juliu junaqmi juk mana alli nuna 77 nunakunata wanutsirqan, y llakikïpaqqa, tsë wanushqakunachö Bano shipash kanqanmi, tsë wanutsikoqmi kënö nirqan: “Perdontam mañakïta munä [...] mas nunakunata wanutsita mana puëdinqäpita”.
Entëru nacionkunachömi kënö noticiakunata wiyantsik. Pensari, accidentikuna, mana alli rurëkuna, guërrakuna, terroristakuna, imëka desgraciakuna y maskunapis alläpa nanatsikïman y sufrimientuman chätsikunqanman. ¡Illaqpitam mëtsikaq culpannaqkuna wanuyan! ¡Alläpa llakikïtam apamun!
Wakinkunaqa Diostam culpayan y nunakunapaq mana yarpachakunqantam pensayan. Wakinkunanam niyan sufreqta Dios rikämarnintsikpis imatapis mana ruranqanta. Y wakinkunanam niyan imëka mana allikuna pasakunampaq kaqkuna destinashqana kanqanta. Tsë asuntupaqqa, imëkatam niyan. ¿Mëchöraq tsë asuntukunapaq respuestata tarishwan? Sufrimientu imanöpa qallanqanta y imanö altsakänampaq kaqtam, qateqnin kaq yachatsikïkunachö Diospa Palabran Biblia yachatsimäshun.